ຊົມເຊີຍ ກູ້ໄພໃຈສູ້ "ກ້ອນແກ້ວ ອຸດອນ" ສຸມໃສ່ວຽກງານຮັບໃຊ້ສັງຄົມ ຕະຫຼອດໄລຍະໂຄວິດ-19

ຂ່າວດີທີ່ປັດຈຸບັນການແພ່ລະບາດຂອງພະຍາດໂຄວິດໃນປະເທດເຮົາ ເວົ້າໄດ້ວ່າເກືອບໝົດລົງແລ້ວ ເຫຼືອພຽງ​ 1 ຄົນເທົ່ານັ້ນທີ່ຮັບການປິ່ນປົວຢູ່, ຕ້ອງຂໍຊົມເຊີຍທຸກພາກສ່ວນ ແລະ ປະຊາຊົນທຸກຄົນທີ່ຊ່ວຍກັນສາມັກຄີເຮັດໃຫ້ພວກເຮົາຜ່ານວິກິດນີ້ໄປນຳກັນໄດ້ ແລະ ມ່ວນຢາກຈະແນະນຳອີກໜຶ່ງບຸກຄົນທີ່ຕັ້ງໜ້າປະກອບສ່ວນໃນວິກິດໂຄວິດຄັ້ງນີ້ຢ່າງສຸດໃຈນັ້ນກໍຄືໜ່ວຍກູ້ໄພ. ໜຶ່ງໃນຜູ້ທີ່ເຮົາຈະເວົ້າເຖິງນັ້ນກໍຄື ທ້າວກ້ອນແກ້ວ ອຸດອນ, ປັດຈຸບັນ ອາຍຸ 31 ປີ ອາຊີບ ພະນັກງານກູ້ໄພ ຕຳແໜ່ງປະທານຊີ້ນຳລວມມູນນິທິກູ້ໄພແຂວງຄຳມ່ວນ 1624.

ກ່ອນເກີດພະຍາດໂຄວິດ-19 ທ້າວກ້ອນແກ້ວ ໄດ້ໃຊ້ຊີວິດຮັບໃຊ້ສັງຄົມເປັນຕົ້ນແມ່ນປະຊາຊົນຢູ່ໃນເມືອງທ່າແຂກ ແຂວງຄຳມ່ວນ ວຽກຫລັກຂອງເພິ່ນກໍຄືກູ້ຊີບ-ກູ້ໄພ, ຫລັງຈາກການແພ່ລະບາດ ກູ້ໄພ ແລະ ອາສາສະຫມັກພາຍໃນຫ້ອງການກໍໄດ້ປະຕິບັດຕາມຄຳສັ່ງແຈ້ງການຂອງນາຍົກລັດຖະມົນຕີ ສະບັບເລກທີ 06/ນຍ , ຄຳສັ່ງຂອງທ່ານເຈົ້າແຂວງຄຳມ່ວນສະບັບເລກທີ 02/ຈຂຄມ ແລະ ຄຳສັ່ງຂອງທ່ານເຈົ້າເມືອງ ທ່າແຂກ ສະບັບເລກທີ 97/ຈມທຂ ວ່າດ້ວຍການສະກັດກັ້ນ ແລະ ຕ້ານພະຍາດໂຄວິດ-19 ພາຍໃນແຂວງ ເຊິ່ງຜູ້ກ່ຽວ ແລະ ອາສາສະຫມັກທຸກຄົນໄດ້ປະກອບສ່ວນເຫື່ອແຮງ ແລະ ສະຕິປັນຍາເຂົ້າຊ່ວຍວຽກງານໃນການປ້ອງກັນພະຍາດໂຄວິດ-19 ໂດຍຮັບການຊີ້ນຳຈາກ ພະແນກສາທາລະນະສຸກແຂວງຄຳມ່ວນ, ໂຮງຫມໍແຂວງຄຳມ່ວນເພື່ອລົງປະຕິບັດວຽກງານຮັບໃຊ້ສັງຄົມໃນການພົ່ນຢາຂ້າເຊື້ອຕາມສະຖານທີ່ຕ່າງໆ.

ແນວຄິດຈິດໃຈທີ່ເກີດຄວາມຄິດຢາກພົ່ນຢາຂ້າເຊື້ອກໍຍ້ອນວ່າຢາກສະກັດກັ້ນເຊື້ອພະຍາດໂຄວິດ-19 ບໍ່ໃຫ້ແພ່ລະບາດມາຮອດແຂວງ, ຄວນມີການປ້ອງກັນໄວ້ດີທີ່ສຸດ. ການພົ່ນຢາຂ້າເຊື້ອເເມ່ນໄປຕາມສະຖານທີ່ຕ່າງໆທີ່ເພີ່ນແຈ້ງມາໃຫ້ທ້າວກ້ອນແກ້ວໄປ ກໍຕ້ອງໄປ. ສຳລັບສຽງຕອບຮັບຈາກປະຊາຊົນກໍມີຈຳນວນຫລາຍຖືວ່າຍ້ອງຍໍຊົມເຊີຍໃນການປະຕິບັດຫນ້າທີ່ຂອງມູນນິທິ 1624 ເພື່ອສຸມໃສ່ວຽກງານຮັບໃຊ້ສັງຄົມ ແລະ ທາງໜ່ວຍກູ້ໄພ 1624 ແລະ ຜູ້ກ່ຽວບໍ່ມີໃຜໄດ້ຮັບຜົນກະທົບຫຍັງຈາກພະຍາດດັ່ງກ່າວເພາະມີຄວາມເອົາໃຈໃສ່ຕໍ່ການແນະນຳຂອງຂັ້ນເທິງ, ສະພາບຈິດໃຈໃນການເຮັດວຽກກໍມີຫລາຍບັນຫາຢູ່ ແຕ່ກໍຂໍທິດຊີ້ນຳທາງຂັ້ນເທິງໄດ້ຢ່າງໄວໃນການຕອບສະໜອງ, ສຳລັບຄວາມລຳບາກແມ່ນກໍຄື ບາງບ່ອນພວກເຮົາກໍໄປບໍ່ຮອດບໍ່ເຖິງເພາະໄລຍະການໄປໄກຫລາຍ ເພາະພວກເຮົາຕ້ອງໄດ້ກຸ້ມຕົນເອງໃນການເດີນທາງຖ້າໄດ້ໄປ.

ປັດຈຸບັນ ກູ້ໄພກ້ອນແກ້ວ ກໍດຳລົງຊີວິດປົກກະຕິແຕ່ກໍຍັງປະຕິບັດຕາມຊີ້ນຳຂອງຂັ້ນເທິງຢູ່ແລະມີການປ່ຽນແປງບ່ອນທີ່ວ່າການໄປການມາ ຕ້ອງມີຄວາມເອົາໃຈໃສ່ໃນການປ້ອງກັນຄືເກົ່າ, ປັດຈຸບັນນີ້ກໍຍັງດຳເນີນການພົ່ນຢາຂ້າເຊື້ອຢູ່ ຈົນກວ່າເຊື້ອພະຍາດຈະຫາຍສູນໄປຈາກລາວເຮົາ.

ທ້າຍສຸດນີ້ ທີມງານມ່ວນ ແລະ ທ້າວກ້ອນແກ້ວ ຢາກຝາກເຖິງຜູ້ອ່ານທຸກທ່ານຢາກໃຫ້ມີຄວາມເອົາໃຈໃສ່ຕໍ່ຕາມການແຈ້ງການຂອງຂັ້ນເທິງວາງອອກໃຫ້ເຂັ້ມງວດນຳກັນ,​ ເພື່ອເປັນການປ້ອງກັນຕໍ່ສຸຂະພາບຂອງທຸກໆທ່ານເພື່ອບໍ່ໃຫ້ແພ່ລາມໃສ່ປະເທດເຮົາ ພ້ອມຢາກຂໍຄວາມຊ່ວຍເຫຼືອ ຜູ້ໃຈບຸນສາມາດສາມາດສົມທົບປັດໄຈ ກໍຄືທາງດ້ານອຸປະກອນການປ້ອງກັນເຄື່ອງມືຕ່າງໆທີ່ຈຳເປັນຕ້ອງໃຊ້ໃນການປ້ອງກັນຢາກໃຫ້ມີໃນໜ່ວຍກູ້ໄພເພາະກູ້ໄພເປັນແນວໜ້າຂອງທຸກຄົນທີ່ອອກປະຕິບັດໜ້າທີ່ກອບກູ້ເອົາຊີວິດຂອງເພື່ອນມະນຸດດ້ວຍກັນ, ຄວາມຮ່ວມມືກໍຄືຢາກໃຫ້ທຸກທ່ານໃຫ້ຄວາມຮ່ວມມືແກ່ໜ່ວຍກູ້ໄພ, ແພດໝໍ ແລະ ພາກສ່ວນທີ່ກ່ຽວຂ້ອງໃນການປະຕິບັດໜ້າທີ່ ປະຕິບັດຕາມຂັ້ນເທິງແຈ້ງການມາເຮົາຕ້ອງປະຕິບັດໃຫ້ເຂັ້ມງວດ.

"ຊີວິດຄົນບໍ່ແມ່ນເກມ ຕາຍແລ້ວຈະເລີ່ມຕົ້ນຊີວິດໃໝ່ໄດ້"