ສົມຄວາມຕັ້ງໃຈ "ຈຽບ ມະນີພອນ" ກ້າວສູ່ວົງການບັນເທີງເຕັມໂຕ ໃນຖານະສິລະປິນ First Modeling
ຫຼັງຈາກປ່ອຍຜົນງານຖ່າຍແບບ ແລະ ການສະແດງໃຫ້ໄດ້ຮັບຊົມ! ຈຽບ ມະນີພອນກໍກາຍເປັນສິລະປິນນ້ອງໃໝ່ທີ່ຖືກຈັບຈ້ອງ ເພາະໄດ້ຝາກຜົນງານການສະແດງໃນປີ 2020 ເຖິງ 2 ເລື່ອງຄື ຊີຣີປະຕິຫານດອກໄມ້ ແລະ V-Series ແຖມຍັງກ້າວເປັນນາງເອກຊີຣີອີກເດີ້ ບໍ່ໄດ້ທຳມະດາ. ອໍຣ່າຄວາມງາມຈັບ ນັບມື້ຍິ່ງງາມຂຶ້ນ ແລະ ຫຼ້າສຸດກໍເດີນຕາມເສັ້ນທາງໃນວົງການບັນເທີງເປັນທີ່ຮຽບຮ້ອຍ ເມື່ອ ສາວຈຽບ ດີກຣີສາວງາມໜ້າອ່ອນກວ່າໄວ ແລະ ຂວັນໃຈມະຫາຊົນ ໃນເວທີ Miss Laos 2019 ໄດ້ກ້າວໂຕສູ່ນັກສະແດງ-ນາງແບບຂອງຄ້າຍໃຫຍ່ First Modeling. ເວົ້າໄດ້ວ່າເປັນການຕ້ອນຮັບນ້ອງໃໝ່ມີສີມືດີ ເພັດເມັດງາມເສີມທັບໃນໂມເດລິງອີກຄົນ.
ສຳລັບຈຽບປັດຈຸບັນ ອາຍຸ 24 ປີ, ຈົບການສຶກສາທີ່ສະຖາບັນທະນາຄານ ສາຂາການເງິນ-ການບັນຊີ ເຮັດວຽກຢູ່ສະຕ໊າໂທລະຄົມ. ປົກກະຕິສາວຈຽບເປັນຄົນງ່າຍໆ, ສະບາຍສະບາຍ ບາງທີກໍ່ຕະຫລົກ. ເວລາວ່າງ ຈຽບມັກເຮັດກິດຈະກຳ ເຮັດອາຫານ, ຫລິ້ນກິລາ, ຖ່າຍຮູບຫລິ້ນ.
ມາເວົ້າດ້ານຜົນງານກັນແດ່ ສຳລັບ ຈຽບ ມະນີພອນ ເປັນນາງງາມ ແລະ ນັກສະແດງ ທີ່ເລີ່ມມີຜົນງານມາເລື້ອຍໆ ຫຼັງຈາກປະຕິບັດໜ້າທີ່ນາງສາວລາວຄົບ 1 ປີ ເຕັມ ຈຽບກໍເດີນສາຍບັນເທີງ ທັງອອກງານ, ຖ່າຍແບບ, ຖ່າຍຊີຣີ. ນັບວ່າເປັນບາດກ້າວທີ່ດີຂອງຈຽບ ແລະ ອີກບໍ່ດົນຄົງມີຜົນງານໃຫ້ທຸກຄົນຕິດຕາມຢ່າງແນ່ນອນ.
ສຳລັບໃຜຢາກຕິດຕາມຜົນງານ ແລະ ການເຄື່ອນໄຫວຂອງສາວຈຽບກົດຕິດຕາມໄດ້ເລີຍທີ່ເຟສບຸກສ່ວນຕົວ: Jieb Singhaxaiyaseng ແລະ ຊ່ອງຢູທູບ: ເຮັດຫຍັງກະເຮັດ Hed y ka hed ແລ້ວແຕ່
