5 ກິດຈະກຳຍາມວ່າງສຸດຄັກ ທີ່ເຮັດໃຫ້ CV ຂອງເຈົ້າພິເສດ ມີໂອກາດໄດ້ວຽກ
ສະໜັບສະໜູນເນື້ອຫາ
ກວ່າຈະຜ່ານດ່ານມະຫາໂຫດເປັນຜູ້ຖືກເລືອກໃຫ້ໄດ້ໄປຕໍ່ ເຈົ້າມີຄູ່ແຂ່ງເປັນສິບເປັນຮ້ອຍຄົນ ທີ່ສະໝັກວຽກຕຳແໜ່ງດຽວກັນກັບເຈົ້າ ສິ່ງທີ່ທຳອິດທີ່ຝ່າຍບຸກຄະລາກອນ ຫຼື HR ຈະພິຈາລະນາກໍຄື “ເຣຊູເມ່” (Resume) ຫຼື CV ເຊິ່ງພວກເຂົາຈະໄລ່ເບິ່ງຂໍ້ມູນວ່າເຈົ້າເປັນໃຜ, ມາຈາກໃສ, ຮຽນຈົບຫຍັງມາ ມີຄວາມສາມາດພິເສດຫຍັງ ແລະ ເຄີຍເຂົ້າຮ່ວມກິດຈະກຳເສີມທັກສະອື່ນໆນຳ ຫຼື ບໍ່? ອີກສິ່ງທີ່ເຈົ້າຄວນລະບຸລົງໄປນຳກໍຄື “ກິດຈະກຳຍາມວ່າງ” (Hobbies).
ເປັນຫຍັງກິດຈະກຳຍາມວ່າງຈຶ່ງສຳຄັນຕໍ່ການສະໝັກວຽກ (ແລະໄດ້ວຽກ) ກໍເພາະມັນເປັນສິ່ງທີ່ສະແດງຕົວຕົນແລະສະແດງຄວາມສົນໃຈໃຄ່ຮູ້ໃນສິ່ງຕ່າງໆຂອງເຈົ້າ ຫາກມີຜູ້ສະໝັກຫຼາຍຄົນທີ່ມີຄຸນສົມບັດໃກ້ຄຽງກັນ ກິດຈະກຳຍາມວ່າງທີ່ສະດຸດຕາ HR ນີ້ແຫຼະທີ່ຈະເຮັດໃຫ້ HR ເລືອກເຈົ້າມາພິຈາລະນາອີກເທື່ອ ແລ້ວຕັດສິນໃຈເອີ້ນສຳພາດວຽກ.
ແລ້ວມີກິດຈະກຳຍາມວ່າງຫຍັງແດ່ທີ່ພໍຈະເຕະຕາ HR ໃຫ້ເຈົ້າເປັນຜູ້ທີ່ຖືກເລືອກ? ພວກເຮົາລວບລວມໄວ້ໃຫ້ແລ້ວ.
1. ມັກຮຽນພາສາ
ຄົນທີ່ມີຄວາມສົນໃຈດ້ານພາສາເປັນທຶນເກົ່າມີໄຊແລ້ວເກີນເຄິ່ງ ຖ້າເຈົ້າສາມາດສື່ສານໄດ້ຫຼາຍກວ່າ 2 ພາສາ ຄື: ໄທ ແລະ ອັງກິດ ມີພາສາທີ 3, 4, 5 ໃນເຣຊູເມ່ນຳແລ້ວ, ໂອກາດທີ່ HR ຈະຈັບເຣຊູເມ່ຂອງເຈົ້າມາເບິ່ງອີກຮອບມີຢູ່ສູງຫຼາຍ ໂດຍສະເພາະຖ້າເຈົ້າໄດ້ພາສາແປກໆ ແບບທີ່ມີບໍ່ຈັກຄົນຈະຄິດຮຽນ, ໄດ້ຈັກພາສາກໍໃສ່ລົງໄປໃຫ້ໝົດ. ເຊື່ອໄດ້ເລີຍວ່າບໍລິສັດຕ້ອງເກັບເຈົ້າເຂົ້າອ້ອມສຳພາດແນ່ ເພາະທ່ານມີໂອກາດຈະໄດ້ໃຊ້ປະໂຫຍດຈາກທັກສະທາງພາສາຂອງເຈົ້າ ສິ່ງສຳຄັນອີກຂໍ້ກໍຄື ເບິ່ງຊົງແລ້ວເຈົ້າໜ້າຈະມີທັກສະການສື່ສານ ຫຼື ຕິດຕໍ່ປະສານງານທີ່ດີ ຫຼື ເວົ້າຈາພາສາຄົນຮູ້ເລື່ອງນັ້ນເອງ.
2. ມີດົນຕີໃນຫົວໃຈ
ຄາດບໍ່ເຖິງແມ່ນບໍວ່າ ຄົນທີ່ມີກິດຈະກຳຍາມວ່າງທີ່ກ່ຽວກັບດົນຕີຈະມີໂອກາດຖືກຕາຕ້ອງໃຈຝ່າຍ HR ໄດ້ຄືກັນ? ເນື່ອງຈາກຄົນທີ່ມີດົນຕີໃນຫົວໃຈສະແດງໃຫ້ເຫັນວ່າເຈົ້າມີອາລົມສຸນທະລີ, ໃຈເຢັນ, ເຂົ້າກັບຄົນອື່ນໄດ້ດີ ສາມາດສ້າງຄວາມສຸກໃຫ້ຕົນເອງ ແລະ ຜູ້ຄົນອ້ອມຂ້າງໄດ້ HR ອາດຕຽມໝາຍຕາ ດຶງເຈົ້າໄປຊ່ວຍກິດຈະກຳສັງສັນຂອງອົງກອນແລ້ວກໍໄດ້ ເຊິ່ງກໍຄືກິດຈະກຳພັກຜ່ອນຢ່ອນໃຈທັງຫຼາຍທັງປວງ.
3. ແຕ້ມຮູບ ຖ່າຍພາບ
ກິດຈະກຳຍາມວ່າງດ້ານສິລະປະເປັນສິ່ງທີ່ບົ່ງບອກຄວາມໃນໃຈຂອງເຈົ້າໄດ້ດີທີ່ສຸດ ເພາະງານສິລະປະເປັນສິ່ງທີ່ເຈົ້າຖ່າຍທອດອອກມາຈາກອາລົມຄວາມຮູ້ສຶກຂອງເຈົ້າ ປະສົມເຂົ້າກັບຈິນຕນາການແລະຄວາມຄິດສ້າງສັນ ຫາກເຈົ້າເປັນຄົນມັກຖ່າຍພາບ ກໍມີໂອກາດທີ່ເຈົ້າຈະເຮັດວຽກກຣາຟິກເປັນດ້ວຍ (ຈາກການຕັດແຕ່ງພາບຕ່າງ ໆ) ທີ່ສຳຄັນ ຜົນງານເຫຼົ່ານັ້ນຍັງບອກໄດ້ວ່າເຈົ້າເປັນຄົນທີ່ມີຄວາມອົດທົນຂ້ອນຂ້າງສູງ, ປັບໂຕໄດ້ ແລະ ໃຈເຢັນ. ສະນັ້ນ ຖ້າຕຳແໜ່ງວຽກຂອງເຈົ້າມາທາງສາຍຄຣີເອທີຟນຳແລ້ວ ມີຄວາມສາມາດຫຍັງກໍງັດໄປໂຊເລີຍ ແນບຜົນງານໄປນຳກໍຈະດີຫຼາຍ.
4. ຫຼິ້ນເກມ
ເຖິງຈະຕິດເກມແຕ່ວຽກງານກໍເຮັດນະຮູ້ຍັງ ໃຄຣວ່າການຕິດເກມຈະບໍ່ມີຂໍ້ດີເລີຍ ເຊິ່ງໃນທີ່ນີ້ກໍບໍ່ໄດ້ເຖິງເກມຄອມພິວເຕີ ຫຼື ເກມໂທລະສັບພຽງຢ່າງດຽວ ເພາະບອດເກມ (board game) ກໍຄືເກມຄືກັນ. ຄົນທີ່ມັກການຫຼິ້ນເກມນັ້ນຈະຖະໜັດເລື່ອງການວາງແຜນ, ວາງກົນລະຍຸດ, ມີຄວາມອົດທົນສູງ, ຊັງການເສຍໄຊ ຈຶ່ງບໍ່ແມ່ນຄົນທີ່ຈະຍອມຖອດໃຈງ່າຍໆ. ຫຼວມທັງຕ້ອງພະຍາຍາມຄິດຢ່າງຖີ່ຖ້ວນວ່າຕ້ອງເຮັດແນວໃດຈຶ່ງຈະຊະນະເກມ, ຄິດຢ່າງລະມັດລະວັງ ແລະ ຮອບຄອບກ່ອນຈະລົງມືເຮັດ (ຖ້າບໍ່ຮອບຄອບກໍເສຍຕິລະ) ຕໍ່ໃຫ້ບໍ່ຊະນະເຈົ້າກໍຈະພະຍາຍາມໄປເລື້ອຍໆ ບໍ່ຍອມເສຍດອກ.
5. ຫຼົງໃຫຼໃນກີລາຜາດໂຜນ
ຫຼິ້ນກີລາທຳມະດາໆ ໃຜກໍເຮັດໄດ້ ເພາະສະນັ້ນ ກິດຈະກຳຍາມວ່າງຫຼືຄວາມສາມາດພິເສດດ້ານກີລາທົ່ວ ໆ ໄປມັນບໍ່ວ້າວອີກຕໍ່ໄປແລ້ວ (ເວັ້ນແຕ່ເຈົ້າຈະເປັນນັກກີລາທີມຊາດ ຫຼື ເຄີຍແຂ່ງຂັນຊະນະລະດັບປະເທດ, ລະດັບພາກພື້ນ, ລະດັບທະວີບ ຫຼື ລະດັບໂລກມາ). ແຕ່ຖ້າເຈົ້າມັກຫຼິ້ນກີລາຜາດໂຜນແລ້ວ, ປະຫວັດໃນເຣຊູເມ່ເຈົ້າຈະໜ້າສົນໃຈຂຶ້ນອີກຫຼາຍເລີຍ ເພາະບໍ່ແມ່ນທຸກຄົນທີ່ຈະຫຼົງໃຫຼກີລາສ່ຽງຕາຍແບບນີ້. ສິ່ງທີ່ໄດ້ຈາກກີລາຜາດໂຜນນີ້ HR ຈະຕີລາຄາວ່າ ເຈົ້າເປັນຄົນທີ່ກ້າໄດ້ກ້າເສຍ ຮູ້ວ່າສ່ຽງແຕ່ຄົງຕ້ອງຂໍລອງ, ກ້າຕັດສິນໃຈ ແລະມີຄວາມເປັນຜູ້ນຳຢູ່ພໍສົມຄວນ.
ຂໍຂອບໃຈ
ຂໍ້ມູນ : tonkit via sanook
