ໃນວິກິດພະຍາດລະບາດ "ຜູ້ບໍລິຫານແອມະຊອນ" ຮັ່ງມີເພີ່ມຂຶ້ນອີກ 6.4 ຕື້ໂດລາສະຫະລັດ

'ເຈຟ ເບໂຊສ' ຜູ້​ຖືຮຸ້ນ​ແອ​ມະ​ຊອນ​ 11.2% ມີ​ເງີນ​ເພີ່ມ​ຂຶ້ນ​ປະມານ​ 5% ເຊັ່ນ​ດຽວ​ກັບ​ອະ​ດີດ​ພັນລະຍາ ຜົນຈາກ​ຫຼັກ​ຈາກ​ການ​ທີ່​ປະຊາຊົນ​ອອກຈາກ​ເຮືອນ​ບໍ່​ໄດ້.

ຮຸ້ນ​ຂອງ ‘ແອ​ມະ​ຊອນ’ ບໍລິສັດ​ຄ້າຍ່ອຍ​ອອນລາຍ​ລາຍ​ໃຫຍ່​ຂອງ​ໂລກ​ທີ່​ມີ ‘ເຈຟ ເບໂຊສ’ ນັ່ງ​ເປັນ​ຊີ​ອີ​ໂອ​ທະ​ຍານ​ຂຶ້ນ​ຢ່າງ​ຕໍ່​ເນື່ອງ​ຈາກ​ຜົນ​ຄວາມ​ຕ້ອງ​ການ​ສັ່ງ​ຊື້​ສິນ​ຄ້າ​ອອນລາຍຂອງ​ປະຊາຊົນ​ທົ່ວ​ໂລກ​ທີ່​ຢູ່​ພາຍໃຕ້​ມາ​ດຕະການ​ລັອກ​ດາວ​.

ໃນເວລາ​ປິດ​ຕະຫຼາດ​ວັນທີ 14 ເມສາ ທີ່​ຜ່ານມາ ຮຸ້ນ​ຂຶ້ນ​ໄປ​ປິດ​ລາຄາ​ສູງ​ສຸດ​ທີ່ 2,283.32 ໂດລາສະຫະລັດ/ຮຸ້ນ ຫຼື ​ເປັນ​ການ​ປັບ​ເພີ່ມ​ຂຶ້ນ​ປະມານ 5% ຈາກ​ລາຄາ​ປິດ​ຕະຫຼາດ​ໃນ​ມື້​ກ່ອນ​ໜ້າ ໂດຍ​ກ່ອນ​ໜ້າ​ນີ້ຮຸ້ນ​ຂອງ​ແອ​ມະ​ຊອນ​ເຄີຍ​ພຸ່ງ​ຂຶ້ນ​ໄປ​ເຖິງ​ຈຸດ​ສູງ​ສຸດ​ເປັນ​ປະຫວັດ​ຕິກາ​ນໃນ​ເດືອນກຸມພາທີ່​ຜ່ານມາ ໂດຍ​ຕອນ​ນັ້ນ​ມີ​ລາຄາ​ຢູ່​ທີ່ 2,170.22 ໂດລາສະຫະລັດ/ຮຸ້ນ.

ດ້ວຍ​ການ​ປັບ​ຕົວ​ຫຼ້າ​ສຸດ ສົ່ງ​ຜົນ​ໃຫ້​ມູນ​ຄ່າ​ຫຼັກ​ຊັບ​ຂອງ​ບໍລິສັດ​ຕາມ​ລາຄາຕະຫຼາດ (Market Captalization) ທະ​ລຸ 1,100 ຕື້​ໂດລາສະຫະລັດໄປ​ແລ້ວ ລວມ​ທັງ​ຊີ​ອີ​ໂອ​ຢ່າງ ເບ​ໂຊສ ເອງ​ກໍ​ມີ​ມູນ​ຄ່າ​ຊັບ​ສິນ​ເ​ພື່ມ​ຂຶ້ນ​ປະມານ​ 5% ດ້ວຍ​ເຊັ່ນ​ດຽວ​ກັນ ຊຶ່ງ​ຕາມ​ຂໍ້​ມູນ​ຈາກ​ວາລະສານ​ຟອບ​ສ໌​ຄິດ​ເປັນ​ເມັດ​ເງິນ​ປະມານ 6.4 ຕື້​ໂດລາສະຫະລັດ. 

ປັດຈຸບັນ​ນີ້ ເບ​ໂຊສ ຖືຮຸ້ນ​ປະມານ​ 11.2% ໃນ​ບໍລິສັດ​ແອ​ມະ​ຊອນ ແລະ ຍັງ​ຄົງ​ຢືນ​ຕຳແໜ່ງ​ບຸກ​ຄົນ​ທີ່​ຮັ່ງມີ​ທີ່ສຸດ​ໃນ​ໂລກ​ຢ່າງ​ຕໍ່​ເນື່ອງ ຕາມ​ຂໍ້​ມູນ ໃນ ວັນທີ 14 ເມ​ສາ ໂດຍ ເບ​ໂຊສ ມີ​ມູນ​ຄ່າ​ຊັບ​ສິນ​ທັງ​ໝົດ 138 ຕື້​ໂດລາສະຫະລັດ.

ຂະນະ​ທີ່​ອະ​ດີດ​ພັນລະຍາ​ຢ່າງ ‘ແມັກ​ເຄນ​ຊີ ເບໂຊສ’ ຜູ້​ຖືຮຸ້ນ​ບໍລິສັດ​ແອ​ມະ​ຊອນ​ປະມານ 4% ກໍ​ມີ​ມູນ​ຄ່າ​ສິນ​ຊັບ​ເພີ່ມ​ຂຶ້ນ​ປະມານ 2.2 ຕື້ໂດລາສະຫະລັດ​ເຊັ່ນ​ດຽວ​ກັນ ສົ່ງ​ຜົນ​ໃຫ້​ມູນ​ຄ່າ​ຊັບ​ສິນ​ທັງ​ໝົດ​ຂອງ​ນາງ​ເພີ່ມ​ຂຶ້ນ​ເປັນ 44.8 ຕື້​ໂດລາສະຫະລັດ. 

ແອ​ມະ​ຊອນ ບໍລິສັດ​ທີ່​ມີ​ມູນ​ຄ່າ​ທາງ​ຕະຫຼາດ​ໃຫຍ່​ທີ່ສຸດ​ເປັນ​ອັນ​ດັບ 2 ຂອງ​ໂລກ ຮອງ​ຈາກ​ໄມ​ໂຄຣ​ຊອ​ບ ໄດ້ຮັບ​ອາ​ນິ​ສົງ​ຢ່າງສູງ​ຈາກ​ການ​ທີ່​ປະຊາຊົນ​ບໍ່​ສາມາດ​ອອກຈາກ​ເຮືອນ​ໄດ້​ຢ່າງ​ປົກກະຕິ​ອັນ​ເນື່ອງ​ມາ​ຈາກ​ມາດຕະ​ການ​ຕ່າງ​ໆ ທີ່​ລັດຖະບານ​ໃນ​ຫຼາຍ​ປະເທດ​ອອກ​ມາ​ເພື່ອ​ຄວບ​ຄຸມ​ການ​ແພ່ລະ​ບາດ​ຂອງ​ພະຍາດ​ໂຄ​ວິດ​-19 ຈົນ​ເຮັດໃຫ້​ບໍລິສັດ​ຕ້ອງ​ຈ້າງ​ພ​ະນັກ​ງານ​ເພີ່ມ​ອີກ​ເຖິງ 175,000 ຕຳແໜ່ງ​ເພື່ອ​ໃຫ້​ທຸລະກິດ​ດຳ​ເນີນ​ໄປ​ຢ່າງ​ບໍ່​ສະ​ດຸດ.

ຢ່າງໃດ​ກໍ​ຕາມ ແອ​ມະ​ຊອນ​ກໍ​ຍັງ​ຕ້ອງ​ປະເຊີນ​ໜ້າ​ກັບ​ບັນຫາ​ການ​ປະທ້ວງ​ຂອງ​ແຮງ​ງານ​ໃນ​ຄັງ​ສິນ​ຄ້າ​ວ່າ​ສະພາບ​ການ​ເຮັດ​ວຽກງານ​ບໍ່​ເອື້ອອຳນວຍ​ເທົ່າ​ທີ່​ຄວນ ທ​ັງຍັງ​ຮຽກ​ຮ້ອງ​ໃຫ້​ມີ​ການ​ປ້ອງ​ກັນ​ການ​ແພ່ລະ​ບາດ​ໃນ​ຄັງ​ສິນ​ຄ້າ​ໃຫ້​ຫຼາຍກວ່າ​ນີ້ ຊຶ່ງ​ຫຼ້າສຸດ​ແອ​ມະ​ຊອນ​ອອກ​ມາ​ປະກາດ​ໄລ່​ພະ​ນັກ​ງານ​ກຸ່ມ​ໜຶ່ງ​ທີ່​ລວມຕົວ​ກັນ​ປະທ້ວງ​ອອກ​ແລ້ວ​ພ້ອມ​ໃຫ້​ເຫດ​ຜົນວ່າພະ​ນັກ​ງານ​ລະ​ເມີດ​ກົດ​ການ​ຫ້າມ​ລວມຕົວ​ກັນ​ຂອງ​ບໍລິສັດ.