ຕອບຂໍ້ສົງໄສ 'ເຊື້ອໂຄວິດ-19' ຢູ່ເທິງມືຖືໄດ້ດົນເທົ່າໃດ?

ຮູ້ ຫຼື ບໍ່? ໂທລະສັບມືຖື ຫຼື ສະມາດໂຟນທີ່ເຮົາໃຊ້ກຳນຢູ່ທຸກມື້ ອາດເປັນພາຫະຊັ້ນດີຂອງການແພ່ກະຈາຍພະຍາດຕິດເຊື້ອໂຄໂຣນາ 2019 (COVID-19) ເພາະເຮົາມັກຈັບມືຖືຢູ່ຕະຫຼອດເວລາ ໂດຍບໍ່ທັນໄດ້ລະມັດລະວັງເລື່ອງຄວາມສະອາດ.

ເຊື້ອ​ໄວ​ຣັດ​ໂຄ​ໂຣ​ນາ​ສາຍ​ພັນ​ໃໝ່ (SARS-CoV-2) ທີ່​ເຮັດໃຫ້​ເຮົາ​ປ່ວຍ​ເປັນ COVID-19 ນັ້ນ ວ່າ​ກັນ​ວ່າ​ສາມາດ​ມີ​ຊີວິດ​ເທິງ​ພື້ນ​ຜິວ​ທີ່​ເປັນ​ແກ້ວ​ແບບ​ໂທລະສັບ​ມື​ຖື​ໄດ້​ດົນ​ເຖິງ 96 ຊົ່ວ​ໂມງ ຫຼື 4 ມື້​ເລີຍ​!

ທັງ​ນີ້ ຂໍ້​ມູນ​ດັ່ງ​ກ່າວ​ເປັນ​ການ​ປະ​ເມີນ​ຈາກ​ລາຍ​ງານ​ຂອງອົງການ​ອະນາໄມ​ໂລກ (WHO) ທີ່​ເຄີຍ​ເກັບ​ຂໍ້​ມູນ​ການ​ລະ​ບາດ​ຂອງ​ພະຍາດ​ຊາ (ພະຍາດ​ທາງເດີນ​ຫາຍ​ໃຈ​ຮຸນແຮງ​) ໄວ້​ເມື່ອ​ປີ 2003 ຊຶ່ງ​ເປັນ​ພະຍາດ​ທີ່​ເກີດ​ຈາກ​ເຊື້ອ​ໄວ​ຣັດ SARS-CoV ທີ່​ມີ​ຄວາມ​ກ່ຽວ​ຂ້ອງ​ທາງ​​ກຳມະພັນ​ຢ່າງ​ໃກ້​ຊິດ​ກັບ​ພະຍາດ COVID-19.

ດ້ວຍ​ເຫດ​ນີ້ ໃນ​ທາງ​ທິດສະດີ​ຈຶ່ງ​ມີ​ຄວາມ​ເປັນ​ໄປ​ໄດ້​ທີ່​ເຮົາ​ສາມາດ​ຕິດ​ເຊື້ອ​ໄວ​ຣັດ​ໂຄ​ໂຣ​ນາ​ສາຍ​ພັນ​ໃໝ່​ໄດ້​ຈາກ​ໜ້າ​ຈໍ​ມື​ຖື​ເຊັ່ນ​ກັນ ເພາະ​ໂດຍ​ປົກກະຕິ​ຄົນ​ສ່ວນ​ໃຫຍ່​ມັກ​ໃຊ້​ມື​ມາ​ສຳ​ຜັດ​ໃບ​ໜ້າ​ຂອງ​ຕົວ​ເອງຫຼາຍ​ເທື່ອ ບໍ່​ຕ່າງ​ຈາກ​ການ​ຢິບ​ຈັບ​ໂທລະສັບ ຊຶ່ງ​ຜົນ​ການສຶກສາ​ໜຶ່ງ​ຈາກ ບໍລິສັດ Dscout ພ​ົບວ່າ​ໂດຍ​ສະເລ່ຍ​ແລ້ວ​ ຄົົນທີ່​ໃຊ້​ສະ​ມາ​ດ​ໂຟນ​ຈະຈັບ​ມື​ຖື​ເລື້ອຍ​ເຖິງ 2,617 ເທື່ອ​ຕໍ່​ມື້​ເລີຍ​!

ຫາກ​ບໍ່​ຢາກ​ເພີ່ມ​ຄວາມ​ສ່ຽງ​ໃນ​ການ​ຕິດ​ພະຍາດ COVID-19 ຄວນ​ປ້ອງ​ກັນ​ຕົວ​ເອງ​ໃນ​ເບື້ອງ​ຕົ້ນ ດ້ວຍ​ການອະນາໄມ​ໂທລະສັບ​ມື​ຖື​ເປັນ​ປະຈຳ, ລ້າງ​ມື​ເລື້ອຍໆ ແລະ ​ລ້າງ​ໃຫ້​ສະ​ອາດ ເພາະ​ເຊື້ອ​ໄວ​ຣັດ​ໂຄ​ໂຣ​ນາ​ສາມາດ​ຕິດ​ຕໍ່​ກັນ​ໄດ້​ຜ່ານ​ການ​ສຳ​ຜັດ​ຕາ, ດັງ​ ແລະ​ ປາກ​ນັ້ນ​ເອງ.