ວັນເສົາ ທີ 6 ມິຖຸນາ 2020

ປະເທດອື່ນໆກຽມໂຕແນວໃດ ເມື່ອຕ້ອງໄດ້ "ເປີດຮຽນຄືນ" ຫຼັງຈາກຜ່ອນຜັນມາດຕະການປ້ອງກັນໂຄວິດ-19?

ປະເທດອື່ນໆກຽມໂຕແນວໃດ ເມື່ອຕ້ອງໄດ້ "ເປີດຮຽນຄືນ" ຫຼັງຈາກຜ່ອນຜັນມາດຕະການປ້ອງກັນໂຄວິດ-19?
S! Muan

ສະໜັບສະໜູນເນື້ອຫາ

ມາດຕະການລັອກ​ດາວເພື່ອສະກັດ​ການ​ລະບາດ​ຂອງ​ໂຄ​ວິດ​-19 ໃນໄລຍະບໍ່ເທົ່າໃດ​ເດືອນ​ທີ່​ຜ່ານມາ ໄດ້​ສົ່ງ​ຜົນ​ໃຫ້​ມີ​ການ​ປິດ​ໂຮງຮຽນ​ບາງ​ສ່ວນ ​ຫຼື ​ທັງ​ໝົດ. ແຕ່ຫຼ້າສຸດ ຫຼາຍ​ປະເທດ​ກໍຄ່ອຍໆ​ເປີດ​ຮຽນ​ອີກ​ເທື່ອ ພ້ອມ​ນຳໃຊ້​ມາດຕະການຫຼຸດ​ຄວາມ​ສ່ຽງ​ແພ່ເຊື້ອ​ຕັ້ງ​ແຕ່​ເປີດ​ປ່ອງຢ້ຽມເພື່ອ​ລະບາຍ​ອາ​ກາດ ໄປ​ຈົນ​ເຖິງ​ການ​ເວັ້ນ​ໄລຍະ​ຫ່າງ​ລະຫວ່າງ​ໂຕະ​ນັກ​ຮຽນ.

ອົງການຢູເນສໂກລະບຸ​ວ່າ ການ​ປິດ​ສະຖານ​ສຶກ​ສາ​ອັນ​ເປັນ​ຜົນ​ຈາກ​ມາດຕະການລັອກ​ດາວເພື່ອ​ສະກັດກັ້ນ​ການ​ແພ່ລະບາດ​ຂອງ​ໂຄ​ວິດ​-19 ໄດ້​ສົ່ງ​ຜົນ​ກະທົບ​ຕໍ່​ນັກ​ຮຽນ​ເກືອບ​ 70% ຂອງ​ປະຊາກອນ​ນັກ​ຮຽນ​ທົ່ວ​ໂລກ​ທັງ​ໝົດ.

​ຫຼັງ​ຈາກ​ສະຖານະການ​ການ​ລະບາດ​ເບິ່ງຄືຈະ​ບັນ​ເທົາ​ຄວາມ​ຮຸນແຮງ​ລົງ​ໃນ​ຫຼາຍ​ປະເທດ, ໜຶ່ງ​ໃນປະ​ເດັນ​ທີ່​ມີ​ການ​ຖົກ​ຖຽງ​ກັນ​ຄື ຄວນ​ມີ​ການ​ເປີດ​ຮຽນ​ອີກ​ຄັ້ງ ​ຫຼື ​ບໍ່? ທ່າມ​ກາງ​ສຽງ​ສະ​ທ້ອນ​ເຖິງ​ບັນຫາ​ຄວາມ​ບໍ່​ສະ​ດວກ​ໃນ​ການ​ຮຽນ​ຜ່ານ​ລະບົບ​ອອນລາຍ ບໍ່​ວ່າ​ຈະ​ເປັນ​ເລື່ອງປະ​ສິດ​ທິ​ພາບ​ໃນ​ການ​ຮຽນ​ການ​ສອນ, ຄວາມ​ບໍ່​ສະ​ດວກ​ຂອງ​ຜູ້​ປົກຄອງ ຫຼື​ ຄວາມ​ຫຼຸດໂຕນ​ທາງ​ເສດຖະກິດ​ທີ່​ເຮັດໃຫ້​ໂອ​ກາດ​ໃນ​ການ​ເຂົ້າ​ເຖິງ​ອິນ​ເຕີເນັດ ​ແລະ ​ອຸປະກອນ​ການ​ຮຽນ​ອອນລາຍຂ​ອງ​ເດັກນ້ອຍ​ແຕກ​ຕ່າງ​ກັນ. ຫຼ້າ​ສຸດ, ກໍ​ມີ​ຫຼາຍ​ປະເທດ​ທີ່​ໄດ້​ເລີ່ມ​​ເປີດ​ຮຽນ​ອີກ​ຄັ້ງ.

ຈີນ 

ທາງ​ການ​ໄດ້ປະ​ກາດລັອກ​ດາວເມືອງ​ອູ່​ຮັ້ນເຊິ່ງ​ເປັນ​ຈຸດ​ເລີ່ມ​ຕົ້ນ​ການ​ລະບາດ​ຂອງ​ໄວ​ຣັດ ເມື່ອ​ປາຍ​ເດືອນມັງກອນທີ່​ຜ່ານມາ ແລະ ​ບໍ່​ດົນ​ຫຼັງ​ຈາກ​ນັ້ນ​ກໍ​ມີ​ອີກ 15 ເມືອງ​ທີ່​ປະຕິບັດຕາມ ໂດຍ​ໃນໄລຍະທີ່​ການ​ລະບາດ​ຮຸນແຮງ​ສຸດ​ມາດຕະການລັອກ​ດາວ​ຂ​ອງ​ຈີນກວມເອົາ​ພື້ນ​ທີ່ 20 ແຂວງ ​ແລະ ພາກພື້ນ ສົ່ງ​ຜົນ​ໃຫ້​ເດັກ​ນັກ​ຮຽນ 200 ລ້ານ​ຄົນ ຕ້ອງ​ຍ້າຍ​ໄປ​ຮຽນອອນລາຍໃນໄລຍະເດືອນກຸມພາ.

ເມື່ອ​ວັນທີ 18 ມີນາ ຈີນ​ບໍ່​ພົບ​ຜູ້​ຕິດ​ເຊື້ອ​ໃນ​ທ້ອງ​ຖິ່ນ​ເປັນ​ເທື່ອ​ທຳອິດ​ນັບ​ຕັ້ງ​ແຕ່​ມີ​ການ​ລະບາດ ແລະ​ ກໍ​ໄດ້​ຄ່ອຍ​ໆຜ່ອນຄາຍ​ມາດຕະການລັອກ​ດາວໃນ​ບໍ່​ເທົ່າໃດ​ອາທິດ​ຫຼັງ​ຈາກ​ນີ້. ເວັບ​ໄຊໜັງສື​ພິມ South China Morning Post ລາຍ​ງານ​ວ່າ​ເຖິງວ່າຈົນຮອດ​ຕົ້ນ​ເດືອນເມສາ ຈະ​ມີ​ການ​ເປີດ​ໂຮງຮຽນ​ໃນ 9 ແຂວງຂອງ​ຈີນ​ແຜ່ນດິນ​ໃຫຍ່​ໃຫ້​ກັບ​ນັກ​ຮຽນ​ມັດທະຍົມຊັ້ນ​ປີ​ສຸດ​ທ້າຍ, ແຕ່​ໂຮງຮຽນ​ໃນ​ພື້ນ​ທີ່​ອື່ນ​ໆຍັງ​ຄົງ​ປິດ. ຈົນກະທັ້ງ​ເມື່ອ​ວັນທີ 27 ເມສາ ນັກ​ຮຽນ​ມັດທະຍົມຕອນປາຍ​ໃນ​ນະຄອນຫຼວງປັກ​ກິ່ງ, ນະຄອນ​ຊ່ຽງ​ໄຮ້ ແລະ​ ເມືອງ​ກວ່າງ​ໂຈວ ຈຶ່ງ​ໄດ້​ກັບ​ໄປ​ຮຽນ​ທີ່​ໂຮງຮຽນ​ອີກ​ເທື່ອ​ເພື່ອ​ກຽມ​ການ​ສອບ​ເສັງເຂົ້າ​ມະຫາ​ວິທະຍາ​ໄລ ໂດຍ​ລາຍ​ງານ​ລະບຸ​ວ່າ ກະຊວງ​ສຶກ​ສາ​ທິ​ການ​ຂອງ​ຈີນ​ກຳນົດ​ໃຫ້​ຕ້ອງ​ມີ​ການ​ວັດ​ໄຂ້​ນັກ​ຮຽນ​ທີ່ປະ​ຕູ​ທາງ​ເຂົ້າ​ໂຮງຮຽນ ແລະ ​ນັກ​ຮຽນ​ຍັງ​ຕ້ອງ​ສະແດງ​ຄິວ​ອາ​ໂຄ​ດ​ສີ​ຂຽວ​ຈາກ​ລະບົບ​ຄິວ​ອາ​ໂຄດສຸຂະພາບ​ໃນສະມາດ​ໂຟນ​ເພື່ອຢັ້ງ​ຢືນວ່າ​ມີສຸຂະພາບ​ແຂງ​ແຮງ. 

ສ່ວນ​ທີ່​ເມືອງ​ອູ່​ຮັ້ນ ກໍ​ໄດ້​ເລີ່ມ​ເປີດ​ຮຽນ​ແລ້ວ​ເຊັ່ນ​ກັນ​ເມື່ອ​ວັນທີ 6 ພຶດສະພາ ທີ່​ຜ່ານມາ ໂດຍ​ນັກ​ຮຽນ​ມັດທະຍົມຕອນປາຍປະ​ມານ 57,000 ຄົນ ໄດ້​ກັບ​ໄປ​ຮຽນ​ທີ່​ໂຮງຮຽນ​ເພື່ອ​ກຽມສອບເສັງ​ເຂົ້າ​ມະຫາ​ວິທະຍາ​ໄລ ທ່າມ​ກາງ​ມາດຕະການປ້ອງ​ກັນ​ເຂັ້ມ ທັງ​ກຳນົດ​ໃຫ້​ນັກ​ຮຽນ​ຕ້ອງ​ຍ່າງ​ເຂົ້າ​ແຖວ​ຮຽງ​ໜຶ່ງ​ເພື່ອ​ຜ່ານ​ເຄື່ອງ​ວັດແທກ​ອຸນຫະພູມ. ນັກ​ຮຽນ​ທີ່​ອຸນຫະພູມ​ຮ່າງກາຍ​ສູງ​ຈະ​ບໍ່​ໄດ້ຮັບ​ອະນຸຍາດ​ໃຫ້​ເຂົ້າ​ຮຽນ, ໂຕະ​ນັກ​ຮຽນ​ຕ້ອງ​ເວັ້ນ​ໄລຍະ​ຫ່າງ​ກັນ 1 ແມັດ.

ເຈົ້າໜ້າທີ່​ເມືອງ​ອູ່​ຮັ້ນເປີດເຜີຍ​ວ່າ ນັກ​ຮຽນ, ຄູ ແລະ​ ພະນັກງານ​ໃນ​ໂຮງຮຽນ​ທຸກ​ຄົນ​ຈະ​ຕ້ອງ​ໄດ້ຮັບ​ການ​ກວດ​ຫາ​ເຊື້ອ​ໄວ​ຣັດ​ກ່ອນ​ກັບ​ມາ​ໂຮງຮຽນ. ຂະນະ​ດຽວ​ກັນ​ກໍ​ມີ​ການອະນາໄມ ​ແລະ ​ຂ້າ​ເຊື້ອ​ອາ​ຄານ​ສະຖານ​ທີ່.

ໄຕ້​ຫວັນ

ໄຕ້​ຫວັນເຊິ່ງ​ໄດ້ຮັບ​ສຽງ​ຊື່ນ​ຊົມ​ໃນ​ການ​ຈັດການ​ຄວບ​ຄຸມ​ການ​ລະບາດ​ຂອງ​ໄວ​ຣັດ​ໄດ້​ຢ່າງ​ທັນການ ​ແລະ ​ມີປະ​ສິດ​ທິ​ພາບ ກໍ​ໄດ້​ເປີດ​ຮຽນ​ເມື່ອ​ວັນທີ 25 ກຸມພາ ໂດຍ​ລາຍ​ງານ​ລະບຸ​ວ່າ ຄວາມ​ຈິງ​ແລ້ວ​ໄຕ້​ຫວັນ​ບໍ່ເຄີຍປະ​ກາດ​ປິດ​ໂຮງຮຽນ​ຢ່າງ​ເປັນ​ທາງ​ການ ແຕ່​ຂະຫຍາຍ​ເວລາໄລຍະປິດ​ພາກຮຽນ​ລະດູ​ໜາວ​ອອກ​ໄປ 10 ມື້ ເມື່ອ​ເດືອນກຸມພາ ທີ່​ຜ່ານມາ ເພື່ອ​ອະນາໄມ​ຂ້າ​ເຊື້ອ​ອາ​ຄານ​ສະຖານ​ຕ່າງ​ໆໃນ​ໂຮງຮຽນ, ແຈກ​ຈ່າຍ​ອຸປະກອນການແພດ ແລະ ​ຈັດ​ກຽມລະບຽບ​ປະຕິບັດ​ໃໝ່​ສຳລັບ​ໂຮງຮຽນ​ທີ່​ມີ​ຜູ້​ຕິດ​ເຊື້ອ​ທີ່ໄດ້ຮັບການຢັ້ງຢືນ.

ຂະນະ​ນີ້ ໂຮງຮຽນ​ໃນ​ໄຕ້​ຫວັນ​ຈະ​ມີ​ການ​ວັດ​ແທກໄຂ້, ບາງ​ແຫ່ງ​ກໍ​ຈະ​ຕິດ​ຕັ້ງ​ສາກ​ກັ້ນ​ພລາສຕິກ​ເທິງ​ໂຕະ​ນັກ​ຮຽນ ເຊິ່ງ​ຖື​ເປັນ​ມາດຕະການຄວາມ​ປອດໄພ​ທີ່​ເພີ່ມ​ເຂົ້າ​ມາ.

ຍີ່​ປຸ່ນ

ເມື່ອ​ວັນທີ 27 ກຸມພາ ນາຍົກ​ລັດຖະມົນຕີ 'ຊິນ​ໂຊ ອາ​ເບະ' ໄດ້​ຂໍ​ໃຫ້​ໂຮງຮຽນປະ​ຖົມ​ສຶກ​ສາ, ມັດທະຍົມຕອນຕົ້ນ ແລະ ຕອນ​ປາຍ​ທົ່ວ​ປະເທດ​ປິດ​ການ​ຮຽນ​ການ​ສອນ​ນັບ​ຕັ້ງ​ແຕ່​ວັນທີ 2 ມີນາ ຈົນ​ກວ່າ​ຈະ​ເລີ່ມ​ປີ​ການ​ສຶກ​ໃໝ່​ໃນໄລຍະຕົ້ນ​ເດືອນເມສາ ເພື່ອ​ປ້ອງ​ກັນການ​ແພ່ເຊື້ອ​ໄວ​ຣັດ.

ແຕ່​ເມື່ອ​ວັນທີ 24 ມີນາ ນາຍົກ​ລັດຖະມົນຕີ​ອາ​ເບະ​ກໍປະ​ກາດວ່າ​ຈະ​ບໍ່​ຂະຫຍາຍ​ຄຳ​ແນະ​ນຳ​ໃຫ້​ປິດ​ໂຮງຮຽນ ໂດຍ​ປ່ອຍ​ໃຫ້ເປັນ​ການ​ຕັດ​ສິນ​ໃຈ​ຂອງ​ລັດຖະບານ​ທ້ອງ​ຖິ່ນ​ວ່າ​ຈະ​ເປີດ ​ຫຼື​ ບໍ່ ຫຼື​ ຈະ​ເປີດ​ເມື່ອໃດ ເຊິ່ງ​ພິຈາລະນາ​ຈາກ​ຈຳນວນ​ຜູ້​ຕິດ​ເຊື້ອ​ໂຄ​ວິດ​-19 ໃນ​ພື້ນ​ທີ່​ຂອງ​ຕົວເອງ.

ກະຊວງ​ສາທາລະນະສຸກ​ຍີ່​ປຸ່ນ​ໄດ້​ອອກ​ແນວ​ທາງ​ປະຕິບັດ​ສຳລັບ​ການ​ເປີດ​ຮຽນ​ອີກ​ເທື່ອ ເຊິ່ງ​ກວມເອົາການ​ເປີດ​ປ່ອງຢ້ຽມລະບາຍ​ອາ​ກາດ​ໃນ​ຊັ້ນ​ຮຽນ, ຮັກສາ​ໄລຍະ​ຫ່າງ​ທາງ​ກາຍະ​ພາບ, ວັດແທກ​ອຸນຫະພູມ​ທຸກ​ມື້​ ແລະ ໃສ່ຜ້າອັດປາກ-ດັງ ໂດຍ​ລັດຖະມົນຕີກະຊວງສຶກ​ສາ​ທິ​ການ​ຍີ່​ປຸ່ນ​ບອກ​ວ່າ ສະພາບ​ແວດ​ລ້ອມ​ໃນ​ແຕ່​ລະ​ພື້ນ​ທີ່​ນັ້ນ​ແຕກ​ຕ່າງ​ກັນ ຈະ​ມີປະ​ສິດ​ທິ​ພາບ​ຫຼາຍກວ່າ​ຫາກປະ​ເມີນ​ຈາກ​ສະຖານະການ​ຕົວຈິງ​ໃນ​ພື້ນ​ທີ່ ແທນ​ທີ່​ຈະ​ສັ່ງ​ການ​ເປັນ​ມາດຕະການ ຫຼື​ ນະໂຍບາຍ​ທົ່ວ​ປະເທດ.

ຂໍ້​ມູນ​ຈາກ​ຢູເນສໂກ​ຊີ້​ວ່າ ຈົນ​ເຖິງ​ຕອນ​ນີ້​ມີ​ໂຮງຮຽນ​ໃນ​ຍີ່​ປຸ່ນ​ໄດ້​ເປີດ​ຮຽນ​ອີກ​ເທື່ອ​ແລ້ວປະ​ມານ​ 40% ເຊິ່ງ​ລາຍ​ງານ​ລະບຸ​ວ່າ​ການ​ໃຫ້​ອຳນາດ​ທາງ​ການ​ທ້ອງ​ຖິ່ນ​ເປັນ​ຜູ້​ຕັດ​ສິນ​ໃຈ​ເລື່ອງ​ເປີດ​ຮຽນ. ສ່ວນໜຶ່ງ​ໜ້າ​ຈະ​ມາ​ຈາກ​ການປະ​ກາດ​ສະຖານະການ​ສຸກ​ເສີນ​ເມື່ອໄລຍະກາງ​ເດືອນເມສາ ຫຼັງ​ຈາກ​ຈຳນວນ​ຜູ້​ຕິດ​ເຊື້ອ​ໃນ​ຍີ່​ປຸ່ນ​ເພີ່ມ​ສູງ​ຂຶ້ນ ໂດຍ​ການປະ​ກາດ​ດັ່ງ​ກ່າວ​ໃຫ້​ອຳນາດ​ຜູ້​ນຳ​ຂອງ 47 ແຂວງ​ໃນ​ການ​ຂໍ​ໃຫ້​ມີ​ການ​ປິດ​ໂຮງຮຽນ ​ແລະ​ ຂໍ​ໃຫ້​ປະຊາຊົນ​ຢູ່​ເຮືອນ.  

ເດນມາກ

ເດນມາກກາຍ​ເປັນ​ຊາດ​ທຳອິດໃນ​ກຸ່ມປະເທດ​ທີ່ປະ​ກາດລັອກ​ດາວໃນ​ຢຸ​ໂຣບ​ທີ່​ໄດ້​ເປີດ​ຮຽນ​ໃໝ່​ອີກ​ເທື່ອ ໂດຍ​ສະຖານ​ຮັບ​ເບິ່ງ​ແຍງ​ເດັກນ້ອຍ, ໂຮງຮຽນ​ອະ​ນຸ​ບານ ​ແລະ ປະ​ຖົມ ຂອງ​ເດນມາກ​ກັບ​ມາ​ເປີດ​ດຳເນີນການ​ອີກ​ເທື່ອ​ເມື່ອໄລຍະກາງ​ເດືອນເມສາ ຖື​ເປັນ​ສ່ວນໜຶ່ງ​ຂອງ​ແຜນ​ຜ່ອນຜັນ​ມາດຕະການລັອກ​ດາວເພື່ອ​ເປີດ​ເມືອງ​ຂອງ​ເດນມາກ​ຫຼັງ​ຈາກ​ທີ່​ອັດຕາ​ຜູ້​ຕິດ​ເຊື້ອ​ລາຍ​ໃໝ່​ຫຼຸດລົງ. 

ໂດຍ The New York Times ລາຍ​ງານ​ວ່າ ໃນ​ມຸມ​ມອງ​ດ້ານ​ເສດຖະກິດ ການ​ເປີດ​ຮຽນ​ເຮັດໃຫ້​ພໍ່​ແມ່​ຜູ້​ປົກຄອງເຊິ່ງ​ເປັນ​ພະນັກງານ​ ຫຼື​ ລູກ​ຈ້າງ​ໄດ້​ສາມາດ​ພຸ່ງ​ເປົ້າ​ໃຫ້​ຄວາມ​ສົນ​ໃຈ​ກັບວຽກ​ງານ​ໄດ້​ຢ່າງ​ເຕັມ​ທີ່ ເພາະ​ການ​ສອນ​ໜັງສື​ ຫຼື​ ເບິ່ງ​ແຍງ​ລູກ​ຢູ່ເຮືອນ​ທຸກ​ມື້​ເຮັດໃຫ້ປະ​ສິດ​ທິ​ພາບ​ການ​ເຮັດ​ວຽກງານ​ຫຼຸດລົງ​ຢ່າງ​ເຫັນ​ໄດ້​ແຈ້ງ. ແຕ່​ຢ່າງໃດ​ກໍ​ຕາມ ມີ​ຜູ້​ປົກຄອງ​ສ່ວນໜຶ່ງ​ທີ່​ບໍ່​ເຫັນ​ດີກັບ​ການ​ເປີດ​ຮຽນ​ອີກ​ເທື່ອ ​ແລະ ​ຕັ້ງ​ກຸ່ມໃນເຟສບຸກ​ເພື່ອ​ຄັດ​ຄ້ານ ເພາະ​ກັງ​ວົນວ່າ​ລູກ​ຂອງ​ພວກ​ເຂົາ​ຈະກາຍ​ເປັນ​ຜູ້​ທີ່​ຕ້ອງ​ເສຍ​ສະຫຼະ​ເພື່ອ​ຮັກສາເສດຖະກິດ​ຂອງ​ເດນມາກ​ໃຫ້​ເດີນ​ໜ້າ​ຕໍ່.

ເມື່ອ​ໂຮງຮຽນ​ໃນ​ເດນມາກ​ກັບ​ມາ​ເປີດ​ຮຽນ​ອີກ​ເທື່ອ ກໍ​ມີ​ມາດຕະການຫຼຸດ​ຄວາມ​ສ່ຽງ​ໃນ​ການ​ການ​ແພ່ເຊື້ອ ເຊັ່ນ: ການ​ຈັດ​ໂຕະ​ໃຫ້​ຫ່າງ​ກັນ 2 ແມັດ ເພື່ອ​ເປັນ​ການ​ປະຕິບັດ​ຕາມ​ແນວ​ທາງ​ຮັກສາໄລຍະ​ຫ່າງ​ທາງ​ສັງຄົມ​ທີ່​ຍັງ​ໃຊ້​ຢູ່.

ນໍເວ

ນໍເວປະ​ກາດ​ປິດ​ໂຮງຮຽນ​ເມື່ອ​ວັນທີ 12 ມີນາ ແຕ່​ກໍ​ບໍ່​ຕ່າງ​ກັບ​ເດນມາກ​ບ່ອນ​ທີ່​ຕັດ​ສິນ​ໃຈ​ໃຫ້​ເດັກ​ນ້ອຍ​ກັບ​ໄປ​ຮຽນ​ທີ່​ໂຮງຮຽນ​ກ່ອນ​ເດັກ​ໃຫຍ່ ຫຼັງ​ອັດຕາ​ການ​ລະບາດ​ຂອງ​ເຊື້ອ​ໄວ​ຣັດ​ຫຼຸດລົງ ໂດຍ​ເປີດ​ໂຮງຮຽນ​ອະ​ນຸ​ບານ​ອີກ​ເທື່ອ​ເມື່ອ​ວັນທີ 20 ເມສາ ກ່ອນ​ຕາມ​ດ້ວຍ​ການ​ເປີດ​ໂຮງຮຽນປະ​ຖົມ ຊັ້ນ ປ. 1-4 ເມື່ອ​ວັນທີ 27 ເມສາ.

ນາຍົກ​ລັດຖະມົນຕີ 'ເອີນາ ໂຊລເບີກ' ຂອງ​ນໍເວກ່າວລະຫວ່າງ​ການຖະແຫຼງ​ຂ່າວ​ເມື່ອໄລຍະຕົ້ນ​ເດືອນເມສາ ວ່າ​ທຸກ​ຝ່າຍ​ໄດ້​ຮ່ວມ​ກັນ​ຄວບ​ຄຸມ​ໄວ​ຣັດ. ດັ່ງ​ນັ້ນ​ນໍເວ​ຈຶ່ງ​ສາມາດ​ຄ່ອຍ​ໆເປີດ​ກິດຈະກຳ​ທາງ​ສັງຄົມ​ໄດ້​ເທື່ອ​ລະໜ້ອຍ. ​ເພື່ອ​ສະໜັບ​ສະໜຸນ​ການ​ເວັ້ນ​ໄລຍະ​ທາງ​ສັງຄົມ ລັດຖະບານ​ໄດ້​ຂໍ​ໃຫ້​ໂຮງຮຽນ​ແບ່ງ​ຊັ້ນ​ຮຽນ​ອອກ​ເປັນ​ກຸ່ມ ບໍ່​ເກີນ​ກຸ່ມລະ 15 ຄົນ ແລະ​ ຕ້ອງ​ອະນາໄມ​ໂຕະ​ຮຽນ​ທຸກ​ມື້ ລວມທັງຍັງມີ​ມາດຕະການປ້ອງ​ກັນ​ອື່ນ​ໆ./

ເຢຍລະມັນ

ໂຮງຮຽນ​ມັດທະຍົມຕອນປາຍ​ໃນ​ເຢຍລະມັນກັບມາ​ເປີດ​ຮຽນ​ອີກ​ເທື່ອ​ເມື່ອ​ເດືອນ​ວັນທີ 20 ເມສາ ເພື່ອ​ໃຫ້​ນັກ​ຮຽນ​ມັດທະຍົມຕອນປາຍ​ໄດ້​ກຽມສອບ​ເສັງຈົບ​. ​ກ່ອນ​ໜ້າ​ນີ້​ໂຮງຮຽນ​ ແລະ ໂຮງລ້ຽງເດັກເກືອບ​ທັງ​ໝົດ​ທົ່ວ 16 ລັດ​ຂອງ​ເຢຍລະມັນ​ໄດ້​ປິດ​ດຳເນີນການ​ເມື່ອງໄລຍະກາງ​ເດືອນ​ມີນາ.

ຂະນະ​ທີ່​ລາຍ​ງານ​ລະບຸ​ວ່າ ການ​ຕັດ​ສິນ​ໃຈ​ວ່າ​ຈະ​ເປີດ​ໂຮງຮຽນ​ແນວໃດ​ ແລະ​ ຄວນ​ມີ​ມາດຕະການປ້ອງ​ກັນແນວໃດ​ແດ່​ເປັນ​ຄວາມ​ຮັບ​ຜິດຊອບ​ຂອງ​ແຕ່​ລະລັດ ແຕ່​ຢ່າງໜ້ອຍ​ຕ້ອງ​ຈັດ​ໂຕະ​ໃຫ້​ຫ່າງ​ກັນ 1.5 ແມັດ ລວມທັງຕິດ​ຕັ້ງ​ອ່າງ​ລ້າງ​ມື ​ແລະ ​ສະ​ບູ​ຂ້າ​ເຊື້ອ​ໃຫ້​ພຽງ​ພໍ. 

ນິວ​ຊີ​ແລນ 

ໂຮງຮຽນ​ໃນ​ນິວ​ຊີ​ແລນກັບມາ​ເປີດ​ຮຽນ​ອີກ​ເທື່ອ​ໃນ​ວັນທີ 18 ພຶດສະພາ ຫຼັງ​ຕ້ອງ​ຮຽນ​ຢູ່ເຮືອນ​ເປັນ​ເວລາ 2 ເດືອນ​ຈາກ​ມາດຕະການລັອກ​ດາວ. ​ລັດຖະມົນຕີກະຊວງສຶກ​ສາ​ທິ​ການ​ລະບຸ​ວ່າ ສານ​ທີ່​ລັດຖະບານ​ຕ້ອງ​ການ​ສົ່ງ​ອອກ​ໄປ​ຄື ມີ​ຄວາມ​ປອດໄພ​ທີ່​ຈະ​ສົ່ງ​ເດັກ​ນ້ອຍກັບ​ໄປ​ຍັງ​ໂຮງຮຽນ​ ແລະ​ ພະຍາຍາມ​ຮຽນ​ໃຫ້​ທັນ​ຄວາມ​ຮູ້​ຕ່າງ​ໆ ທີ່​ອາດ​ຫາຍ​ໄປ​ລະຫວ່າງໄລຍະລັອກ​ດາວ.

ນິວ​ຊີ​ແລນເປັນ​ອີກ​ປະເທດ​ທີ່​ໄດ້ຮັບ​ສຽງ​ຊົມເຊີຍ​ຈາກ​ການ​ຄວບ​ຄຸມ​ການ​ລະບາດ​ຂອງ​ໂຄ​ວິດ​-19 ໂດຍ​ມີ​ການ​ໃຊ້​ມາດຕະການລັອກ​ດາວເຂັ້ມ​ງວດ​ຕັ້ງ​ແຕ່​ປາຍ​ເດືອນມີນາ ເຖິງວ່າຈະມີ​ຂໍ້​ຫ້າມ​ກ່ຽວກັບ​ການ​ລັອກ​ດາວ ສ່ວນ​ໃຫຍ່​ຈະ​ສີ້ນສຸດ​ລົງ​ເມື່ອ​ວັນພະຫັດທີ 14 ມີນາທີ່​ຜ່ານມາ ແຕ່​ກໍ​ມີ​ການ​ຕໍ່​ເວລາ​ພິເສດ​ໃຫ້​ກັບ​ໂຮງຮຽນ ເນື່ອງ​ຈາກ​ເປັນ​ເລື່ອງ​ຍາກ​ທີ່​ຈະ​ໃຊ້​ລະບຽບ​ດ້ານ​ການ​ຮັກສາສຸຂານາໄມ​ໃນ​ໝູ່​ເດັກ​ນ້ອຍ.

ລາຍ​ງານ​ລະບຸ​ວ່າ ​ແທນ​ທີ່​ຜູ້​ປົກຄອງ​ຈະ​ຍ່າງ​ໄປ​ສົ່ງ​ລູກ​ຢູ່​ຫ້ອງ​ຮຽນ ທາງ​ໂຮງຮຽນ​ໄດ້​ກຳນົດ​ໂຊນ “kiss and go” ໃຫ້​ພໍ່​ແມ່​ສົ່ງ​ລູກ. ສ່ວນ​ສູນ​ເບິ່ງ​ແຍງ​ເດັກ​ນ້ອຍກໍ​ຈະ​ມີ​ການ​ບັນ​ທຶກ​ຂໍ້​ມູນ​ສ່ວນ​ຕົວທີ່​ຈຳ​ເປັນ​ສຳລັບ​ການ​ຕິດ​ຕາມ​ຜູ້​ສຳຜັດ​ເຊື້ອ.

ຂະນະ​ທີ່​ຜູ້​ປົກຄອງ​ບາງ​ຄົນ​ບອກ​ວ່າ ເຖິງວ່າ​ຈະ​ກັງ​ວົນ​ເລື່ອງສຸຂະພາບ​ຂອງ​ລູກ​ຢູ່​ແດ່ ແຕ່​ກໍ​ເຊື່ອ​ໃນ​ຂໍ້​ມູນ​ທີ່​ໄດ້ຮັບ​ຈາກ​ລັດຖະບານ ວ່າ​ຄົງ​ບໍ່​ເປີດ​ຮຽນ​ອີກ​ເທື່ອ​ຫາກ​ຍັງມີ​ຄວາມ​ສ່ຽງ​ຕໍ່​ເດັກ​ນ້ອຍ.

Advertisement Replay Ad

ຂໍຂອບໃຈ

ຂໍ້ມູນ : World Economic Forum , Sky News , The Local Dk , South China Morning Post , Unesco

ພາບ : AFP

"ທ່ານໝໍນຸ້ຍ" ທຸ້ມເທກາຍ ແລະ ໃຈ ໃນການປະຕິບັດໜ້າທີ່ ສູ້ກັບໂຄວິດ-19

"ທ່ານໝໍນຸ້ຍ" ທຸ້ມເທກາຍ ແລະ ໃຈ ໃນການປະຕິບັດໜ້າທີ່ ສູ້ກັບໂຄວິດ-19

ສົມຫວັງ ໄຊສັກດີ ມືລະນາດວົງຕິ່ງນ່ອຍໆ ຄິດໄກກວ່າການຫຼິ້ນດົນຕີລາວເດີມ!

ສົມຫວັງ ໄຊສັກດີ ມືລະນາດວົງຕິ່ງນ່ອຍໆ ຄິດໄກກວ່າການຫຼິ້ນດົນຕີລາວເດີມ!

"ຂ້ອຍເຄີຍຖືກເຂົາເວົ້າໃຫ້ວ່າຂີ້ລ້າຍ" ເລື່ອງລາວການຖືກຂົ່ມເຫງ ບັນຫາທີ່ຝັງຮາກເລິກໃນສັງຄົມລາວ

"ຂ້ອຍເຄີຍຖືກເຂົາເວົ້າໃຫ້ວ່າຂີ້ລ້າຍ" ເລື່ອງລາວການຖືກຂົ່ມເຫງ ບັນຫາທີ່ຝັງຮາກເລິກໃນສັງຄົມລາວ

ບາງຂໍ້ກົດໝາຍທີ່ຄູ່ຜົວເມຍຄວນຮູ້ ກ່ອນທີ່ຈະຕັດສິນໃຈໄປມີເລັກມີນ້ອຍ

ບາງຂໍ້ກົດໝາຍທີ່ຄູ່ຜົວເມຍຄວນຮູ້ ກ່ອນທີ່ຈະຕັດສິນໃຈໄປມີເລັກມີນ້ອຍ

ຄວນຢຸດໄດ້ແລ້ວ ຄອມເມັ້ນ "ສົນໃຈເດີ" ຖ້າຢາກໄດ້ວຽກ ຢ່າເຮັດ!

ຄວນຢຸດໄດ້ແລ້ວ ຄອມເມັ້ນ "ສົນໃຈເດີ" ຖ້າຢາກໄດ້ວຽກ ຢ່າເຮັດ!

ລົດໜັກພາຂົວຫັກ: ຂົວນໍ້າພະນາຍ ບ້ານເກິນຫັກ ກະທົບການສັນຈອນ

ລົດໜັກພາຂົວຫັກ: ຂົວນໍ້າພະນາຍ ບ້ານເກິນຫັກ ກະທົບການສັນຈອນ

ຢາກເດີນທາງເຂົ້າ-ອອກລາວຕ້ອງເຮັດແນວໃດ? ນີ້ແມ່ນທຸກຢ່າງທີ່ເຈົ້າຕ້ອງຮູ້ໄວ້

ຢາກເດີນທາງເຂົ້າ-ອອກລາວຕ້ອງເຮັດແນວໃດ? ນີ້ແມ່ນທຸກຢ່າງທີ່ເຈົ້າຕ້ອງຮູ້ໄວ້

ທຸກຢ່າງທີ່ຜູ້ອອກແຮງງານຕ້ອງຮູ້ ກ່ຽວກັບມາດຕະການດ້ານແຮງງານໃນໄລຍະ ແລະ ຫຼັງການລະບາດຂອງໂຄວິດ-19

ທຸກຢ່າງທີ່ຜູ້ອອກແຮງງານຕ້ອງຮູ້ ກ່ຽວກັບມາດຕະການດ້ານແຮງງານໃນໄລຍະ ແລະ ຫຼັງການລະບາດຂອງໂຄວິດ-19

ນີ້ແມ່ນກົນໂກງຂອງແມ່ຫວຍອອນລາຍ ໃຊ້ຕົວະຕົ້ມເອົາເງິນຂອງລູກຫວຍຫຼາຍກວ່າ 1,500 ລ້ານກີບ

ນີ້ແມ່ນກົນໂກງຂອງແມ່ຫວຍອອນລາຍ ໃຊ້ຕົວະຕົ້ມເອົາເງິນຂອງລູກຫວຍຫຼາຍກວ່າ 1,500 ລ້ານກີບ

ສະຫຼຸບເຫດການ ຊາຍຜິວດຳຢູ່ສະຫະລັດເສຍຊີວິດຫຼັງຖືກຕຳຫຼວດຈັບກຸມ ຈົນກາຍເປັນກະແສໄປທົ່ວໂລກ

ສະຫຼຸບເຫດການ ຊາຍຜິວດຳຢູ່ສະຫະລັດເສຍຊີວິດຫຼັງຖືກຕຳຫຼວດຈັບກຸມ ຈົນກາຍເປັນກະແສໄປທົ່ວໂລກ

ໂຄວິດ-19 ມີຜົນກະທົບແນວໃດ ຕໍ່ການປ່ຽນແປງດິນຟ້າອາກາດ?

ໂຄວິດ-19 ມີຜົນກະທົບແນວໃດ ຕໍ່ການປ່ຽນແປງດິນຟ້າອາກາດ?

ເກີດເຫດ! ລີງອິນເດຍລັກຕົວຢ່າງເລືອດຂອງຜູ້ຕິດເຊື້ອໂຄວິດ-19 ພ້ອມທຳຮ້າຍເຈົ້າໜ້າທີ່

ເກີດເຫດ! ລີງອິນເດຍລັກຕົວຢ່າງເລືອດຂອງຜູ້ຕິດເຊື້ອໂຄວິດ-19 ພ້ອມທຳຮ້າຍເຈົ້າໜ້າທີ່

ນີ້ແມ່ນ 4 ກິດຈະກຳທີ່ສາມາດກັບມາເຄື່ອນໄຫວໄດ້ຄືນ ຫຼັງຈາກທີ່ລັດຜ່ອນຜັນບາງມາດຕະການເພີ່ມ

ນີ້ແມ່ນ 4 ກິດຈະກຳທີ່ສາມາດກັບມາເຄື່ອນໄຫວໄດ້ຄືນ ຫຼັງຈາກທີ່ລັດຜ່ອນຜັນບາງມາດຕະການເພີ່ມ

ສະຫະລັດກຽມຖອດຖອນສະຖານະພິເສດຂອງຮົງກົງ ຊີ້ບໍ່ເປັນອິດສະຫຼະຈາກຈີນອີກຕໍ່ໄປ

ສະຫະລັດກຽມຖອດຖອນສະຖານະພິເສດຂອງຮົງກົງ ຊີ້ບໍ່ເປັນອິດສະຫຼະຈາກຈີນອີກຕໍ່ໄປ

ສໍາເລັດແລ້ວ! ຫໍພຣະເມນ ອົງພຣະຍອດແກ້ວມະຫາສັງຄະສຸທັມມາທິບໍດີ ມະຫາງອນ ດຳຣົງບຸນ

ສໍາເລັດແລ້ວ! ຫໍພຣະເມນ ອົງພຣະຍອດແກ້ວມະຫາສັງຄະສຸທັມມາທິບໍດີ ມະຫາງອນ ດຳຣົງບຸນ

ທົ່ວປະເທດມີແຜນປູກຕົ້ນໄມ້ 5 ແສນກວ່າເບ້ຍ ໃນວັນປູກຕົ້ນໄມ້ແຫ່ງຊາດ

ທົ່ວປະເທດມີແຜນປູກຕົ້ນໄມ້ 5 ແສນກວ່າເບ້ຍ ໃນວັນປູກຕົ້ນໄມ້ແຫ່ງຊາດ

ກວດເບິ່ງເລີຍ ຜົນຫວຍວັນທີ 28 ພຶດສະພາ 2020 ເລກ 1 2 3 4 5 ໂຕ ແລະ ຫວຍຕຳລາຝັນ 3/40

ກວດເບິ່ງເລີຍ ຜົນຫວຍວັນທີ 28 ພຶດສະພາ 2020 ເລກ 1 2 3 4 5 ໂຕ ແລະ ຫວຍຕຳລາຝັນ 3/40

ກະຊວງປ້ອງກັນປະເທດ ປະກາດເລື່ອນຊັ້ນໃຫ້ນາຍທະຫານຊັ້ນພັນຕີຂຶ້ນພັນໂທ 323 ສະຫາຍ

ກະຊວງປ້ອງກັນປະເທດ ປະກາດເລື່ອນຊັ້ນໃຫ້ນາຍທະຫານຊັ້ນພັນຕີຂຶ້ນພັນໂທ 323 ສະຫາຍ

ສູບຢາແບບໃດໃຫ້ດີຕໍ່ສຸຂະພາບ? ເມື່ອນະວັດຕະກຳການສູບຢາແບບໃໝ່ ອາດບໍ່ໄດ້ປອດໄພຄືກັບທີ່ຄິດ

ສູບຢາແບບໃດໃຫ້ດີຕໍ່ສຸຂະພາບ? ເມື່ອນະວັດຕະກຳການສູບຢາແບບໃໝ່ ອາດບໍ່ໄດ້ປອດໄພຄືກັບທີ່ຄິດ

ສວນສະໜຸກອາດບໍ່ສະໜຸກຄືຊື່ ເມື່ອຍີ່ປຸ່ນກຽມໃຫ້ເປີດອີກຄັ້ງ ແຕ່ຫ້າມ "ຮ້ອງ" ຂະນະຫຼິ້ນເຄື່ອງຫຼິ້ນ

ສວນສະໜຸກອາດບໍ່ສະໜຸກຄືຊື່ ເມື່ອຍີ່ປຸ່ນກຽມໃຫ້ເປີດອີກຄັ້ງ ແຕ່ຫ້າມ "ຮ້ອງ" ຂະນະຫຼິ້ນເຄື່ອງຫຼິ້ນ

ສົ່ງອີເມວຫາໝູ່

ສົ່ງໃຫ້ໝູ່ຫຼາຍຄົນ “,” (ສົ່ງພ້ອມກັນຫຼາຍສຸດ 50 ອີເມວ)

ສົ່ງອີເມວ