ເກີດແລ້ວເດີ້! ລູກຂອງພໍ່ໂອລ້າ BLACKEYES ແລະ ແມ່ກະຕ່າຍ ພ້ອມເຜີຍຊື່ແທ້ ແລະ ນໍ້າໜັກຕອນເກີດ

ຍິນດີຕ້ອນຮັບສະມາຊິກໃໝ່ໃນຄອບຄົວເດີ້! ນັບວ່າເປັນອີກມື້ທີ່ດີ ໃນຄອບຄົວສຸດອົບອຸ່ນຂອງພໍ່ ໂອລ້າ BLACKEYES ນັກຮ້ອງລາວຊື່ດັງ ແລະ ແມ່ກະຕ່າຍ ມະໂນທິບ. ໃນທີ່ສຸດມື້ທີ່ທັງ 2 ລໍຖ້າກໍມາເຖິງແລ້ວ. ພັນລະຍາຂອງໂອລ້າໄດ້ໃຫ້ກຳເນີດລູກຊາຍຄົນທຳອິດ ໃນວັນທີ 12 ທັນວາ 2020 ທີ່ຜ່ານມາ, ເວລາ 18:55 ໂມງ, ເຊິ່ງທັງ ແມ່ ແລະ ເດັກ ແມ່ນປອດໄພ ແລະ ແຂງແຮງດີ. ພ້ອມຕັ້ງຊື່ແລ້ວເດີ້ ລູກຊາຍຄົນນີ້ ຊື່ວ່ານ້ອງ ເຣໂດ້ ( REDO ) ມີນ້ຳໜັກ 3270 ກຣາມ.

ພໍ່ມືໃໝ່ປ້າຍແດງຢ່າງໂອລ້າ ກໍດີໃຈສຸດໆ ພ້ອມເຜີຍພາບຄວາມປະທັບໃຈ ແລະ ບັນລະຍາຍໃນແຄັບຊັນຜ່ານເຟສບຸກສ່ວນຕົວວ່າ "ໝາກກະດອງໃຈອອກມາເເລ້ວ ຂອບໃຈທີ່ມາຕື່ມເຕັມຄວາມຮັກໃຫ້ເຮົາ" 

ຫຼັງຈາກພໍ່ໂອລ້າໂພສພາບຕົນ ພ້ອມພັນລະຍາ ແລະ ແອນ້ອຍທີ່ແສນໜ້າຮັກລົງ. ແນ່ນອນວ່າ ບັນດາຄົນໃນວົງການບັນເທີງກໍບໍ່ພາດທີ່ຈະມາສະແດງຄວາມຍິນດີນຳ ເຊິ່ງຕ້ອງບອກເລີຍວ່າພີ່ນ້ອງ, ຄອບຄົວ, ແຟນຄລັບ ລວມເຖິງຄົນໃນວົງການບັນເທີງຕ່າງກໍຕິດຕາມກັນມາໂດຍຕະຫຼອດ ພ້ອມທັງຮ່ວມລຸ້ນ ແລະ ຕື່ນເຕັ້ນໄປນຳ. ທັງນີ້ ທີມ​ງານຂ່າວ muan.la ກໍຂໍ​ສະແດງ​ຄວາມ​ຍິນ​ດີ​ນຳເດີ້!

ດັ່ງທີ່ຫຼາຍຄົນຮູ້ວ່າໜຸ່ມໂອລ້າໄດ້ສະລະໂສດ ແລະ ເຂົ້າພິທີວິວາຕັ້ງແຕ່ວັນທີ 18 ທັນວາ ປີ 2016. ເຊິ່ງນັກຮ້ອງນຳວົງ BLACKEYES ເຈົ້າຂອງຜົນງານເພງດັງ ບໍ່ຢາກໄດ້ຍິນ ໄດ້ຕົກລົງປົງໃຈໃຊ້ຊີວິດຄູ່ກັບ "ກະຕ່າຍ ມະໂນທິບ" ເຈົ້າຂອງທຸລະກິດກະເປົາແບຣນເນມລາວ ຊື່ດັງ NAREE. ທັງສອງຄົບຫາກັນມາດົນນານຫຼາຍຟ້າຫຼາຍປີ ນັບແຕ່ມື້ນັ້ນຈົນມາເຖິງມື້ນີ້ ນັບມື້ຍິ່ງຮັກກັນ ແລະ ເຕີມຄວາມຫວານຢູ່ຕະຫຼອດ ແລະ ຕອນນີ້ກໍໄດ້ກາຍເປັນຄອບຄົວທີ່ສົມບູນແລ້ວ ພໍ່, ແມ່ ແລະ ລູກ.

ເອົາລະໄປເບິ່ງພາບຄວາມໜ້າຮັກຂອງລູກຊາຍ ພໍ່ໂອລ້າ-ແມ່ກະຕ່າຍ ແລະ ຮູບຄອບຄົວນີ້ ພ້ອມກັນເລີຍທີ່ອາລະບໍ້າດ້ານລຸ່ມ: