ໜຸ່ມຫຼໍ່ກ້າມແໜ້ນ "ມາກ ພັນນໍລິນ" ກັບການປ່ຽນແປງຕົນເອງ ສູ່ໂອກາດທີ່ຫຼາຍຂຶ້ນ

ເປັນອີກໜຶ່ງດາລາໄວໜຸ່ມທີ່ບໍ່ໄດ້ມີດີ ພຽງໜ້າຕາເທົ່ານັ້ນ ແຕ່ຍັງມີຄວາມສາມາດພຽບພ້ອມໃນວົງການບັນເທີງ ສຳລັບໜຸ່ມ ພັນນໍລິນ ພິຈິດ ຫຼື ມາກ ທີ່ຫຼາຍຄົນຮູ້ຈັກໃນນາມໜຸ່ມຫຼໍ່ສາຍສຸຂະພາບ ຂວັນໃຈສາວນ້ອຍ ສາວໃຫຍ່, ບໍ່ວ່າຈະໂພສພາບໃດສາວໆກໍກົດໄລກົດແຊກັນລົວໆ ບອກເລີຍສະເໜ່ເຫຼືອລົ້ນອີຫຼີ ກັບໜຸ່ມຄົນນີ້ເຫັນແລ້ວຟິນ ພາດບໍ່ໄດ້ທີ່ຕ້ອງບອກຕໍ່! ປັດຈຸບັນໜຸ່ມມາກອາຍຸ 22​ ປີ, ເຮັດວຽກເປັນ Trainer ຢູ່ແສງດາລາ ແລະ ຮຽນຢູ່ມະຫາວິທະຍາໄລ ຄອມພິວເຕີ ປີສຸດທ້າຍ ແລະ ແຈ້ງເກີດຈາກການເປັນນາຍແບບ.

ໂດຍສະເພາະຫຸ່ນທີ່ເຕັມແຕ່ກ້າມເນື້ອທີ່ເຮົາເຫັນໃນປັດຈຸບັນ ແຕ່ບອກກ່ອນວ່າແຕ່ກ່ອນໜຸ່ມຄົນນີ້ເຄີຍອວບມາກ່ອນນໍ້າໜັກຫຼາຍເຖິງ 91 ກິໂລ, ປັດຈຸບັນ 77 ກິໂລ. ແຕ່ຕ້ອງໃຊ້ຄວາມພະຍາຍາມ ແລະ ມຸ່ງໝັ້ນແທ້ໆໃນການໄປສູ່ເປົ້າໝາຍກໍຄືການຫຼຸດນໍ້າໜັກ ນີ້ຄືຈຸດປ່ຽນທີ່ເຮັດໃຫ້ໜຸ່ມມາກເລີ່ມຮູ້ສຶກວ່າຕົນເອງເລີ່ມມີນໍ້າໜັກເກີນໄປແລ້ວ ເພື່ອໃຫ້ເປົ້າໝາຍສຳເລັດໜຸ່ມຄົນນີ້ກໍເລີ່ມຫຼຸດນໍ້າໜັກແບບຈິງຈັງ ເຊິ່ງເພິ່ນໃຊ້ເວລາພຽງແຕ່ 2 ເດືອນເທົ່ານັ້ນເດີ້ ໃນການປ່ຽນຫຸ່ນໃໝ່ໃຫ້ປັງກວ່າເກົ່າ ແລະ ທີມງານບັນເທີງມ່ວນກໍໄດ້ໄປສືບເອົາເຄັດລັບດີໆຂອງນາຍແບບຄົນນີ້ ມາຝາກລູກເພຈທຸກຄົນຫວັງວ່າຈະຖືກໃຈລູກເພຈຂອງເຮົາແນ່ນອນ!

ເຊິ່ງສິ່ງທຳອິດ ກໍຄືການມີວິໄນກັບຕົນເອງນີ້ແມ່ນພື້ນຖານທີ່ສຳຄັນທີ່ບໍ່ຄວນເບິ່ງຂ້າມ, ຖ້າເຮົາມີລະບຽບຈັດແຜນວ່າແຕ່ລະມື້ມີຄວາມຕັ້ງໃຈຫຼຸດປະລິມານອາຫານເທົ່າໃດ?​ ອອກກຳລັງກາຍມື້ລະຈັກເທື່ອກໍຈະສາມາດເຮັດໃຫ້ເປົ້າຫມາຍຂອງເຮົາເປັນຈິງໄດ້ຍິ່ງຂຶ້ນ, ຕໍ່ມາຄືການຄວບຄຸມອາຫານນີ້ກໍເປັນສິ່ງໜຶ່ງທີ່ສຳຄັນຫຼາຍເຊັ່ນກັນຄວນເລືອກກິນອາຫານທີ່ດີມີປະໂຫຍດ ຖ້າເປັນອາຫານຄຣີນຍິ່ງເປັນການດີ ເພາະໜຸ່ມມາກກໍກິນຢູ່, ພ້ອມທັງໜຸ່ມຄົນນີ້ຍັງມັກແລ່ນ ແລະ ຫຼິ້ນ Fitness ຢູ່ເລື້ອຍໆ. ຢາກຮູ້ບໍ່ແຮງບັນດານໃຈຂອງໜຸ່ມຄົນນີ້ແມ່ນຫຍັງ? ໜຸ່ມມາກໄດ້ບອກກັບທີມງານບັນເທີງມ່ວນວ່າ ແຮງບັນດານໃຈຂອງລາວກໍຄືການຢາກພັດທະນາຕົນເອງໃຫ້ດີຂຶ້ນ, ຢາກມີຄວາມໝັ້ນໃຈ ແລະ ດູດີ ຖ້າຫາກເຮົາມີພາບລັກທີ່ດີເຮົາກໍຈະມີໂອກາດຫຼາຍຂຶ້ນ ໂດຍສະເພາະດ້ານວົງການບັນເທີງ ແລະ ບໍ່ຢາກແນະນຳໃຫ້ກິນຢາຫຼຸດນໍ້າໜັກເພາະສ່ຽງຫຼາຍອາດມີຜົນຕາມມາໃນພາຍຫຼັງ.

ສຳລັບຜົນງານທີ່ຜ່ານມາກໍຈະມີການເດີນແບບ, ຖ່າຍແບບ, ຖ່າຍໂຄສະນາ ແລະ ພຣີເຊັນເຕີ້ເປັນຕົ້ນ. ສິ່ງທີ່ເຮັດໃຫ້ໜຸ່ມມາກຢາກເຂົ້າວົງການບັນເທີງເພາະຜູ້ກ່ຽວຄວາມມັກ ແລະ ຢາກລອງຮຽນຮູ້ສິ່ງໃໝ່ໆ, ເຊິ່ງອາຊີບນີ້ບໍ່ງ່າຍຄືດັ່ງຫຼາຍຄົນຄິດກໍເລີຍຄິດຢາກລອງ ແລະ ມັນກໍແມ່ນສິ່ງທີ່ທ້າທາຍ, ເມື່ອມີໂອກາດມີຄົນຊັກຊວນເຂົ້າວົງການບັນເທີງກໍຮູ້ສຶກດີໃຈ ຫຼັງຈາກໄດ້ເຂົ້າວົງການບັນເທີງກໍຮູ້ສຶກມັກ ແລະ ມ່ວນຫຼາຍໃນອາຊີບນີ້ ແລະ ເຮັດໃຫ້ໜຸ່ມມາກຮູ້ສຶກຢາກປ່ຽນແປງໂຕເອງໃຫ້ດີຂຶ້ນ ແລະ ພັດທະນາຕົນເອງໃນຫຼາຍໆດ້ານ ພ້ອມທັງໜຸ່ມຄົນນີ້ຍັງສົນໃຈໃນເລື່ອງການສະແດງເປັນພິເສດອີກດ້ວຍ, ຄາດວ່າອີກບໍ່ດົນແຟນໆຄົງຈະໄດ້ເຫັນບົດບາດການສະແດງຂອງໜຸ່ມຄົນນີ້ແນ່ນອນ.

ສຳລັບໃຜຢາກຕິດຕາມຜົນງານໜຸ່ມຄົນນີ້ສາມາດຕິດຕາມໄດ້ທີ່ເຟສບຸກ: Mark phannorlin ແລະ IG:mark_phannorlin