ນັກຮ້ອງສຽງດີ ແຈັກກີ້ The Voice ກຽມປ່ອຍເພງໃໝ່ "ບອກມາ" ບອກເລີຍເນື້ອເພງຊຶ້ງກິນໃຈສຸດ!

ຫຼັງຈາກຫ່າງຫາຍໄປໃນໄລຍະໜຶ່ງໜຸ່ມແຈັກກີ້ກັບມາພ້ອມຜົນງານເພງໃໝ່ ທີ່ຈະປ່ອຍໃຫ້ທຸກຄົນໄດ້ຟັງໃນໄວໆນີ້ ພ້ອມອັບເດດການເຄື່ອນໄຫວ. ດັ່ງນັ້ນເພື່ອເອົາໃຈໄວໜຸ່ມ ແລະ ໃຫ້ແຟນໆໄດ້ຊື່ນໃຈ ພວກເຮົາຈະພາທຸກຄົນໄປຮູ້ຈັກໜຸ່ມຄົນນີ້ໃຫ້ຫຼາຍຂຶ້ນ ແລະ ຜົນງານເພງໃໝ່ຈະເປັນແນວເພງແບບໃດໄປຕິດຕາມພ້ອມກັນເລີຍ.

ໄຊປະເສີດ ພົມມະວົງໄຊ ຫລື ຫລາຍຄົນຮູ້ຈັກກັນໃນນາມ ແຈັກກີ້ The Voice ຫລື Jacky XIX. ປັດຈຸບັນອາຍຸ 21 ປີ ຈົບການສຶກສາຊັ້ນມັດທະຍົມມາຈາກ ໂຮງຮຽນ ມສ ລຽວໂຕ້. ປັດຈຸບັນກຳລັງສຶກສາຢູ່ມະຫາວິມະຍາໄລ ທຸລະກິດບັນດິດ (ປະເທດໄທ) ປີ 2. ກ່ອນຈະມາເປັນສິລະປິນທີ່ຫຼາຍຄົນຮູ້ຈັກ, ໜຸ່ມແຈັກກີ້ໄດ້ປະກວດຫລາຍເວທີ ບໍ່ວ່າຈະເປັນ Pepsi Singing Contest 2016 ເຊິ່ງໄດ້ເຂົ້າໄປເຖິງຮອບຊິງຊະນະເລີດ ແລະ ໄດ້ອັນດັບຫນຶ່ງຂອງໂຄງການ Beerlao Band challenge ໃນປີ 2017.

ຜົນງານທີ່ເຮັດໃຫ້ໜຸ່ມແຈັກກີ້ພູມໃຈທີ່ສຸດແມ່ນແຈັກກີ້ໄດ້ມີໂອກາດໄປແຂ່ງໃນລາຍການ The voice Thailand Season 6 ແລະ ຍ້ອນຄວາມສາມາດຂອງເພິ່ນຈຶ່ງເຮັດໃຫ້ແຈັກກີ້ໄດ້ເຂົ້າເຖິງຮອບການສະແດງສົດ, ເປັນຄົນລາວຄົນທຳອິດທີ່ສ້າງປາກົດການໃໝ່ສູ່ເວທີໃຫຍ່ປະເທດໄທຢ່າງ The Voice. ຫຼັງຈາກນັ້ນມາຊື່ສຽງຂອງໜຸ່ມຄົນນີ້ ເລີ່ມເປັນທີ່ຮູ້ຈັກຢ່າງກວ້າງຂວາງຂຶ້ນ. ພ້ອມນັ້ນຜົນງານເພງຜົນງງານເພງ "ຜິດ" ແລະ ເພງ "ຈົບ" ກໍໄດ້ຮັບກະແສດີເຊັ່ນກັນ. ເຊິ່ງໜຸ່ມແຈັກກີ້ເອງກໍເປັນຄົນໜຶ່ງທີ່ມັກ Cover ເພງຂອງສິນລະປິນອື່ນເລີຍເປັນທີ່ຮູ້ຈັກໃນກຸ່ມຄົນທີ່ຕິດຕາມນຳ.

ສຳລັບແຈັກກີ້ແລ້ວເພງຄືສ່ວນໜຶ່ງໃນຊີວິດຈິດໃຈ ໜຸ່ມແຈັກກີ້ເປັນຄົນມັກຮ້ອງເພງຕັ້ງແຕ່ຕອນຍັງນ້ອຍ ແຕ່ສ່ວນໂຕເປັນຄົນຂີ້ອາຍ ແລະ ບໍ່ກ້າສະແດງອອກ. ແຕ່ຫລັງຈາກໄດ້ເຫັນລຸ້ນອ້າຍສິນລະປິນຫລາຍຄົນ ເຮັດອອກມາໄດ້ດີ ແລະ ມີຄວາມເທ້ ນັ້ນຄືຈຸດເລີ່ມຕົ້ນທີ່ເຮັດໃຫ້ໜຸ່ມແຈັກກີ້ເລີ່ມສຶກສາການຮ້ອງເພງຢ່າງຈິງຈັງໃນປີ 2014-2015 ຈົນເຖິງປັດຈຸບັນ. ມາເຖິງຕອນນີ້ໜຸ່ມສຽງດີຄົນນີ້ມີຜົນງານເພງດ່ຽວຂອງໂຕເອງ ນັ້ນກໍຄືເພງ : "ຈົບ" ແລະ ເພງໃຫມ່ທີ່ກຳລັງຈະປ່ອຍໃນເດືອນ 7 ນີ້ແມ່ນເພງ "Tell Me"

ຫຼາຍຄົນຄົງຈະສົງໃສວ່າເພງ "Tell Me" ຫລື ເພງ "ບອກມາ" ເປັນເພງໃດ? ຊຶ່ງໜຸ່ມຫຼໍ່ຄົນນີ້ໄດ້ໃຫ້ສຳພາດກັບທີມງານຂ່າວມ່ວນວ່າເປັນເພງແນວປ໋ອບ R&B . ເນື້ອໃນຂອງເພງຈະສອດຄ່ອງຕາມຊື່ເພງ ນັ້ນກໍຄື ບອກມາ ນັ້ນເປັນປະໂຫຍກຄຳຖາມ ໃຫ້ກັບຄົນຮັກທີ່ເຂົາໄດ້ຈາກໄປແລ້ວ ແລະ ຍັງຄົງມີຄຳຖາມສະເຫມີວ່າເຫດໃດ ເຂົາຈຶ່ງໄປ ແລະສຸດທ້າຍແລ້ວເຮົາຄວນຖ້າ? ຫລືຄວນປ່ອຍໃຫ້ມັນເປັນອະດີດທີ່ເຄີຍມີ. ຟັງແຕ່ເນື້ອໃນເພງເທົ່ານີ້ກໍຈະອົດໃຈຖ້າຮັບຊົມຮັບຟັງບໍ່ໄດ້ແລ້ວ ລະດັບຢ່າງໜຸ່ມແຈັກກີ້ ບໍ່ເຮັດໃຫ້ແຟນໆຄືພວກເຮົາຜິດຫວັງແນ່ນອນ!

ອີກດ້ານໜຶ່ງທີ່ຫຼາຍຄົນຍັງບໍ່ຮູ້ ໜຸ່ມແຈັກກີ້ເປັນຄົນໜຶ່ງມັກຟັງເພງຫລາຍແນວ ແຕ່ຫລັກໆເປັນຄົນຖະນັດແນວ Pop R&B. ນອກຈາກການຮ້ອງເພງແລ້ວ ໜຸ່ມແຈັກກີ້ມີຄວາມສົນໃຈໃນການເຮັດທຸລະກິດຮ້ານອາຫານ, ສະຖານທີ່ບັນເທີງ. ແຈັກກີ້ເປັນຜູ້ຊາຍໂຕນ້ອຍ, ບໍ່ໄດ້ສູງຫຼາຍແຕ່ວ່າເປັນຄົນທີ່ມັກຫລິ້ນກີລາບານບ້ວງ ຍ້ອນມີໄອດໍ້ທີ່ມັກທີ່ຫຼິ້ນກີລານີ້ຫຼາຍຄົນ ແລະ ຄິດວ່າກິລານີ້ມີທັກສະທີ່ເປັນເອກກະລັກ ແລະເຮັດໃຫ້ແຈັກກີ້ມີໄຫວພິບດີຂຶ້ນ. ສິ່ງທີ່ແຈັກກີ້ ຫລົງໄຫລກວ່າການຮ້ອງເພງກໍຄື ການທ່ອງທ່ຽວ ມັກໃນການເຫັນສິ່ງໃຫມ່ໆ, ວັດທະນະທຳໃຫມ່ໆ ແລະ ຄວາມສະຫງົບໃນບາງຄັ້ງຄາວ ແລະ ສິ່ງທີ່ເຮົາມາບອກແຟນໆນີ້ຄື ສິ່ງທີ່ແຈັກກີ້ບໍ່ເຄີຍບອກໃຫ້ຄົນທີ່ຕິດຕາມຮູ້ມາກ່ອນເດີ້ ແລະ ຫວັງວ່າຄົນທີ່ຕິດຕາມຈະໄດ້ຮູ້ຈັກໜຸ່ມແຈັກກີ້ຫລາຍຂຶ້ນ.

ທີມງານມ່ວນ ແລະ ແຈັກກີ້ກໍຂໍຝາກຜົນງານເພງ "Tell Me "ທີ່ກຳລັງຈະປ່ອຍໃນເດືອນ 7, ບໍ່ດົນເກີນຖ້າເຮົາກໍຈະໄດ້ຟັງສຽງໜຸ່ມມີສະເໜ່ຄົນນີ້ແລ້ວ ຫວັງວ່າຫລາຍຄົນຄົງຈະຖືກໃຈ ເພາະໄດ້ແຮງບັນດານໃຈມາຈາກເພງຂອງປະເທດໄທ ແລະເອົາມາປະຍຸກໃຫ້ເຂົ້າກັບເພງບ້ານເຮົາ. ສຸດທ້າຍນີ້ຂາດບໍ່ໄດ້ເລີຍຕ້ອງຂອບໃຈຄົນທີ່ຕິດຕາມ ຫລື ແຟນຄລັບທີ່ຍັງຕິດຕາມຜົນງານ ແລະ ສະຫນັບສະຫນຸນໜຸ່ມແຈັກກີ້ຕະຫລອດມາ. ໜຸ່ມສຽງດີຄົນນີ້ສັນຍາວ່າຈະເຮັດຜົນງານອອມມາໃຫ້ທຸກຄົນໄດ້ຮັບຊົມເລື້ອຍໆ. ໜ້າຮັກສຽງດີແບບນີ້ບໍ່ແປກໃຈທີ່ມີແຟນຄລັບຢ່າງຫຼວງຫຼາຍ. ສາມາດຕິດຕາມການເຄື່ອນໄຫວໜຸ່ມຄົນນີ້ໄດ້ທີ່ໄອຈີ: https://www.instagram.com/jk.pmmvx/