ກວ່າຈະມາເປັນ Hannah 4EVE ເສັ້ນທາງຊີວິດໃນວົງການບັນເທີງລາວ ກ່ອນຈະກ້າວສູ່ສິລະປິນ T-POP

31 ມີນາ 22 (15:38) ເປີດອ່ານ ຄວາມຄິດເຫັນ 0

ສະໜັບສະໜູນເນື້ອຫາ

ແຮ່ນນ້າ ໂລເຊັ່ນບູ້ມ (Hannah Rosenbloom) ໜຶ່ງໃນສະມາຊິກຂອງວົງ 4EVE ຂອງໄທ ແຕ່ກ່ອນທີ່ຈະມາຮອດຈຸດນີ້, ສາວນ້ອຍຄົນນີ້ກ້າວຂາເຂົ້າສູ່ເສັ້ນທາງບັນເທີງໃນລາວໃນຖານະນາງແບບ, ນັກເຕັ້ນ, ນັກຮ້ອງ ແລະ ນັກສະແດງ ເວົ້າໄດ້ວ່າເຮັດມາເກືອບທຸກຢ່າງ.

ມື້ນີ້ muan.la ຈະພາໄປຮູ້ຈັກກັບເສັ້ນທາງຊີວິດຂອງ ແຮ່ນນ້າ ໃນແວດວົງວຽກງານບັນເທີງ ກ່ອນຈະມາເປັນສິລະປິນວົງເກີກຣຸບລະດັບແຖວໜ້າຂອງໄທ.

ແຮ່ນນ້າ ໂລເຊັ່ມບູ້ມ ເກີດເມື່ອປີ 2001 ປັດຈຸບັນອາຍຸ 21 ປີ. ແຮ່ນນ້າ ເປັນລູກຊອດ ລາວ-ອາເມລິກາ ໂດຍແມ່ຂອງແຮ່ນນ້າເປັນຄົນລາວ ແລະ ພໍ່ເປັນຄົນອາເມລິກາ. ແຮ່ນນ້າ ເກີດ ແລະ ເຕີບໃຫຍ່ຢູ່ ບາງກອກ ປະເທດໄທ ໄດ້ຮຽນຊັ້ນປະຖົມປີທີ 1 ຢູ່ນັ້ນ ກ່ອນທີ່ຈະຍ້າຍມາຢູ່ລາວພ້ອມກັບຄອບຄົວ ເມື່ອອາຍຸໄດ້ 8 ປີ.

ພາບ: @hannah_kmz / Instagram

ຊີວິດໃນວົງການບັນເທີງລາວ

ຕອນອາຍຸ 14 ປີ, ແຮ່ນນ້າເຄີຍເຂົ້າປະກວດຮ້ອງເພງ ເຊິ່ງຕອນນັ້ນກໍຍັງຮ້ອງເພງບໍ່ເປັນ ແລະ ອີກ 1 ປີຕໍ່ມາກໍໄດ້ກັບໄປແຂ່ງຂັນອີກຄັ້ງໜຶ່ງ ແລະ ໃຊ້ເພງເກົ່າຄືກັບປີກ່ອນຈົນສາມາດຜ່ານເຂົ້າຮອບ 30 ຄົນສຸດທ້າຍ.

ນອກຈາກການຮ້ອງເພງແລ້ວ ແຮ່ນນ້າ ຍັງມັກການເຕັ້ນອີກດ້ວຍ. ໃນການແຂ່ງຂັນເຕັ້ນ Cover K-Pop ມັກຈະເຫັນແຮ່ນນ້າ ແລະ ກຸ່ມໝູ່ເຂົ້າຮ່ວມການແຂ່ງຂັນ ແລະ ແນ່ນອນກໍໄດ້ລາງວັນຕິດໄມ້ຕິດມືກັບບ້ານຢູ່ເລື້ອຍໆ.

ອີກໜຶ່ງຢ່າງທີ່ເຮັດໃຫ້ ແຮ່ນນ້າ ກາຍເປັນທີ່ຮູ້ຈັກຫຼາຍຂຶ້ນ ກໍແມ່ນການເຂົ້າປະກວດ Miss Teen Laos 2019 ເຊິ່ງຕອນນັ້ນ ແຮ່ນນ້າຍັງຮຽນຢູ່ມັດທະຍົມປາຍ ແລະ ອາຍຸພຽງ 18 ປີ. ການປະກວດຄັ້ງນັ້ນ ແຮ່ນນ້າ ປະສົບຄວາມສຳເລັດດ້ວຍການຍາດໄດ້ລາງວັນຮອງຊະນະເລີດອັນດັບ 2.

ນອກຈາກການຮ້ອງເພງ, ການເຕັ້ນ ແລະ ການປະກວດຕ່າງໆແລ້ວ, ແຮ່ນນ້າ ກໍຍັງສາຍແວວເລື່ອງການສະແດງນຳອີກ. ແຮ່ນນ້າ ເຄີຍສະແດງຊີຣີລາວມາແລ້ວຫຼາຍເລື່ອງ ທີ່ໂດດເດັ່ນກໍແມ່ນ Diary Love 2 ເມື່ອປີ 2019 ເປັນຕົ້ນ.

ສ່ວນໃນປີ 2021, ແຮ່ນນ້າ ໄດ້ພິສູດຄວາມສາມາດດ້ານການສະແດງອີກຄັ້ງໜຶ່ງ ກັບບົດບາດຂອງ “ແມວ” ໃນຊີຣີ “One Love ກູໂຫດໃດ ມຶງໄຫວຫວາ” ໂດຍໄດ້ບົດເປັນນັກຮຽນມັດທະຍົມ ຄູ່ກັບ “ເມກ” ທີ່ຮັບບົດໂດຍ ເບີ່ດີ້ ອິນທະລັງສີ ທີ່ແຟນຊີຣີ່ຕ່າງກໍລົງຄວາມເຫັນວ່າເຄມີເຂົ້າກັນ ຈົນກາຍເປັນອີກໜຶ່ງຄູ່ຈິ້ນໃນຂະນະນັ້ນ.

ພາບ: @hannah_kmz / Instagram

ນອກຈາກຊີຣີ່ແລ້ວ, ແຮ່ນນ້າ ຍັງໄດ້ຮັບບົດນັກສະແດງນຳໃນຮູບເງົາລາວທີ່ຍັງບໍ່ທັນໄດ້ເຂົ້າສາຍ ຢ່າງເລື່ອງ “Signal” ໂດຍຜູ້ກຳກັບຊື່ດັງຂອງລາວຢ່າງ ລີ ພົງສະຫວັນ. ຮູບເງົາເລື່ອງນີ້ດຳເນີນການຖ່າຍທຳສຳເລັດແລ້ວ ແຕ່ເນື່ອງຈາກສະຖານະການການແຜ່ລະບາດຂອງພະຍາດໂຄວິດ ຈຶ່ງຍັງບໍ່ທັນມີການເຂົ້າສາຍໃນໂຮງເທື່ອ ເຮັດໃຫ້ແຟນຮູບເງົາ ແລະ ແຟນຂອງແຮ່ນນ້າ ກໍຍັງຄົງລໍຖ້າທີ່ຈະໄດ້ຊົມຮູບເງົາເລື່ອງນີ້ກັນອີກຕໍ່ໄປ.

ເປີດໂຕໃນຖານະສະມາຊິກ 4EVE

ແຮ່ນນ້າ ບໍ່ເຄີຍທີ່ຈະຢຸດຢູ່ບ່ອນເກົ່າ ເພາະຫຼັງຈາກທີ່ທາງ Workpoint ມີການປະກາດເປີດໂປຣເຈັກຄົ້ນຫາເກີກຣຸບໃໝ່ຂອງໄທໃນລາຍການ Girl Group Star ເຊິ່ງເປີດໂອກາດໃຫ້ສາວໆທີ່ມີຄາແຣັກເຕີທີ່ໂດດເດັ່ນແຕກຕ່າງກັນ ແລະ ເດີນຕາມຫາຄວາມຝັນຂອງຕົວເອງ ຈາກການສະແດງຄວາມສາມາດທີ່ບໍ່ແມ່ນແຕ່ຮ້ອງ, ເຕັ້ນ, ແຣັບ ເພື່ອເຂົ້າເປັນໜຶ່ງໃນສະມາຊິກຂອງ 4EVE, ຫຼັງຈາກທີ່ຈົບການສຶກສາຊັ້ນມັດທະຍົມຢູ່ລາວ ແຮ່ນນ້າ ກໍບໍ່ໄດ້ລໍຊ້າ ສະໝັກເຂົ້າຮ່ວມຄັດເລືອກໃນໂປຣເຈັກດັ່ງກ່າວນີ້ທັນທີ. ຜົນທີ່ໄດ້ຮັບກໍເປັນໄປຕາມຄາດ, ສັກກະຍະພາບຂອງແຮ່ນນ້າໄດ້ຕ້ອງຕາຄະນະກຳມະການ ຈົນສາມາດຜ່ານເຂົ້າເປັນເດັກຝຶກ 20 ຄົນສຸດທ້າຍ ຈາກຜູ້ສະໝັກຫຼາຍກວ່າ 1,000 ຄົນ!

ພາບ: Girl Group Star / Facebook

ຈາກການເປັນເດັກຝຶກ ແຮ່ນນ້າ ສາມາດສ້າງປະຫວັດໜ້າໃໝ່ໃຫ້ໂຕເອງໄດ້ອີກຄັ້ງ ດ້ວຍການເດບິວເປັນໜຶ່ງໃນສະມາຊິກ 7 ຄົນຂອງວົງ 4EVE ແລະ ກ້າວເຂົ້າສູ່ເສັ້ນທາງໄອດໍ້ແຫ່ງວົງການ T-POP ຢ່າງເຕັມໂຕດ້ວຍຄວາມພາກພູມ.

ຄວາມສຳເລັດຂອງແຮ່ນນ້າໃນຄັ້ງນີ້ຜ່ານການຝຶກຝົນ ແລະ ພະຍາຍາມມາຢ່າງໜັກ ເຊິ່ງມັນກໍໄດ້ພິສູດໃຫ້ເຮົາເຫັນຜ່ານຜົນງານຂອງ 4EVE ທີ່ປ່ອຍອອກມາເລື້ອຍໆ ແລະ ຖືກຕອບຮັບເປັນຢ່າງດີຈາກແຟນໆ ແລະ ແຮ່ນນ້າ ກໍຖືກຈັບຕາໃນຖານະສິລະປິນໄວໜຸ່ມທີ່ມາແຮງອີກຄົນໜຶ່ງທັງໃນລາວ ແລະ ໄທ.

ພາບ: @hannah_kmz / Instagram

ກ້າວສູ່ວົງການລະຄອນໄທ

ຫຼ້າສຸດໄດ້ມີການບວງສວງລະຄອນໄທເລື່ອງໃໝ່ ໃນຊື່ “ແມ່ສື່ໂລໂຊ” ລະຄອນແນວໂຣແມນຕິກຄອມເມດີ ເຊິ່ງມີແຜນຈະອອກອາກາດທາງຊ່ອງ Workpoint ຂອງໄທ, ໃນນີ້ ແຮ່ນນ້າ ກໍປາກົດໂຕເປັນໜຶ່ງໃນນັກສະແດງຂອງລະຄອນເລື່ອງນີ້ ໂດຍປະກົບຄູ່ກັບ “ພູມ” ແຫ່ງວົງ ATLAS ໜຸ່ມສິລະປິນລູກຊອດໄທ-ຫວຽດນາມ ເຊິ່ງໃນຕອນນີ້ຍັງບໍ່ທັນມີການເປີດເຜີຍຂ້ໍມູນກ່ຽວກັບບົດທີ່ ແຮ່ນນ້າ ຈະໄດ້ຮັບວ່າ ເປັນບົດແບບໃດ.

ທັງໝົດນັ້ນກໍຄືເລື່ອງລາວຂອງ ແຮ່ນນ້າ ສິລະປິນໄວໜຸ່ມຜູ້ມີໄຟອັນແຮງກ້າທີ່ຈະເຮັດສິ່ງໃໝ່ໆໃນວົງການບັນເທີງຂອງລາວ ແລະ ໄທ ຈົນໄດ້ກ້າວເຂົ້າມາເປັນທີ່ຈັບຈ້ອງແຟນໆໃນຖານະສິລະປິນຜູ້ທີ່ມີສັກກະຍະພາບ ແລະ ຄວາມສາມາດທີ່ໜ້າຈັບຕາ. ເສັ້ນທາງຂອງແຮ່ນນ້າໃນອຸດສາຫະກຳບັນເທີງໄທ ແລະ ລາວ ຈະເປັນແນວໃດນັ້ນ ເຮົາເຊື່ອວ່າ ແຮ່ນນ້າ ຍັງມີ “ຂອງ” ອີກຫຼາຍຢ່າງທີ່ລໍຖ້າ “ປ່ອຍ” ອອກມາໃຫ້ເຮົາໄດ້ເຫັນກັນໃນບົດຕໍ່ໆໄປຂອງເສັ້ນທາງສາຍນີ້.

ໂດຍ: ທີມຂ່າວບັນເທີງ muan.la

ອ້າງອີງ: