ສູນເລືອດແຂວງຜົ້ງສາລີ ໄດ້ຮັບການຊ່ວຍເຫຼືອລົດຕູ້ 1 ຄັນ ຈາກອົງການກາແດງເຢຍລະມັນ

ເມື່ອວັນທີ 19 ມີນາ ຜ່ານມາ ​ທີ່ນະຄອນຫລວງວຽງຈັນ ໄດ້ມີພິທີ ມອບ-ຮັບລົດ ຮັບການຊ່ວຍເຫຼືອລົດຕູ້ໂຕໂຍຕາ ໃຫ້ສູນເລືອດແຂວງຜົ້ງສາລີ ຈາກອົງການກາແດງເຢຍລະມັນ ຈຳນວນ 1 ຄັນ ມູນ​ຄ່າ 25.500 ​ໂດ​ລາ​ສະຫະລັດ ໂດຍໃຫ້ກຽດມອບຂອງ ທ່ານ ທິມ ​ເບຣ ຜູ້ຕາງ​ໜ້າ​ອົງການ​ກາ​​ແດງ​ເຢຍລະ​ມັນ ​ແລະ ຮັບ​ໂດຍ​ ທ່ານ ຄໍາ​ຮຸ່ງ ​ເຮືອງ​ວົງ​ສີ ປະທານ​ອົງການ​ກາ​ແດງ​ລາວ, ມີຫົວໜ້າ​ອົງການກາແດງລາວ ແຂວງຜົ້ງ​ສາລີ ແລະ ພາກສ່ວນທີ່ເຂົ້າ​ຮ່ວມ​ເປັນ​ສັກຂີ​ພິຍານ.

ໃນ​ໂອກາດ​ດັ່ງກ່າວ, ທ່ານ ທິມ ​ເບຣ ແຈ້ງ​​ໃຫ້​ຮູ້​ວ່າ: ໃນໄລຍະ 10 ປີ ຜ່ານ​ມາ ​ອົງການ​ກາ​ແດງ​ເຢຍລະ​ມັນ ​ໄດ້​​ສະໜອງພາຫະນະລົດຕູ້ ສຳລັບອອກຮັບບໍລິຈາກເລືອດ 12 ຄັນ, ລົດຈັກ 36 ຄັນ ​ແລະ ຈະ​ສະໜອງລົດ​ຕູ້​ໃຫ້​ຕື່ມ​ອີກ 5 ຄັນ ​ໃນ​ປີ 2020 ​ເພື່ອ​ເປັນການປະກອບສ່ວນ​ເຂົ້າໃນ​ການ​ພັດທະນາວຽກງານ​ປຸກລະດົມການ​ບໍລິຈາກ​ເລື​ອດ ​ແລະ ສະໜອງ​ເລືອດ​ທີ່​ປອດ​ໄພ​ຢູ່​ ສປປ ລາວ ອົງການ​ກາ​ແດງ​ເຢຍລະ​ມັນ ຍັງ​ໄດ້ຊ່ວຍເຫຼື​ອສູນ​ເລືອດ​ແຫ່ງ​ຊາດ ກໍ​ຄື​ ອົງ​ກາ​ນການ​ແດງ​ລາວ ​ໂດຍສະ​ເພາະ​ ຢູ່​ຂັ້ນ​ແຂວງ​ ​ແລະ ຂັ້ນ​ເມືອງ​ ​ໂດຍ​ສຸມ​ໃສ່ວຽກ​ງານ​ເລືອດ​ຂອງ​ລາວ ​ໃຫ້​ບັນລຸ​ຕາມ​ເປົ້າໝາຍ​ ກໍ​ຄື ​ໃຫ້​ມີ​ເລືອດ​ພຽງພໍທັງ​ປະລິມານ ​ແລະ ຄຸນ​ນະພາ​ບຕາມ​ມາດ​ຕະຖານ​ແຫ່ງ​ຊາດ ​ແລະ ທິດ​ຊີ້​ນຳ​ຂອງ​ອົງການ​ອະນາ​ໄມ​ໂລກ.

ໂອກາດ​ດຽວກັນ, ​ທ່ານ ຄຳ​ຮຸ່ງ ​ເຮືອງ​ວົງ​ສີ ​ໄດ້​ສະ​ແດງ​ຄວາມ​ຂອບ​ໃຈ ຕໍ່ອົງການ​ກາ​ແດງ​ເຢຍລະ​ມັນ ທີ່​ໃຫ້ການ​ສະໜັບສະໜູນຊ່ວຍ​ເຫລືອ​ໃນ​ຄັ້ງ​ນີ້, ລົດ​ຕູ້ດັ່ງກ່າວຈະ​ຖືກ​ນຳໃຊ້​​ເຂົ້າ​ໃນ​ວຽກງານປຸກ ລະດົມບໍລິຈາກ​ເລືອດ​ຕາມສະຖານທີ່ຕ່າງໆພາຍໃນແຂວງ ແນໃສ່ຮັບປະກັນໃຫ້ມີການຕອບສະໜອງ ເລືອດພຽງພໍປອດໄພ ແລະ ທັນເວລາ ​ໃຫ້​ແກ່​ຄົນ​ເຈັບ​ຢູ່​ໂຮງໝໍ​ແຂວງ ​ແລະ ບັນດາ​ເມືອງ​ຕ່າງ​ໆ ພາຍ​ໃນ​ແຂວງ​​​ເຮັດ​ໃຫ້​ແຂວງ​ສາມາດ​ກຸ້ມ​ຕົນ​ເອງ​ ທາງ​ດ້ານການ​ບໍລິການ​ເລືອດ ​ໃຫ້​ພຽງພໍ​ກັບ​ຄວາມ​ຕ້ອງການ.

(ສາວເຜືອກ)