ເປີດປະຫວັດການເຄື່ອນໄຫວຂອງຜູ້ຕິດເຊື້ອໂຄວິດ-19 ຄົນທີ 9 ຂອງລາວ

ມາຮອດປັດຈຸບັນ (31 ມີນາ 2020) ຍອດຜູ້ຕິດເຊື້ອໂຄວິດ-19 ສະສົມໃນລາວມີທັງໝົດ 9 ກໍລະນີ ເຊິ່ງໃນນັ້ນປະກອບດ້ວຍ ຄົນນະຄອນຫຼວງວຽງຈັນ 6 ກໍລະນີ ແລະ ຄົນຫຼວງພະບາງ 3 ກໍລະນີ. ກໍລະນີຫຼ້າສຸດເປັນເພດຍິງ ອາຍຸ 22 ປີ ອາຊີບຊ່າງເສີມສວຍ ໄດ້ຖືກຢັ້ງຢືນເມື່ອວັນຈັນທີຜ່ານມາວ່າ ຕິດເຊື້ອໂຄວິດ-19.

ຄົນເຈັບກໍລະນີດັ່ງກ່າວນີ້ ອາໄສຢູ່ທີ່ບ້ານໂພນພະເນົາ ເມືອງໄຊເສດຖາ ນະຄອນຫຼວງວຽງຈັນ. ສຳລັບປະຫວັດການເຄື່ອນໄຫວຂອງຜູ້ກ່ຽວມີດັ່ງຕໍ່ໄປນີ້:

• ວັນທີ 14 ມີນາ  ໄດ້ເດີນທາງໄປປະເທດໄທ ໂດຍໄດ້ຂຶ້ນລົດໂດຍສານທີ່ສະຖານີ ຕະຫຼາດເຊົ້າ ຂ້າມດ່ານຂົວມິດຕະພາບລາວ-ໄທ ແຫ່ງທີ 1 ໄປທີ່ແຂວງໜອງຄາຍ ປະເທດໄທ ກ່ອນທີ່ຈະເດີນທາງຕໍ່ດ້ວຍເຮືອບິນຈາກສະໜາມບິນອຸດອນທານີ ໄປທີ່ ສະໜາມບິນດອນເມືອງ ບາງກອກ ແລ້ວກໍເດີນທາງໄປທີ່ພັກຕໍ່.
• ວັນທີ 15 ມີນາ ຜູ້ກ່ຽວໄດ້ພັກຢູ່ທີ່ຫໍພັກກັບເອື້ອຍຮັກ ບໍ່ໄດ້ໄປໃສ.
• ວັນທີ 16 ມີນາ ໄປງານວັນເກີດ ແລະ ໄດ້ນັ່ງຮ່ວມໂຕະກັບຄົນອື່ນໆ 10 ຄົນ.
• ວັນທີ 17-19 ມີນາ ຢູ່ຫໍພັກກັບເອື້ອຍຮັກ ບໍ່ໄດ້ອອກໄປໃສ.
• ວັນທີ 20 ມີນາ ເດີນທາງກັບຈາກໄທ ຈາກສະໜາມບິນດອນເມືອງ ມາທີ່ສະໜາມບິນວັດໄຕ.
• ວັນທີ 21-27 ມີນາ ພັກຢູ່ຫ້ອງແຖວບໍ່ໄດ້ໄປໃສ
• ວັນທີ 28 ມີນາ ເອື້ອຍຮັກໂທມາບອກວ່າ ຄົນທີ່ໄປຮ່ວມງານລ້ຽງເລີ່ມມີອາການໄອ, ໄຂ້, ເມື່ອຍ, ປວດຮາກ, ເຈັບຫົວ, ຖອກທ້ອງ. ຈາກນັ້ນຜູ້ກ່ຽວຈຶ່ງໄດ້ເດີນທາງໄປກວດຢູ່ໂຮງໝໍ 150 ຕຽງ.
• ວັນທີ 29 ມີນາ ຜົນການກວດວິເຄາະອອກມາວ່າ ຜູ້ກ່ຽວຕິດເຊື້ອໂຄວິດ-19.