ລາງລົດໄຟລາວ-ຈີນປູລາງຜ່ານອຸມົງທຳອິດ ມຸ່ງໜ້າສູ່ເຂດພາກເໜືອ ກຽມພ້ອມເປີດໃຊ້ທ້າຍປີ 2021
ສະໜັບສະໜູນເນື້ອຫາ
ເລີ່ມປູແລ້ວ ລາງລົດໄຟຜ່ານອຸມົງແຫ່ງທຳອິດໃນລາວ ເມື່ອວັນເສົາທີ 23 ພຶດສະພາ ທີ່ຜ່ານມາ ຢູ່ທີ່ສະຖານທີ່ກໍ່ສ້າງທາງລົດໄຟ ລາວ-ຈີນ ທີ່ບ້ານແສນຊຸມ ແຂວງວຽງຈັນ, ກໍາມະກອນ 2 ປະເທດລາວ-ຈີນ ພວມຮ່ວມມືກັນປູລາງລົດໄຟຄຽງຄູ່ກັບໝອນລາງແຖວລະ 14 ອັນ.
ສຳນັກຂ່າວຊິນຫົວລາຍງານວ່າ ອຸມົງຄວາມຍາວ 661 ແມັດດັ່ງກ່າວຕັ້ງຢູ່ໃນແຂວງວຽງຈັນ ຫ່າງຈາກນະຄອນຫຼວງວຽງຈັນປະມານ 60 ກິໂລແມັດ ເຊິ່ງເປັນຈຸດຕັດລະຫວ່າງພາກກາງ ແລະ ພາກເໜືອຂອງລາວ.
ທ່ານ ເລີ່ຍ ຈາວ ເລຂາທິການພັກກອມມູນິດຈີນ ເຊິ່ງເປັນໜຶ່ງໃນຄະນະກຳມະການປະຈຳທີ່ ກຸ່ມບໍລິສັດວິສະວະກຳທາງລົດໄຟເລກທີ 2 ແຫ່ງ ສປ ຈີນ ທີ່ຮັບຜິດຊອບການປູລາງລົດໄຟລາວຈີນ ກ່າວຕໍ່ຜູ້ສື່ຂ່າວວ່າ ທ່າມກາງການລະບາດຂອງໂຄວິດ-19, ທາງບໍລິສັດໄດ້ວາງແຜນວຽກຢ່າງຕັ້ງໜ້າ ແລະ ກະຕຸ້ນໃຫ້ວິສະວະກອນ ແລະ ກຳມະກອນລາວຫຼາຍກວ່າ 700 ຄົນ ແລະ ວິສະວະກອນ-ກຳມະກອນຈີນຫຼາຍກວ່າ 200 ຄົນ ຮ່ວມມືກັນຢ່າງໃກ້ຊິດ ແລະ ມີປະສິດທິພາບ ເຮັດໃຫ້ຄວາມໄວໃນກາງປູລາງເພີ່ມຂຶ້ນ ຈາກ 2 ກິໂລແມັດຕໍ່ 3 ມື້ ໃນໄລຍະເລີ່ມຕົ້ນ ກາຍເປັນ 1.5 ກິໂລແມັດຕໍ່ມື້ໃນປັດຈຸບັນ.
ການປູລາງລົດໄຟໃນໂຄງການທາງລົດໄຟລາວ-ຈີນເລີ່ມຕົ້ນຂຶ້ນໃນວັນທີ 27 ມີນາ 2020 ທີ່ນະຄອນຫຼວງວຽງຈັນ. ທາງລົດໄຟຄວາມຍາວ 414 ກິໂລແມັດ ປະກອບດ້ວຍອຸມົງ 198 ກິໂລແມັດ ແລະ ຂົວ 62 ກິໂລແມັດ ແລ່ນຜ່ານດ່ານບໍ່ເຕ່ນທາງພາກເໜືອຂອງລາວ ເຊື່ອມຕໍ່ກັບຈີນ ໄປຫານະຄອນຫຼວງວຽງຈັນ ດ້ວຍຄວາມໄວແລ່ນສູງສຸດ 160 ກິໂລແມັດຕໍ່ຊົ່ວໂມງ.
ທາງລົດໄຟຟ້າສຳລັບໂດຍສານ ແລະ ຂົນສົ່ງສິນຄ້າສ້າງ ຂຶ້ນພາຍໃຕ້ເຕັກນິກມາດຖານຂອງ ສປ ຈີນ. ໂຄງການດັ່ງກ່າວເລີ່ມຂຶ້ນໃນເດືອນທັນວາ ປີ 2016 ແລະ ມີແຜນກໍ່ສ້າງສຳເລັດ ແລະ ເປີດໃຊ້ໃນເດືອນທັນວາປີ 2021.
