ວັນເສົາ ທີ 6 ມິຖຸນາ 2020

ເປີດໃຈຜູ້ລິເລີ່ມໂຄງການສ້າງອາຄານຮຽນໃນຊົນນະບົດ ພ້ອມແນະວິທີຄິດເມື່ອຖືກຫາວ່າເຮັດດີສ້າງພາບ

ເປີດໃຈຜູ້ລິເລີ່ມໂຄງການສ້າງອາຄານຮຽນໃນຊົນນະບົດ ພ້ອມແນະວິທີຄິດເມື່ອຖືກຫາວ່າເຮັດດີສ້າງພາບ
S! Muan

ສະໜັບສະໜູນເນື້ອຫາ

ເມື່ອການເຮັດເພື່ອສັງຄົມທີ່ເປັນໂຄງການໃຫຍ່ຄັ້ງທຳອິດໃນຊີວິດ ເລີ່ມຈາກການລອງຜິດລອງຖືກ, ໃນລະຫວ່າງທາງ "ພະນິດາ ໄຊຍະວົງ" ຫຼື "ໂອ໋" ຕ້ອງພົບກັບຄວາມທ້າທາຍໃນແຕ່ລະບົດທີ່ປ່ຽນແປງໄປເລື້ອຍໆກ່ອນທີ່ຈະກ້າວສູ້ບົດຈົບ ນັ້ນກໍຄືຄວາມສຳເລັດ ແລະ ສິ່ງນີ້ໄດ້ເປັນການຖາງທາງເພື່ອກຽມຕໍ່ຍອດໄປສູ່ເລື່ອງລາວການຊ່ວຍເຫຼືອຄັ້ງໃໝ່ໃນອະນາຄົດທີ່ຈະຕາມມາ.

ພະນິດາ ເປັນເຈົ້າຂອງເພຈ ຢາກແຕ້ມ & ຢາກເວົ້າ ເຊິ່ງເປັນເພຈເຜີຍແຜ່ຜົນງານກາຕູນທີ່ຜູ້ກ່ຽວແຕ້ມຂຶ້ນມາເອງ ແລະ ໃນໄລຍະທີ່ຜ່ານມາຜູ້ກ່ຽວກໍຍັງໄດ້ເຄື່ອນໄຫວຊ່ວຍເຫຼືອສັງຄົມມາໂດຍຕະຫຼອດເມື່ອເກີດສະຖານະການໃດໜຶ່ງທີ່ສ້າງຜົນກະທົບຕໍ່ກັບຄົນໃນພື້ນທີ່ຕ່າງໆທົ່ວປະເທດ. ເວົ້າໄດ້ຢ່າງເຕັມປາກວ່າ ຜູ້ກ່ຽວເປັນ ຕົ້ນແບບແຫ່ງການເຮັດຄວາມດີ ທີ່ໜ້າເອົາເປັນແບບຢ່າງ.


ພະນິດາ ເຈົ້າຂອງເພຈ ຢາກແຕ້ມ & ຢາກເວົ້າ ເຊິ່ງເປັນເພຈກາຕູນລາວ ມີຜູ້ຕິດຕາມຈຳນວນ 84,000 ກວ່າຄົນ / ພາບ: Phanida Xayavong

ນັກເຄື່ອນໄຫວເພື່ອຊ່ວຍເຫຼືອສັງຄົມຄົນນີ້ ຈະມາແບ່ງປັນເລື່ອງລາວເສັ້ນທາງການລະດົມທຶນສ້າງອາຄານຮຽນຢູ່ ໂຮງຮຽນມັດທະຍົມສຶກສາຕອນຕົ້ນບ້ານກັດ ທີ່ເມືອງໄຊ ແຂວງອຸດົມໄຊ ລວມທັງເປີດເຜີຍແຜນການໃນອະນາຄົດ ວ່າຈະໃຊ້ຄວາມຕັ້ງໃຈທີ່ເຕັມປ່ຽມໄປດ້ວຍຈິດອັນກຸສົນນີ້ເຮັດຫຍັງຕໍ່ ພ້ອມທັງແນະນຳວິທີຄິດໃຫ້ຄົນທົ່ວໄປທີ່ກຳລັງເຮັດຄວາມດີແກ່ສັງຄົມ ແລ້ວຖືກຫາວ່າ "ເຮັດດີສ້າງພາບ".

ຄວາມເປັນມາຂອງເສັ້ນທາງແຫ່ງການກໍ່ສ້າງອາຄານຮຽນຫຼັງງາມ

ໂອ໋ ເລົ່າວ່າ ທຳອິດແມ່ນເລີ່ມຈາກໄປບໍລິຈາກເຄື່ອງຢູ່ ເມືອງໄຊ ແຂວງອຸດົມໄຊ ເມື່ອປີ 2017 ແລ້ວເຫັນສະພາບຂອງໂຮງຮຽນຂອງເຂົາເຈົ້າ ເລີຍລົມກັນກັບໝູ່ວ່າຈະລະດົມທຶນປຸກໂຮງຮຽນ. ແຕ່ໃນຕອນນັ້ນ ການລະດົມທຶນແມ່ນບໍ່ເຄີຍເຮັດ ເລີຍຄິດວ່າຈະເຮັດພຽງແຕ່ການສ້ອມແປງຊື່ໆ ເພາະບໍ່ເຄີຍເຮັດການປຸກສ້າງໂຮງຮຽນເປັນຫຼັງຂະໜາດນັ້ນ. ເບື້ອງຕົ້ນກໍມີການຕີມູນຄ່າ ໄດ້ປຶກສາກັບຫ້ອງການສຶກສາທິການ ແລະ ກີລາ ເມືອງໄຊ ໂດຍເພິ່ນຕີມູນຄ່າມາຈຳນວນໜຶ່ງ ແຕ່ເຮົາເອງກໍຕີມູນຄ່າເອງຈຳນວນໜຶ່ງ ເພາະຂອງເຂົາເຈົ້າມີມູນຄ່າຂ້ອນຂ້າງສູງກວ່າທີ່ເຮົາຈະສາມາດເຮັດໄດ້.


ຫ້ອງຮຽນໃນອາຄານຫຼັງເກົ່າຂອງໂຮງຮຽນມັດທະຍົມຕອນຕົ້ນບ້ານກັດ / ພາບ: ຢາກແຕ້ມ & ຢາກເວົ້າ

"ເຮົາກໍໄດ້ໄປພົບກັບບໍລິສັດກໍ່ສ້າງ ທີ່ວ່າຂ້ອນຂ້າງມີຈິດໃຈຢາກຊ່ວຍເຫຼືອ ຈາກມູນຄ່າ 320 ລ້ານກີບ ເຂົາເຈົ້າກໍຮ່ວມບໍລິຈາກນຳ 20 ລ້ານເລີຍ ເຮັດໃຫ້ມູນຄ່າຍັງເຫຼືອພຽງແຕ່ 300 ລ້ານ ແລະ ພິເສດຍັງສາມາດຕິດໜີ້ໂຄງການໄດ້ ຖ້າວ່າລະດົມທຶນບໍ່ສຳເລັດ ເພາະວ່າເຂົາກໍໝັ້ນໃຈໃນໂຕເຮົາ. ບາດນີ້ ທາງບໍລິສັດກໍ່ສ້າງກໍໄດ້ຕົກລົງເຮັດສັນຍາຮ່ວມກັນ ແລະ ກໍເລີ່ມລະດົມທຶນ ເຊິ່ງທຳອິດແມ່ນເຮັດຜ່ານທາງເພຈ ຢາກແຕ້ມ & ຢາກເວົ້າ ໂດຍໃຊ້ບັນຊີຂອງທາງໂຮງຮຽນເອງ ເຊິ່ງມີການເພີ່ມລາຍຊື່ຂອງເອື້ອຍເຂົ້າໄປ ເພື່ອໄປເບິ່ງແຍງຮ່ວມກັນ ແລະ ກໍມີຕົວແທນຈາກສຶກສາເມືອງມີຊື່ເຂົ້າໃນບັນຊີດັ່ງກ່າວ ເພື່ອເບິ່ງແຍງຮ່ວມກັນ."


ພະນິດາ ໄຊຍະວົງ (ເສື້ອແດງ) ຮ່ວມປຶກສາຫາລືກັບຫ້ອງການສຶກສາທິການ ແລະ ກີລາ ເມືອງໄຊ ແຂວງອຸດົມໄຊ, ນາຍບ້ານ ແລະ ອຳນວຍການໂຮງຮຽນມັດທະຍົມຕອນຕົ້ນບ້ານກັດ / ພາບ: ຢາກແຕ້ມ & ຢາກເວົ້າ

ນັກເຄື່ອນໄຫວເພື່ອຊ່ວຍເຫຼືອສັງຄົມຄົນນີ້ກ່າວອີກວ່າ ການລະດົມໃນເບື້ອງຕົ້ນກໍໝັ້ນໃຈວ່າ ເຮົາກໍເພຈໃຫຍ່ເຕີບ ແລະ ຄິດວ່າຈະມີຫຼາຍໆຄົນມາຊ່ວຍ ມັນຕ້ອງໄດ້ 300 ລ້ານ. "ແຕ່ວ່າຜ່ານໄປ 9 ເດືອນລະດົມໄດ້ພຽງແຕ່ 30 ປາຍລ້ານ ແລະ ເມືື່ອໃກ້ເຂົ້າ 40 ລ້ານ ກໍເກີດຄວາມຄິດທໍ້ໃຈ ແລະ ໂທໄປຄອບທາງໂຮງຮຽນວ່າ ຄືຊິໄດ້ແຕ່ເທົ່ານີ້ແລ້ວ ກໍມີແຕ່ປ່ຽນຈາກຝາກະແຕະຈັ່ງຊັ້ນ ກໍປ່ຽນເປັນໄມ້ແປ້ນ ແລະ ພື້ນກໍອາດຈະເທໃຫ້ງາມຂຶ້ນ ສັງກະສີກໍປ່ຽນເປັນມຸງກະເບື້ອງ ເພື່ອໃຫ້ນ້ອງໆເຂົາເຈົ້າບໍ່ຮ້ອນ," ໂອ໋ ກ່າວ. "ຫຼັງຈາກນັ້ນ ກໍມີທາງທະນາຄານ JDB ເຂົາເຈົ້າເຫັນໂຄງການຂອງພວກເຮົາ ເຂົາກໍເຂົ້າມາຊ່ວຍມູນຄ່າ 100 ລ້ານ ກໍຖືວ່າເບົາໄປເລີຍ ແຕ່ແນວໃດກໍຍັງຖືວ່າຍັງອີກຫ່າງໄກ ເພາະຍັງເຫຼືອອີກເຄິ່ງໜຶ່ງ."

ການລະດົມທຶນງວດທີສອງມີໝູ່ເຂົ້າມາຊ່ວຍໂອ໋ ເຊິ່ງກໍຖືວ່າດີຂຶ້ນ ໂດຍໃນຮອບນີ້ແມ່ນມີການເຂົ້າຫາບໍລິສັດຕ່າງ. ດ້ວຍຄວາມທີ່ບໍ່ເຄີຍເຮັດ ບໍ່ເຄີຍຮູ້ມາກ່ອນ ອີກຢ່າງກໍບໍ່ໄດ້ເປັນຄົນທີ່ເປັນທີ່ຮູ້ຈັກ, ທຸກບໍລິສັດກໍຖາມວ່າ "ຂ້ອຍເອົາໃຫ້ເຈົ້າ ແລ້ວເຈົ້າເອົາຫຍັງໃຫ້ຂ້ອຍ?" ແລ້ວໂອ໋ເອງກໍບໍ່ມີຄຳຕອບ ເພາະບໍ່ແມ່ນການຕະຫຼາດ ບໍ່ຮູ້ວ່າຕ້ອງຂຶ້ນໂລໂກ້ ຕ້ອງໂຄສະນາແນວໃດ ແລະ ເຂົາເຈົ້າກໍບໍ່ໃຫ້. "ກໍບໍ່ຜິດເນາະ ເຂົາເຈົ້າກໍເບິ່ງໃນມຸມຂອງເຂົາເຈົ້າ ເຮົາກໍເບິ່ງໃນມຸມຂອງເຮົາ", ໂອ໋ ກ່າວ.


ພະນິດາ, ມິດປະຊາ, ລົດແກ້ວ ແລະ ກະຕ່າຍ ກຳລັງຫຼັກຂອງໂຄງການລະດົມທຶນສ້າງອາຄານຮຽນຫຼັງໃໝ່ / ພາບ: Phanida Xayavong

ລະດົມໄປລະດົມມາ ສູງສຸດກໍມີບໍລິສັດພົງຊັບທະວີມາຊ່ວຍ, ມີໂຈໂຈ້ ມິຣາໂຄ້ ເຊິ່ງຕອນນັ້ນກໍໄດ້ທັງໝົດປະມານ 230 ກວ່າລ້ານ ກໍຍັງຂາດອີກຕື່ມ 77 ລ້ານ. ກໍເລີຍໂອ້ລົມກັບໝູ່ວ່າເຮົາຈະເຮັດແນວໃດ ມັນຍັງຂາດຢູ່ສໍ່ານັ້ນ ແຕ່ອາຄານຮຽນທີ່ກໍ່ສ້າງນັ້ນແມ່ນສຳເລັດແລ້ວ ແຕ່ບໍລິສັດກໍ່ສ້າງເຂົາເຫັນວ່າເຮົາບໍ່ແມ່ນຄົນທີ່ຈະເອົາເງິນພວກນີ້ໄປເຮັດອັນອື່ນ ເພາະວ່າເງິນມັນຍັງຢູ່ໃນບັນຊີ ຍັງຮັບຮູ້ນຳກັນ ແລະ ເບິ່ງນຳກັນທຸກເດືອນວ່າໄດ້ເທົ່າໃດແລ້ວ.

ສຸດທ້າຍມາ ລົດແກ້ວ ອິນທະກຸມມານ ເຊິ່ງເປັນນັກແລ່ນຍິງຊື່ດັງຂອງລາວກໍເຂົ້າມາຊ່ວຍ ໂດຍການຊັກຊວນກັນຈັດງານແລ່ນເປັນງານແລ່ນ ເຊິ່ງນີ້ກໍເປັນສິ່ງທີ່ທ້າທາຍເຊັ່ນເດີມ ເພາະບໍ່ເຄີຍເຮັດມາກ່ອນ ກໍເລີຍລົມກັນໄປມາ ແລະ ຕົກລົງຈັດງານແລ່ນຮ່ວມກັນ ໂດຍໃນນັ້ນຈະຫັກຄ່າໃຊ້ຈ່າຍ ເພາະບາງຢ່າງມັນກໍມີຄ່າໃຊ້ຈ່າຍ ແຕ່ສ່ວນໃຫຍ່ກໍແມ່ນທາງຜູ້ສະໜັບສະໜຸນເຂົາເຈົ້າຈະໃຫ້ບໍ່ວ່າຈະເປັນເວທີ, ນໍ້າດື່ມ ແລະ ອີກຫຼາຍໆຢ່າງແມ່ນຟຣີໝົດ ອາຫານກໍຟຣີໝົດ. ການຈັດງານຄັ້ງນີ້ແມ່ນຈັດຮ່ວມກັບພະແນກສຶກສາທິການ ແລະ ກີລານະຄອນຫຼວງນຳອີກ ເຊິ່ງຫຼັງຈາກຈົບງານແລ້ວແມ່ນລະດົມໄດ້ 130 ກວ່າລ້ານ.


ພາບບັນຍາກາດຈາກງານ "ແລ່ນເພື່ອນ້ອງ" ເຊິ່ງຈັດຂຶ້ນເມື່ອເດືອນມິຖຸນາ 2019 ເພື່ອລະດົມທຶນສົມທົບໃສ່ການກໍ່ສ້າງອາຄານຮຽນຢູ່ເມືອງໄຊ / ພາບ: ຢາກແຕ້ມ & ຢາກເວົ້າ

ເງິນດັ່ງກ່າວແມ່ນໄດ້ຫັກກັບໜີ້ເກົ່າ 77 ລ້ານ ແລະ ເຫຼືອຈາກນັ້ນກໍມອບໃຫ້ໂຮງຮຽນເພື່ອສ້າງຫ້ອງນໍ້າ ເຊິ່ງຕອນນີ້ການກໍ່ສ້າງສຳເລັດແລ້ວ ແຕ່ຍັງບໍ່ທັນໄດ້ໄປ ເພາະຄາໂຄວິດ-19 ເຊິ່ງປົກກະຕິແມ່ນທີມງານຂອງ ໂອ໋ ຈະຕ້ອງໄດ້ໄປເມື່ອສຳເລັດແຕ່ລະກ້າວ.


ອາຄານຮຽນຂອງໂຮງຮຽນມັດທະຍົມຕອນຕົ້ນບ້ານກັດທີ່ກໍ່ສ້າງສຳເລັດແລ້ວ / ພາບ: ຢາກແຕ້ມ & ຢາກເວົ້າ

ຈົບໂຄງການ ໂລ່ງໃຈຫຼາຍ ແຕ່ບໍ່ຫຼາບ! ຍັງຕ້ອງກ້າວເດີນຕໍ່

ໂອ໋ ກ່າວຕິດຕະຫຼົກວ່າ ຖ້າຈະເວົ້າວ່າ ຮູ້ສຶກໂລ່ງໃຈ ກໍໂລ່ງຢູ່ ຖ້າຈະວ່າຫຼາບກໍບໍ່ເຖິງຂັ້ນຫຼາບ ແຕ່ຮູ້ສຶກວ່າວ່າມັນເປັນບົດຮຽນອັນໜຶ່ງ ເລີ່ມຈາກຄົນທີ່ບໍ່ຮູ້ຫຍັງ ແລ້ວຕົນເອງກໍເຮັດດ້ວຍຄວາມໂລເລ ແຕ່ໃຈມັນມີ ກໍເລີຍບືນໄປທຸກທາງ ແລະ ສຸດທ້າຍມັນກໍສຳເລັດ. ບາດນີ້ເມື່ອສຳເລັດແລ້ວ ເຫັນວ່າຄົນເຂົາເຊື່ອຫຼາຍ ເພາະຕົນເອງເວົ້າໄປແລ້ວກໍເຮັດແທ້.

"ຖ້າສົມມຸດເຮົາເຮັດໂຄງການນັ້ນຂຶ້ນມາແລ້ວມັນບໍ່ສຳເລັດ ແລ້ວມັນເປັນຄັ້ງທຳອິດຂອງເຮົາອີກ ເຮັດໄປເຂົາກໍບໍ່ເຊື່ອເຮົາແລ້ວ ໄປລະດົມທຶນເຂົາກໍບໍ່ຢາກໝັ້ນໃຈເຮົາແລ້ວ. ບາດນີ້ກໍຮູ້ສຶກອີກວ່າ ໂຮງຮຽນຫຼັງນີ້ກໍຍັງເຮັດໄດ້ ສະນັ້ນກໍຍັງຈະເຮັດອີກ ໂດຍເປົ້າໝາຍຕໍ່ໄປແມ່ນຈະໄປຜົ້ງສາລີ. ຫຼັງຈາກນັ້ນ ກໍຈຶ່ງຈະຄ່ອຍໄປແຂວງອື່ນຕໍ່ໆໄປອີກ."


ພະນິດາ ຢາກໃຊ້ຄວາມສາມາດໃນການແຕ້ມກາຕູນຂອງຕົນເອງໃນການເຮັດປຶ້ມແນະນຳກິດຈະກຳການຫຼິ້ນສຳລັບເດັກນ້ອຍ / ພາບ: Phanida Xayavong

ນອກຈາກວຽກການຊ່ວຍເຫຼືອກໍ່ສ້າງອາຄານຮຽນແລ້ວ ໂອ໋ ກໍຍັງຢາກເຮັດປຶ້ມແນະນຳກ່ຽວກັບກິດຈະກຳ ໂດຍສະເພາະແມ່ນການຫຼິ້ນແບບແຕ່ກ່ອນເຊັ່ນ: ປາຈີລຸນ, ເຕັ້ນຢາງ ແລະ ອື່ນໆ ເຊິ່ງໃນຕອນນີ້ແມ່ນກຳລັງຈະສູນຫາຍໄປແລ້ວ. ອັນນີ້ຈະເຮັດໃຫ້ເດັກນ້ອຍໄດ້ຮູ້ຈັກກັບການຫຼິ້ນແບບນີ້ ມີຄວາມມ່ວນຊື່ນ ມີກິດຈະກຳອື່ນໄດ້ເຮັດຫຼາຍຂຶ້ນນອກຈາກການຈົດຈໍ່ຢູ່ແຕ່ກັບໜ້າຈໍມືຖືພຽງຢ່າງດຽວ.

ຕໍ່ມາແມ່ນ ໂອ໋ຢາກເຮັດກິດຈະກຳທີ່ໃຫ້ຜູ້ປົກຄອງເຂົ້າມາມີສ່ວນຮ່ວມຫຼາຍຂຶ້ນ ໃຫ້ຜູ້ປົກຄອງໄດ້ເຫັນວ່າ ລູກຫຼານຂອງຕົນເອງມີຄວາມສາມາດແນວໃດ ເພື່ອສົ່ງເສີມພວກເຂົາໃຫ້ຕໍ່ຍອດໄປໃນທາງທີ່ພວກເຂົາມັກຮັກໄດ້.

"ເຮັດດີສ້າງພາບ" ວາຈາບັ່ນທອນ ທີ່ເຮົາບໍ່ຈຳເປັນຕ້ອງເກັບມາຄິດໃຫ້ທໍ້ໃຈ!

"ສ່ວນໃຫຍ່ທີ່ເຄີຍເຫັນແມ່ນພວກເຂົາຈະທໍ້ໃຈເວລາທີ່ຊ່ວຍເຫຼືອຄົນອື່ນ ແລ້ວຖ່າຍຮູບລົງເຟສບຸກ ຫຼື ອີ່ຫຍັງກໍຕາມ ແລ້ວຈະມີຄົນມາເວົ້າໃຫ້. ເຂົາຈະເວົ້າໃຫ້ວ່າເຮົາສ້າງພາບ ວ່າເຮັດດີບໍ່ຈຳເປັນຕ້ອງບອກໃຜກໍໄດ້. ກໍຄືວ່າ ຄວາມຈຳເປັນໃນການບອກ ຫຼື ບໍ່ຈຳເປັນໃນການບອກ ມັນຂຶ້ນກັບເຮົາເຊິ່ງເປັນຜູ້ເຮັດ ເພາະວ່າຖ້າເຈົ້າເຮັດໄປແລ້ວ ເຈົ້າຄິດວ່າເຈົ້າບໍ່ຈຳເປັນຕ້ອງບອກໃຜ ມັນກໍເປັນສິດຂອງເຈົ້າ ແຕ່ວ່າສິດຂອງອີກຄົນທີ່ເຮັດແລ້ວເຮົາຕ້ອງບອກກໍແມ່ນຍ້ອນ ໜຶ່ງ ເພື່ອຄວາມໂປ່ງໃສ, ສອງເພື່ອເຮັດເປັນແບບຢ່າງໃຫ້ລູກຫຼານຂ້ອຍເດ ໃນເມື່ອຂ້ອຍເຮັດໃນຕອນນີ້ກໍເກັບໄວ້ເປັນທີ່ລະນຶກ ໃນອີກ 10 ປີ 20 ປີຂ້າງໜ້າ ລູກຫຼານຂ້ອຍກໍຍັງເຫັນຍັງຈື່ ມັນກໍເປັນສິດທິຂອງເຂົາເຈົ້າ."

"ສະນັ້ນບໍ່ຕ້ອງທໍ້ໃຈ ແລະ ບໍ່ຕ້ອງເອົາຄຳຂອງຄົນອື່ນທີ່ເວົ້າໃຫ້ວ່າ 'ເຮັດດີສ້າງພາບຊື່ໆ' ມາເຮັດໃຫ້ເຮົາທໍ້ໃຈ ເພາະຕົນເອງກໍຜ່ານມາແລ້ວ. ຖ້າເຫັນວ່າສິ່ງນີ້ມັນດີ ເຈົ້າກໍເດີນໜ້າຕໍ່ໄປໂລດ."

Advertisement Replay Ad
"ທ່ານໝໍນຸ້ຍ" ທຸ້ມເທກາຍ ແລະ ໃຈ ໃນການປະຕິບັດໜ້າທີ່ ສູ້ກັບໂຄວິດ-19

"ທ່ານໝໍນຸ້ຍ" ທຸ້ມເທກາຍ ແລະ ໃຈ ໃນການປະຕິບັດໜ້າທີ່ ສູ້ກັບໂຄວິດ-19

ສົມຫວັງ ໄຊສັກດີ ມືລະນາດວົງຕິ່ງນ່ອຍໆ ຄິດໄກກວ່າການຫຼິ້ນດົນຕີລາວເດີມ!

ສົມຫວັງ ໄຊສັກດີ ມືລະນາດວົງຕິ່ງນ່ອຍໆ ຄິດໄກກວ່າການຫຼິ້ນດົນຕີລາວເດີມ!

"ຂ້ອຍເຄີຍຖືກເຂົາເວົ້າໃຫ້ວ່າຂີ້ລ້າຍ" ເລື່ອງລາວການຖືກຂົ່ມເຫງ ບັນຫາທີ່ຝັງຮາກເລິກໃນສັງຄົມລາວ

"ຂ້ອຍເຄີຍຖືກເຂົາເວົ້າໃຫ້ວ່າຂີ້ລ້າຍ" ເລື່ອງລາວການຖືກຂົ່ມເຫງ ບັນຫາທີ່ຝັງຮາກເລິກໃນສັງຄົມລາວ

ບາງຂໍ້ກົດໝາຍທີ່ຄູ່ຜົວເມຍຄວນຮູ້ ກ່ອນທີ່ຈະຕັດສິນໃຈໄປມີເລັກມີນ້ອຍ

ບາງຂໍ້ກົດໝາຍທີ່ຄູ່ຜົວເມຍຄວນຮູ້ ກ່ອນທີ່ຈະຕັດສິນໃຈໄປມີເລັກມີນ້ອຍ

ຄວນຢຸດໄດ້ແລ້ວ ຄອມເມັ້ນ "ສົນໃຈເດີ" ຖ້າຢາກໄດ້ວຽກ ຢ່າເຮັດ!

ຄວນຢຸດໄດ້ແລ້ວ ຄອມເມັ້ນ "ສົນໃຈເດີ" ຖ້າຢາກໄດ້ວຽກ ຢ່າເຮັດ!

ລົດໜັກພາຂົວຫັກ: ຂົວນໍ້າພະນາຍ ບ້ານເກິນຫັກ ກະທົບການສັນຈອນ

ລົດໜັກພາຂົວຫັກ: ຂົວນໍ້າພະນາຍ ບ້ານເກິນຫັກ ກະທົບການສັນຈອນ

ຢາກເດີນທາງເຂົ້າ-ອອກລາວຕ້ອງເຮັດແນວໃດ? ນີ້ແມ່ນທຸກຢ່າງທີ່ເຈົ້າຕ້ອງຮູ້ໄວ້

ຢາກເດີນທາງເຂົ້າ-ອອກລາວຕ້ອງເຮັດແນວໃດ? ນີ້ແມ່ນທຸກຢ່າງທີ່ເຈົ້າຕ້ອງຮູ້ໄວ້

ທຸກຢ່າງທີ່ຜູ້ອອກແຮງງານຕ້ອງຮູ້ ກ່ຽວກັບມາດຕະການດ້ານແຮງງານໃນໄລຍະ ແລະ ຫຼັງການລະບາດຂອງໂຄວິດ-19

ທຸກຢ່າງທີ່ຜູ້ອອກແຮງງານຕ້ອງຮູ້ ກ່ຽວກັບມາດຕະການດ້ານແຮງງານໃນໄລຍະ ແລະ ຫຼັງການລະບາດຂອງໂຄວິດ-19

ນີ້ແມ່ນກົນໂກງຂອງແມ່ຫວຍອອນລາຍ ໃຊ້ຕົວະຕົ້ມເອົາເງິນຂອງລູກຫວຍຫຼາຍກວ່າ 1,500 ລ້ານກີບ

ນີ້ແມ່ນກົນໂກງຂອງແມ່ຫວຍອອນລາຍ ໃຊ້ຕົວະຕົ້ມເອົາເງິນຂອງລູກຫວຍຫຼາຍກວ່າ 1,500 ລ້ານກີບ

ສະຫຼຸບເຫດການ ຊາຍຜິວດຳຢູ່ສະຫະລັດເສຍຊີວິດຫຼັງຖືກຕຳຫຼວດຈັບກຸມ ຈົນກາຍເປັນກະແສໄປທົ່ວໂລກ

ສະຫຼຸບເຫດການ ຊາຍຜິວດຳຢູ່ສະຫະລັດເສຍຊີວິດຫຼັງຖືກຕຳຫຼວດຈັບກຸມ ຈົນກາຍເປັນກະແສໄປທົ່ວໂລກ

ໂຄວິດ-19 ມີຜົນກະທົບແນວໃດ ຕໍ່ການປ່ຽນແປງດິນຟ້າອາກາດ?

ໂຄວິດ-19 ມີຜົນກະທົບແນວໃດ ຕໍ່ການປ່ຽນແປງດິນຟ້າອາກາດ?

ເກີດເຫດ! ລີງອິນເດຍລັກຕົວຢ່າງເລືອດຂອງຜູ້ຕິດເຊື້ອໂຄວິດ-19 ພ້ອມທຳຮ້າຍເຈົ້າໜ້າທີ່

ເກີດເຫດ! ລີງອິນເດຍລັກຕົວຢ່າງເລືອດຂອງຜູ້ຕິດເຊື້ອໂຄວິດ-19 ພ້ອມທຳຮ້າຍເຈົ້າໜ້າທີ່

ນີ້ແມ່ນ 4 ກິດຈະກຳທີ່ສາມາດກັບມາເຄື່ອນໄຫວໄດ້ຄືນ ຫຼັງຈາກທີ່ລັດຜ່ອນຜັນບາງມາດຕະການເພີ່ມ

ນີ້ແມ່ນ 4 ກິດຈະກຳທີ່ສາມາດກັບມາເຄື່ອນໄຫວໄດ້ຄືນ ຫຼັງຈາກທີ່ລັດຜ່ອນຜັນບາງມາດຕະການເພີ່ມ

ສະຫະລັດກຽມຖອດຖອນສະຖານະພິເສດຂອງຮົງກົງ ຊີ້ບໍ່ເປັນອິດສະຫຼະຈາກຈີນອີກຕໍ່ໄປ

ສະຫະລັດກຽມຖອດຖອນສະຖານະພິເສດຂອງຮົງກົງ ຊີ້ບໍ່ເປັນອິດສະຫຼະຈາກຈີນອີກຕໍ່ໄປ

ສໍາເລັດແລ້ວ! ຫໍພຣະເມນ ອົງພຣະຍອດແກ້ວມະຫາສັງຄະສຸທັມມາທິບໍດີ ມະຫາງອນ ດຳຣົງບຸນ

ສໍາເລັດແລ້ວ! ຫໍພຣະເມນ ອົງພຣະຍອດແກ້ວມະຫາສັງຄະສຸທັມມາທິບໍດີ ມະຫາງອນ ດຳຣົງບຸນ

ທົ່ວປະເທດມີແຜນປູກຕົ້ນໄມ້ 5 ແສນກວ່າເບ້ຍ ໃນວັນປູກຕົ້ນໄມ້ແຫ່ງຊາດ

ທົ່ວປະເທດມີແຜນປູກຕົ້ນໄມ້ 5 ແສນກວ່າເບ້ຍ ໃນວັນປູກຕົ້ນໄມ້ແຫ່ງຊາດ

ກວດເບິ່ງເລີຍ ຜົນຫວຍວັນທີ 28 ພຶດສະພາ 2020 ເລກ 1 2 3 4 5 ໂຕ ແລະ ຫວຍຕຳລາຝັນ 3/40

ກວດເບິ່ງເລີຍ ຜົນຫວຍວັນທີ 28 ພຶດສະພາ 2020 ເລກ 1 2 3 4 5 ໂຕ ແລະ ຫວຍຕຳລາຝັນ 3/40

ກະຊວງປ້ອງກັນປະເທດ ປະກາດເລື່ອນຊັ້ນໃຫ້ນາຍທະຫານຊັ້ນພັນຕີຂຶ້ນພັນໂທ 323 ສະຫາຍ

ກະຊວງປ້ອງກັນປະເທດ ປະກາດເລື່ອນຊັ້ນໃຫ້ນາຍທະຫານຊັ້ນພັນຕີຂຶ້ນພັນໂທ 323 ສະຫາຍ

ສູບຢາແບບໃດໃຫ້ດີຕໍ່ສຸຂະພາບ? ເມື່ອນະວັດຕະກຳການສູບຢາແບບໃໝ່ ອາດບໍ່ໄດ້ປອດໄພຄືກັບທີ່ຄິດ

ສູບຢາແບບໃດໃຫ້ດີຕໍ່ສຸຂະພາບ? ເມື່ອນະວັດຕະກຳການສູບຢາແບບໃໝ່ ອາດບໍ່ໄດ້ປອດໄພຄືກັບທີ່ຄິດ

ສວນສະໜຸກອາດບໍ່ສະໜຸກຄືຊື່ ເມື່ອຍີ່ປຸ່ນກຽມໃຫ້ເປີດອີກຄັ້ງ ແຕ່ຫ້າມ "ຮ້ອງ" ຂະນະຫຼິ້ນເຄື່ອງຫຼິ້ນ

ສວນສະໜຸກອາດບໍ່ສະໜຸກຄືຊື່ ເມື່ອຍີ່ປຸ່ນກຽມໃຫ້ເປີດອີກຄັ້ງ ແຕ່ຫ້າມ "ຮ້ອງ" ຂະນະຫຼິ້ນເຄື່ອງຫຼິ້ນ

ສົ່ງອີເມວຫາໝູ່

ສົ່ງໃຫ້ໝູ່ຫຼາຍຄົນ “,” (ສົ່ງພ້ອມກັນຫຼາຍສຸດ 50 ອີເມວ)

ສົ່ງອີເມວ