ວັນອັງຄານ ທີ 11 ສິງຫາ 2020

ຖ້າເຈົ້າບໍ່ອ່ານບົດຄວາມນີ້ກ່ອນໄປ "ພູຫົວໂລ້ນ" ແຂວງໄຊສົມບູນ ເຈົ້າຈະຕ້ອງເສຍໃຈຕາມຫຼັງ

ຖ້າເຈົ້າບໍ່ອ່ານບົດຄວາມນີ້ກ່ອນໄປ "ພູຫົວໂລ້ນ" ແຂວງໄຊສົມບູນ ເຈົ້າຈະຕ້ອງເສຍໃຈຕາມຫຼັງ
S! Muan

ສະໜັບສະໜູນເນື້ອຫາ

ກະແສ #ລາວທ່ຽວລາວ ຫຼັງຈາກທີ່ການລະບາດຂອງພະຍາດໂຄວິດ-19 ໃນລາວຜ່ອນຄາຍລົງ ເຮັດໃຫ້ຄົນລາວຫັນມາທ່ອງທ່ຽວພາຍໃນປະເທດຫຼາຍຂຶ້ນ (ເພາະເຖິງວ່າຢາກໄປຕ່າງປະເທດກໍໄປບໍ່ໄດ້ຢູ່ດີ ຮະຮະ). ຕອນນີ້ຈຶ່ງກາຍເປັນວ່າ ໃດທີ່ບໍ່ເຄີຍເຫັນບໍ່ເຄີຍພົບ ກໍຜຸດຂຶ້ນມາໃໝ່ເປັນດອກເຫັດ ທັງເໜືອ-ກາງ-ໃຕ້ ມີຄົນນຳເອົາມາຣີວິວຕ່າງໆນານາ ຊວນໃຫ້ຈິດໃຈຂອງຜູ້ພົບເຫັນມີຄວາມຢາກໄປທ່ຽວຢູ່ຮຸ່ມໆ.

ທີ່ເຫັນຫຼາຍໃນເຟສບຸກກໍຄົງບໍ່ພົ້ນ "ພູຫົວໂລ້ນ" ເຊິ່ງເປັນຊື່ທີ່ຊາວເນັດຕັ້ງໃຫ້. ພູດັ່ງກ່າວນີ້ຕັ້ງຢູ່ໃນເຂດຜາກະຕ່າຍ ເມືອງອະນຸວົງ ເມືອງເອກຂອງແຂວງໄຊສົມບູນ ທີ່ຫຼາຍຄົນກໍຂະໜານນາມໃຫ້ເປັນ "ສະວິດເຊີແລນແຫ່ງເມືອງລາວ" ໃນຂະນະທີ່ອີກຫຼາຍຄົນກໍບອກວ່າ ເປັນຫຍັງຕ້ອງມາຕັ້ງຊື່ຕາມປະເທດອື່ນ ບອກວ່າເປັນພູຫົວໂລ້ນແຫ່ງແຂວງໄຊສົມບູນກໍໄດ້ແລ້ວ. ເອົາເປັນວ່າ ຈິດໃຈໃຜມັນນໍຢາກຮ້ອງຫຍັງກໍວ່າກັນໄປຕາມສະດວກ. ແຕ່ໃນບົດຄວາມນີ້ເຮົາຈະບໍ່ມາຖຽງກັນເລື່ອງນັ້ນ ແຕ່ຈະມາບອກວ່າ ກ່ອນໄປພູຫົວໂລ້ນເຮົາຕ້ອງກຽມໂຕຫຍັງແດ່ ເພາະທີ່ຜ່ານມາສ່ວນໃຫຍ່ແມ່ນເຫັນແຕ່ຮູບງາມໆ ແຕ່ຍັງບໍ່ທັນມີໃຜບອກວ່າໄປແລ້ວຈະພົບຫຍັງແດ່. ເວົ້າມາຮອດນີ້ຢ່າຟ້າວພາກັນຢ້ານໃດ! ມັນບໍ່ໄດ້ໜ້າຢ້ານຫຼາຍຂະໜາດນັ້ນ.

ໄປແນວໃດ?

LOCATION: https://goo.gl/maps/datsAJFmQ5y8jEsm9

ພູຫົວໂລ້ນນີ້ແມ່ນຕັ້ງຢູ່ໃນເຂດຊານເມືອງຂອງເມືອງອະນຸວົງ ແຂວງໄຊສົມບູນ ຢູ່ຫ່າງຈາກນະຄອນຫຼວງວຽງຈັນໄປທາງທິດຕາເວັນອອກສ່ຽງເໜືອ ປະມານ 220 ກິໂລແມັດ ໃຊ້ເວລາເດີນທາງປະມານ 5 ຊົ່ວໂມງຈຶ່ງຮອດ. ການເດີນທາງສາມາດໄປໄດ້ທັງລົດສ່ວນຕົວ ແລະ ລົດເມໂດຍສານ (ຖ້າຂຶ້ນຈາກນະຄອນຫຼວງວຽງຈັນ ແມ່ນສາມາດຂຶ້ນໄດ້ທີ່ສະຖານີໂດຍສານສາຍເໜືອ ໂດຍຕະຕາລາງເດີນລົດ ກວດສອບໄດ້ຢູ່ຄິວລົດເລີຍ).

ສ່ວນເສັ້ນທາງອື່ນໆສາມາດເຂົ້າເຖິງເມືອງອະນຸວົງໄດ້ຈາກທາງບ້ານທ່າເຮືອ ເມືອງວັງວຽງ, ທາງມາຈາກເມືອງທ່າໂທມ ແຂວງຊຽງຂວາງ ແລະ ເສັ້ນທາງອື່ນໆອີກ ເຊິ່ງຄວນສຶກສາເສັ້ນທາງໃຫ້ດີກ່ອນອອກເດີນທາງ.

ສຳລັບການເດີນທາງອອກຈາກເຂດນະຄອນຫຼວງວຽງຈັນ ແມ່ນໃຫ້ອອກຈາກເມືອງໄປຕາມທາງເລກທີ 13 ໃຕ້ ເມື່ອໃກ້ຮອດບ້ານທ່າບົກ ເມືອງທ່າພະບາດ ແຂວງບໍລິຄຳໄຊ ຈະມີທາງລ້ຽວຊ້າຍເລາະລຽບໄປຕາມຕີນພູເຂົາຄວາຍ ກໍໃຫ້ເຂົ້າໄປຕາມທາງນັ້ນເລີຍ. ສະພາບເສັ້ນທາງ ກໍຈະມີທັງທາງດິນ ແລະ ທາງຢາງປະປົນກັນໄປ ແລະ ໃນເຂດນີ້ເປັນເຂດພູ ທາງຈຶ່ງມີຄວາມຄົດຄ້ຽວ ແລະ ຊັນແດ່ ສະນັ້ນຕ້ອງໄດ້ໃຊ້ຄວາມລະມັດລະວັງໃນການຂັບຂີ່ ແລະ ອາໄສຄວາມຊຳນານພໍສົມຄວນ.

ຈຸດທີ່ຫົນທາງເລີ່ມຈະເຂົ້າສູ່ເຂດພູຢ່າງແທ້ຈິງແມ່ນເລີ່ມແຕ່ເມືອງຮົ່ມ ແຂວງໄຊສົມບູນ ເປັນຕົ້ນໄປ ເຊິ່ງບອກເລີຍວ່າພູແທ້ພູວ່າ ບໍ່ມີຫຍັງປົນ ໃຜທີ່ເມົາລົດ ແນະນຳໃຫ້ນອນເລີຍຈະດີກວ່າ ຢ່າຫາແນວກິນໃນລົດ ເພາະອາດອອກມາທາງເກົ່າໄດ້! ແຕ່ກໍຈະພາດວິວລະຫວ່າງທາງ ເຊິ່ງຖ້າເປັນຕອນອ່າວເຊົ້າແດ່ກໍຈະຍັງເຫັນໝອກຕາມຈອມພູສູງຕໍ່າຈົນສຸດທາງ ສ້າງຄວາມເບີກບານໃຈໄດ້ບໍ່ໜ້ອຍ.

ພໍແຕ່ຂີ່ລົດກາຍປະຕູເຂົ້າເມືອງທີ່ກຳລັງກໍ່ສ້າງຢູ່ ຈຸດທີ່ຕັ້ງຂອງພູຫົວໂລ້ນຈະຢູ່ກໍ້າຂວາມື ສຳລັບບ່ອນຈອດລົດໃນປັດຈຸບັນແມ່ນເຮົາໄດ້ຈອດຢູ່ເຂດດິນຂອງປະຊາຊົນ ຖ້າໃຜຢາກຈອດລົດຈຸດໃດກ່ອນຂຶ້ນໄປ ກໍແນະນຳໃຫ້ສອບຖາມ ແລະ ຂໍອະນຸຍາດເພິ່ນກ່ອນກໍຈະດີທີ່ສຸດ.

ເວລາໃດທີ່ເໝາະແກ່ການໄປ?

ຕົ້ນລະດູຝົນໄລຍະເດືອນພຶດສະພາຫາກໍລະກົດ ແມ່ນຈະໄດ້ວິວທີ່ງາມ ເພາະຫຍ້າເທິງພູໄດ້ຮັບນໍ້າຝົນ ເຮັດໃຫ້ຂຽວອຸ່ມທຸ່ມ ງາມຕາທີ່ສຸດ. ພ້ອມນີ້ໄລຍະທ້າຍລະດູຝົນປະມານເດືອນຕຸລາຫາພະຈິກ ກໍຍັງໄດ້ຢູ່ ຄວາມຮູ້ສຶກ ແລະ ບັນຍາກາດກໍຄ້າຍໆກັນ. ມີອີກໜຶ່ງໄລຍະທີ່ປະຊາຊົນແນະນຳມາກໍຄື ຍາມໜາວໄລຍະເດືອນທັນວາຫາຕົ້ນເດືອນມັງກອນ ທີ່ອຸນຫະພູມຫຼຸດຕໍ່າລົງ ເຮັດໃຫ້ບາງຄັ້ງເກີດມີນໍ້າຄ້າງແຂງເກາະຍອດຫຍ້າ ກໍຈະໄດ້ຄວາມຮູ້ສຶກອີກແບບ ຄືກັບຫຼົງໄປຢູ່ໃນບ່ອນທີ່ຫິມະຕົກກໍບໍ່ປານ. ສ່ວນໄລຍະຍາມແລ້ງ-ອາກາດຮ້ອນເອົ້ານັບແຕ່ເດືອນກຸມພາຫາເມສາ ສີຫຍ້າກໍຈະອອກເປັນແຫ້ງໆແດ່ ຖ່າຍຮູບອອກມາກໍຈະບໍ່ສົດຊື່ນປານໃດ. ສ່ວນໄລຍະຝົນຕົກເລື້ອຍໆຢ່າງເດືອນສິງຫາ-ກັນຍາ ການເດີນທາງກໍອາດຈະລຳບາກແດ່ ເພາະຝົນຕົກໜັກ ອາດເຮັດໃຫ້ການສັນຈອນຕ້ອງໄດ້ລະມັດລະວັງເປັນພິເສດ ແລະ ໃນບາງຄັ້ງອາດເກີດດິນເຈື່ອນລະຫວ່າງທາງ ສ້າງຄວາມຫຍຸ້ງຍາກແກ່ການເດີນທາງໄປ.

ຕ້ອງກະກຽມຫຍັງແດ່ກ່ອນໄປ?

ຈັບບິກຈັບສໍຂຶ້ນມາແລ້ວຈົດຕາມໄດ້ເລີຍ ຫ້າມຂາດຈັກອັນເດີ ເພື່ອຄວາມສະດວກຂອງຕົນເອງ!

  • ຮ່າງກາຍ: ອັນນີ້ສຳຄັນ ຖ້າໃຜບໍ່ສະບາຍເປັນໄຂ້ເປັນໄອ ບໍ່ຄວນຂຶ້ນ ເພາະອາດຈະເປັນໜັກກວ່າເກົ່າໄດ້. ຖ້າໃຜທີ່ມັກຍ່າງ, ແລ່ນ ຫຼື ອອກກຳລັງກາຍເປັນປະຈຳຈະໄດ້ປຽບ ເພາະນີ້ເປັນການປີນພູ ເຖິງວ່າຈະບໍ່ຄືພູໃນມະໂນຈິດຂອງເຮົາກໍຕາມ ແຕ່ມັນກໍຍັງມີຄວາມຊັນ ແລະ ຕ້ອງໄດ້ຍ່າງເອງ ບໍ່ມີອຸປະກອນພາຂຶ້ນໄປຈົນຮອດຈອມພູບ່ອນທີ່ງາມສຸດໄດ້! ອີກຢ່າງແມ່ນ ພູທີ່ເຮົາຂຶ້ນໄປບໍ່ແມ່ນພູຕໍ່າໆເດີ ຕ້ອງໄດ້ຍ່າງຂຶ້ນໄປສູງເຕີບໜຶ່ງຈຶ່ງຈະຮອດຈຸດສູງສຸດທີ່ແນມເຫັນວິວງາມໆໄດ້.
  • ນໍ້າດື່ມ: ຄວນຖືນໍ້າດື່ມໃສ່ກະຕຸກນ້ອຍໆຂຶ້ນໄປນຳ ເພາະເມື່ອເຮົາປີນຂຶ້ນໄປ ຮ່າງກາຍຈະຂາດນໍ້າໄດ້ ສະນັ້ນການຈິບນໍ້າລະຫວ່າງທາງ ສາມາດຊ່ວຍເພີ່ມພະລັງ ແລະ ເຮັດໃຫ້ສົດຊື່ນຂຶ້ນໄດ້.
  • ຄຣີມກັນແດດ ຫຼື ອຸປະກອນປ້ອງກັນແສງແດດອື່ນໆ: ອັນນີ້ສຳຄັນເລີຍ ເປັນໄປໄດ້ ຄວນທາຄຣີມກັນແດດທັງໃບໜ້າ, ແຂນ, ຂາ ແລະ ລຳຄໍ ເພື່ອປ້ອງກັນລັງສີຢູວີທີ່ອາດທຳຮ້າຍຜິວໄດ້. ຂັ້ນຕໍ່ມາແມ່ນໃສ່ເສື້ອທີ່ປົກປິດຮ່າງກາຍ, ໃສ່ໝວກ ຫຼື ຖືຄັນຮົ່ມຂຶ້ນໄປນຳ ກໍຊ່ວຍໄດ້ຫຼາຍ. ອັນນີ້ຢ່າຫາວ່າບໍ່ເຕືອນ ເພາະເທິງພູບໍ່ມີຫຍັງມາບັງແດດໃຫ້ເຮົາ ແລະ ການຢູ່ກາງແດດເປັນເວລາດົນ ຜິວຈະໄໝ້ໄດ້ (ຜູ້ຂຽນເຈິມາແລ້ວ ແລະ ຮູ້ສຶກເສຍໃຈທີ່ຊິວເກີນໄປ ກັບມາແລ້ວຕ້ອງໄດ້ບຳລຸງຜິວກັນແບບຍາວໆໄປ).

  • ເຄື່ອງນຸ່ງ ແລະ ເກີບທີ່ເຄື່ອນໄຫວສະດວກ: ເຄື່ອງນຸ່ງຄວນເປັນເຄື່ອງນຸ່ງທີ່ລະບາຍຄວາມຮ້ອນໄດ້ດີ ເຊັ່ນຜ້າຝ້າຍເປັນຕົ້ນ ແລະ ຕ້ອງເນັ້ນເຄື່ອງທີ່ເຄື່ອນໄຫວຮ່າງກາຍໄດ້ສະດວກ ບໍ່ມະລຸ່ງຕຸ່ງຕິ່ງຫຼາຍ (ຄິດພາບຄົນທີ່ເຂົ້າປ່າແລ້ວນຸ່ງຈັດເຕັມຄືຢູ່ໃນເມືອງ ກໍບໍ່ໄດ້ເດີ). ສ່ວນເກີບ ບໍ່ຄວນໃສ່ເກີບສຸບ ຫຼື ເກີບແຕະ ຄວນເປັນເກີບຜ້າໃບ ຫຼື ເກີບອື່ນທີ່ຫຸ້ມຕີນໄວ້ຢ່າງດີ ພ້ອມທັງມີພື້ນທີ່ຢຶດເກາະພື້ນໄດ້ດີກໍຈະດີຫຼາຍ.
  • ລະຫວ່າງທາງຂຶ້ນໄປພູມີໂຕທາກ ແລະ ໝາກຫຍ້າຕິດຂາໂສ້ງ: ອັນນີ້ກໍສຳຄັນ ເພາະເຂດລຸ່ມຕີນພູ ປະຊາຊົນຈະປ່ອຍງົວຄວາຍໄປຫາກິນຫຍ້າ ແລະ ໃນເຂດນັ້ນຈະມີໂຕທາກດູດເລືອດນຳ ໃຜຢ້ານທາກກໍໃຫ້ທຳໃຈໄວ້ ເພາະອາດມີໂຕໜຶ່ງ ຫຼື ສອງໂຕເກາະຂາເຈົ້າໃນລະຫວ່າງທີ່ຍ່າງກໍເປັນໄດ້. ສ່ວນໝາກຫຍ້າກໍບໍ່ຕ້ອງຄາດຄິດວ່າຈະບໍ່ຕິດໂສ້ງຂ້ອຍແນ່ນອນ ເພາະທຸກຄົນທີ່ໄປເຈິໝົດ ລົງມາແລ້ວກໍຕ້ອງໄດ້ມາແກະອອກອີກ. ຍາວໆໄປ.
  • ເຄື່ອງແຕ່ງກາຍສີອ່ອນ ຫຼື ສີແກ່ທີ່ຕັດກັບສີຂຽວຂອງຫຍ້າ: ຢ່າຫາເຮັດໃສ່ສີຂຽວໄປເດັດຂາດ ເພາະເວລາຖ່າຍຮູບອອກມາຈະເຮັດໃຫ້ສີເຄື່ອງນຸ່ງກົມກືນໄປກັບສີພື້ນຫຼັງຂອງພູເຊິ່ງເປັນສີດຽວກັນ. ສະນັ້ນເລືອກສີອ່ອນກວ່າ ຫຼື ເຂັ້ມກວ່າຈະເຮັດໃຫ້ໄດ້ຮູບຖ່າຍທີ່ງາມ ຕັດກັບສີພື້ນຫຼັງໄດ້ດີ.
  • ທ່າໂພສຖ່າຍຮູບແບບເລີດໆ: ຂຶ້ນໄປຮອດຈອມພູພັດວ່າເມື່ອຍ ບໍ່ມີອາລົມຊິຖ່າຍຮູບກໍມີ. ສະນັ້ນ ລອງຄິດທ່າໂພສຖ່າຍຮູບໄວ້ກ່ອນກໍດີ ຂຶ້ນໄປຮອດແລ້ວກໍຈັດເຕັມເລີຍ ຮັບຮອງໄດ້ຮູບງາມໆມາໄວ້ອັບລົງໂຊຊຽວຢ່າງແນ່ນອນ.

ຄຸ້ມຄ່າແກ່ການໄປ ຫຼື ບໍ່?

ສຳລັບສາຍທີ່ມັກລຸຍ ມັກຍ່າງ ບໍ່ກ່ຽງໄລຍະທາງ ຄວນໄປ! ເພາະບັນຍາກາດຢູ່ເມືອງນີ້ດີເວີ້ ແບບບໍ່ສາມາດອະທິບາຍເປັນຄຳເວົ້າໄດ້ ຕ້ອງໄດ້ໄປສຳຜັດເອງ. ເປັນເມືອງທີ່ເໝາະແກ່ການພັກຜ່ອນຢ່ອນໃຈ ແລະ ໜີຈາກຄວາມວຸ່ນວາຍໃນເມືອງໃຫຍ່. ແຕ່ສຳລັບໃຜທີ່ບໍ່ມັກຍ່າງ, ເມື່ອຍງ່າຍ ຫຼື ບໍ່ມັກການເດີນທາງຜ່ານພູຜາປ່າດົງ ທຣິບນີ້ອາດບໍ່ເໝາະສຳລັບທ່ານ ຫຼື ຖ້າຢາກໄປ ກໍຕ້ອງໄດ້ກະກຽມຮ່າງກາຍເປັນພິເສດ ເພື່ອຈະບໍ່ໄດ້ເມື່ອຍງ່າຍເວລາຂຶ້ນພູ.

ຄ່າໃຊ້ຈ່າຍໃນທຣິບນີ້ກໍບໍ່ຫຼາຍນອກຈາກຄ່ານຳ້ມັນລົດໄປກັບປະມານເກືອບ 500 ກິໂລແມັດ (ຈາກນະຄອນຫຼວງວຽງຈັນ) ແລ້ວ ອາຫານການກິນໃນເມືອງກໍລາຄາທົ່ວໄປ ຫຼື ຖ້າໃຜຢາກປະຢັດງົບລົງກໍສາມາດກຽມອາຫານໄປກິນເອງໄດ້ (ໃນກໍລະນີໄປກັບ). ສະຫຼຸບແລ້ວທຣິບນີ້ໃຊ້ເງິນໄປກັບການກິນບໍ່ຮອດ 2 ແສນກີບ. ຖ້າໃຜໄປພັກຄ້າງຄືນຢູ່ໃນເມືອງກໍອາດໄດ້ຄິດໄລ່ຄ່າທີ່ພັກເພີ່ມເດີ້.

ສ່ວນເລື່ອງຂອງຮູບວິວທີ່ຖ່າຍອອກມານັ້ນ ຖາມວ່າຄຸ້ມບໍ່? ກໍໃຫ້ຮູບທີ່ຜູ້ຂຽນໄປຖ່າຍມາເອງ ເປັນຄຳຕອບສຳລັບຄຳຖາມນີ້ສາ!

ໝາຍເຫດໂຕໃຫຍ່ໆ: ໃນລະຫວ່າງການຂຶ້ນພູ ເພື່ອຮັກສາສິ່ງແວດລ້ອມໃຫ້ສວຍງາມ ຄວນຖືຖົງຢາງເປົ່າຂຶ້ນໄປນຳ ເພື່ອເອົາໄວ້ໃສ່ເສດຂີ້ເຫຍື້ອຕ່າງໆທີ່ເຮົາອາດສ້າງຂຶ້ນ ແລ້ວເອົາລົງມາຖິ້ມຢູ່ລຸ່ມ. ພູຫົວໂລ້ນນີ້ຈະໄດ້ງາມໆໄວ້ໃຫ້ເຮົາໄດ້ເບິ່ງໄດ້ຊົມກັນໄປອີກດົນໆ.

Advertisement Replay Ad
ໃບເງິນຖືກປວກກັດ ໂໝກຂຶ້ນ ຈີກຂາດ ເສື່ອມຄຸນນະພາບແບບໃດຈຶ່ງສາມາດນຳເອົາໄປແລກປ່ຽນໄດ້?

ໃບເງິນຖືກປວກກັດ ໂໝກຂຶ້ນ ຈີກຂາດ ເສື່ອມຄຸນນະພາບແບບໃດຈຶ່ງສາມາດນຳເອົາໄປແລກປ່ຽນໄດ້?

ເຜີຍ​ເຕັກ​ນິ​ກ​ການ​ສອນ​ພາ​ສາອັງ​ກິດ​ໃຫ້​ລູກ ໃຜໆ​ກໍ່​ເຮັດ​ໄດ້

ເຜີຍ​ເຕັກ​ນິ​ກ​ການ​ສອນ​ພາ​ສາອັງ​ກິດ​ໃຫ້​ລູກ ໃຜໆ​ກໍ່​ເຮັດ​ໄດ້

ຈະເກີດຫຍັງຂຶ້ນຖ້າເຮົາສາມາດເວົ້າໄດ້ຫຼາຍພາສາ?

ຈະເກີດຫຍັງຂຶ້ນຖ້າເຮົາສາມາດເວົ້າໄດ້ຫຼາຍພາສາ?

ເຄັດ (ບໍ່) ລັບຄວາມງາມແບບ 4 ສາວ BLACKPINK

ເຄັດ (ບໍ່) ລັບຄວາມງາມແບບ 4 ສາວ BLACKPINK

ເລືອກສີເລນແວ່ນໃຫ້ຖືກສະບັບດາລາ! ສາຍເເຟຊັນຕ້ອງຮູ້ໄວ້ເເວ່ນຕາກັນເເດດບໍ່ມີດີເເຕ່ງາມ

ເລືອກສີເລນແວ່ນໃຫ້ຖືກສະບັບດາລາ! ສາຍເເຟຊັນຕ້ອງຮູ້ໄວ້ເເວ່ນຕາກັນເເດດບໍ່ມີດີເເຕ່ງາມ

ລວມທັກສະພື້ນຖານທີ່ຈະຊ່ວຍໃຫ້ທ່ານເປັນນັກເວົ້າທີ່ດີ ແລະ ໜ້າເຊື່ອຖື

ລວມທັກສະພື້ນຖານທີ່ຈະຊ່ວຍໃຫ້ທ່ານເປັນນັກເວົ້າທີ່ດີ ແລະ ໜ້າເຊື່ອຖື

ຄວາມສຸກຫຼັງກະສຽນສ້າງໄດ້ ຖ້າຮູ້ວາງແຜນໄວ້ແຕ່ຫົວທີ

ຄວາມສຸກຫຼັງກະສຽນສ້າງໄດ້ ຖ້າຮູ້ວາງແຜນໄວ້ແຕ່ຫົວທີ

ການຫຼຸດນ້ຳໜັກແບບ IF16/8 ແມ່ນຫຍັງ? ຢາກຫຸ່ນດີຕ້ອງອ່ານ

ການຫຼຸດນ້ຳໜັກແບບ IF16/8 ແມ່ນຫຍັງ? ຢາກຫຸ່ນດີຕ້ອງອ່ານ

ອາການເຈັບຄໍ ເກີດຈາກເຊື້ອໄວຣັດ ຫຼື ເຊື້ອຈຸລິນຊີ? ເຈັບຄໍແບບໃດ ຈຶ່ງຄວນຈະກິນຢາຕ້ານເຊື້ອ?

ອາການເຈັບຄໍ ເກີດຈາກເຊື້ອໄວຣັດ ຫຼື ເຊື້ອຈຸລິນຊີ? ເຈັບຄໍແບບໃດ ຈຶ່ງຄວນຈະກິນຢາຕ້ານເຊື້ອ?

6 ວິທີທີ່ໃຊ້ຮັບມືກັບຄວາມຮູ້ສຶກເຄັ່ງຄຽດທີ່ເກີດຈາກວຽກງານ

6 ວິທີທີ່ໃຊ້ຮັບມືກັບຄວາມຮູ້ສຶກເຄັ່ງຄຽດທີ່ເກີດຈາກວຽກງານ

4 ທັກສະນີ້ ທີ່ນາຍຈ້າງແນມຫາຈາກ "ນັກສຶກສາຈົບໃໝ່"

4 ທັກສະນີ້ ທີ່ນາຍຈ້າງແນມຫາຈາກ "ນັກສຶກສາຈົບໃໝ່"

ບຸດດາວ ນັບມື້ນັບງາມ! ບອກຕໍ່ເຄັດລັບດູແລຕົນເອງແນວໃດໃຫ້ດູດີສະບັບນາງງາມ?

ບຸດດາວ ນັບມື້ນັບງາມ! ບອກຕໍ່ເຄັດລັບດູແລຕົນເອງແນວໃດໃຫ້ດູດີສະບັບນາງງາມ?

“ຄິດຫຼາຍ” ພຶດຕິກຳໜຶ່ງທີ່ກໍາລັງຂ້າເຮົາທາງອ້ອມ! ເຖິງວ່າຈະແກ້ຍາກ ແຕ່ກໍຍ່ອມມີທາງອອກ

“ຄິດຫຼາຍ” ພຶດຕິກຳໜຶ່ງທີ່ກໍາລັງຂ້າເຮົາທາງອ້ອມ! ເຖິງວ່າຈະແກ້ຍາກ ແຕ່ກໍຍ່ອມມີທາງອອກ

10 ວິທີເຮັດໃຫ້ເຊົາເຈັບທ້ອງປະຈຳເດືອນ

10 ວິທີເຮັດໃຫ້ເຊົາເຈັບທ້ອງປະຈຳເດືອນ

ພໍ່ແມ່ທຳຮ້າຍຂ້ອຍ! 10 ຂໍ້ຜິດພາດທີ່ພໍ່ແມ່ຄວນຢຸດປະຕິບັດກັບລູກ ເພື່ອອະນາຄົດທີ່ດີຂອງພວກເຂົາ

ພໍ່ແມ່ທຳຮ້າຍຂ້ອຍ! 10 ຂໍ້ຜິດພາດທີ່ພໍ່ແມ່ຄວນຢຸດປະຕິບັດກັບລູກ ເພື່ອອະນາຄົດທີ່ດີຂອງພວກເຂົາ

How to ນໍາສະເໜີແບບໃດຈຶ່ງຈະສາມາດດຶງດູດໃຈຄົນຟັງໄດ້?

How to ນໍາສະເໜີແບບໃດຈຶ່ງຈະສາມາດດຶງດູດໃຈຄົນຟັງໄດ້?

ຖ່າຍຮູບແບບໃດໃຫ້ຜູ້ບ່າວກົດ Like? ສ່ອງ 5 ໄອເດຍການຖ່າຍຮູບສຳລັບສາວໆຢ່າງເຮົາບໍ່ຄວນພາດ!

ຖ່າຍຮູບແບບໃດໃຫ້ຜູ້ບ່າວກົດ Like? ສ່ອງ 5 ໄອເດຍການຖ່າຍຮູບສຳລັບສາວໆຢ່າງເຮົາບໍ່ຄວນພາດ!

ເຄີຍສັງເກດໂຕເອງວ່າມີພາວະຊຶມເສົ້າບໍ່? ມາຮູ້ຈັກ 9 ອາການພາວະຊຶມເສົ້າ ແລະ ຄວາມອັນຕະລາຍຂອງມັນ

ເຄີຍສັງເກດໂຕເອງວ່າມີພາວະຊຶມເສົ້າບໍ່? ມາຮູ້ຈັກ 9 ອາການພາວະຊຶມເສົ້າ ແລະ ຄວາມອັນຕະລາຍຂອງມັນ

ແມ່ຄ້າຍຸກ 4G ຕ້ອງອ່ານ! ມິຕິໃໝ່ແຫ່ງວົງການ Live ຂອງ Viya ຂາຍແນວໃດຈຶ່ງຈັບເງິນຫຼັກສິບລ້ານ?

ແມ່ຄ້າຍຸກ 4G ຕ້ອງອ່ານ! ມິຕິໃໝ່ແຫ່ງວົງການ Live ຂອງ Viya ຂາຍແນວໃດຈຶ່ງຈັບເງິນຫຼັກສິບລ້ານ?

ຖ້າເຈົ້າບໍ່ອ່ານບົດຄວາມນີ້ກ່ອນໄປ "ພູຫົວໂລ້ນ" ແຂວງໄຊສົມບູນ ເຈົ້າຈະຕ້ອງເສຍໃຈຕາມຫຼັງ

ຖ້າເຈົ້າບໍ່ອ່ານບົດຄວາມນີ້ກ່ອນໄປ "ພູຫົວໂລ້ນ" ແຂວງໄຊສົມບູນ ເຈົ້າຈະຕ້ອງເສຍໃຈຕາມຫຼັງ

ສົ່ງອີເມວຫາໝູ່

ສົ່ງໃຫ້ໝູ່ຫຼາຍຄົນ “,” (ສົ່ງພ້ອມກັນຫຼາຍສຸດ 50 ອີເມວ)

ສົ່ງອີເມວ