ປະທານສີຈິ້ນຜິງ ກ່າວ ຈີນກຳລັງປະເຊີນໜ້າກັບບົດທົດສອບຄັ້ງໃຫຍ່ທີ່ສຸດ ຈາກໂຄວິດ-19

ປະທານປະເທດແຫ່ງ ສປ ຈີນ​ ກ່າວ ໂຄ​ວິດ -19 ເປັນ​ບັນຫາ​ສາທາລະນະສຸກ​ທີ່​ໃຫຍ່​ທີ່ສຸດ​ນັບ​ຕັ້ງ​ແຕ່​ຈີນ​ສ້າງຕັ້ງ​ປະເທດ. ຂະນະ​ທີ່​ຈຳນວນ​ຜູ້​ຕິດ​ເຊື້ອທົ່ວ​ໂລກຍັງ​ຄົງ​ເພີ່ມ​ຂຶ້ນ​ຕໍ່​ເນື່ອງ ໂດຍ​ສະເພາະ​ໃນ​ເກົາ​ຫຼີ​ໃຕ້, ຍີ່​ປຸ່ນ, ອີຣານ ແລະ ອິ​ຕາ​ລີ.

ປະ​ທາ​ນ ສີ​ຈິ້ນ​ຜິງ ​ຂອງ​ຈີນ​ ກ່າວ​ໃນ​ການ​ປະ​ຊຸມ​ວ່າ​ດ້ວຍ​ການ​ປະ​ສານ​ງານ​ປ້ອງ​ກັນ ​ແລະ ​ຄວບ​ຄຸມ​ໄວ​ຣັດ​ໂຄ​ວິດ​-19 ວ່າ ການ​ແພ່ລະ​ບາດ​ຂອງ​ເຊື້ອ​ໄວ​ຣັດ​ໂຄ​ໂຣ​ນາ​ສາຍ​ພັນ​ໃໝ່ (ໂຄ​ວິດ -19) ເປັນ​ວິກິດການ​ສຸກ​ເສີນ​ດ້ານ​ສາທາລະນະສຸກ​ຄັ້ງ​ໃຫຍ່​ທີ່ສຸດ​ນັບ​ຕັ້ງ​ແຕ່​ຈີນສ້າງ​ຕັ້ງ​ເປັນ​ສາທາລະນະ​ລັດ​ໃນ​ປີ 1949.

'ນີ້​ຄື​ວິກິດການ​ສຳລັບ​ພວກ​ເຮົາ (ຈີນ) ແລະ​ ມັນ​ເປັນ​ບົດ​ທົດສອບ​ຄັ້ງໃຫຍ່​ຂອງ​ເຮົາ,' ປະທານ ສີ​ຈິ້ນ​ຜິງ ​ກ່າວ.

ນອກ​ຈາກ​ນີ້ ຜູ້​ນຳ​ຈີນຍັງ​ຮຽກ​ຮ້ອງ​ໃຫ້​ຄະນະ​ກຳມະການ​ພັກ ​ແລະ ໜ່ວຍ​ງານ​ລັດຖະບານ​ທຸກ​ລະ​ດັບຮັກສາ​, ເຝົ້າລະວັງ ລວມທັງ​ຊຸກຍູ້​ຄວາມ​ພະຍາຍາມ​ໃນ​ການ​ປ້ອງ​ກັນ ​ແລະ ​ຄວບ​ຄຸມ​ພະຍາດລະ​ບາດ​ຢ່າງ​ບໍ່ຢຸດຢັ້ງ.

“ເຮົາ​ບໍ່​ຄວນ​ປ່າວ​ປະ​ກາດໄຊ​ຊະນະ​ເລີຍ ຫາກຍັງ​ບໍ່​ຄວ້າ​ໄຊຢ່າງ​ສົມບູນ,” ຜູ້​ນຳ​ຈີນ​ກ່າວ. 

ປັດຈຸບັນ​ຢອດ​ຜູ້​ຕິດ​ເຊື້ອ​ໄວ​ຣັດ​ໂຄ​ໂຣ​ນາ​ມີ​ຫຼາຍກວ່າ 80,000 ຄົນ​ທົ່ວ​ໂລກ ແລະ​ມີ​ຜູ້​ເສຍຊີວິດ​ຫຼາຍກວ່າ 2,700 ຄົນ ໂດຍ​ໃນ​ປະເທດ​ຈີນ​ມີ​ຜູ້​ຕິດ​ເຊື້ອ​ 78,064 ຄົນ ແລະ ​ມີ​ຜູ້​ເສຍຊີວິດ​ແລ້ວ 2,715 ລາຍ. 

ຍອດ​ຜູ້​ຕິດ​ເຊື້ອ​ນອກ​ຈີນ​ເພີ່ມ​ຂຶ້ນ​ຢ່າງຕໍ່​ເນື່ອງ

ໃນ 'ອິ​ຕາ​ລີ' ມີ​ລາຍ​ງານ​ຍອດ​ຜູ້​ຕິດ​ເຊື້ອ​ໄວ​ຣັດ​ໂຄ​ວິດ​-19 ແລ້ວ 323 ຄົນ ແລະ ​ມີ​ຜູ້​ເສຍຊີວິດ​ແລ້ວ 3 ລາຍ. ທັງ​ນີ້​ລັດຖະບານ​ທ້ອງ​ຖິ່ນ​ແຄວ້ນ​ລອມ​ບາ​​ດີ ແລະ ​ເວ​ເນໂຕຂອງ​ອິ​ຕາ​ລີ​ໄດ້​ອອກ​ຄຳ​ສັ່ງ​ປິດ​ໂຮງຮຽນ​ ແລະ ​ມະຫາ​ວິທະຍາໄລ​ຢ່າງໜ້ອຍ 1 ອາທິດ ແລະ ​ສັ່ງ​ປິດ​ພິ​ພິທະ​ພັນ ​ແລະ ໂຮງຮູບເງົາ ລວມັທງຍົກ​ເລີກ​ການ​ຈັດ​ງານ​ເວ​ນິສ​ຄາ​​ນິ​ວໍອີກດ້ວຍ.

ທີ່​ຜ່ານມາ,​ ລັດຖະບານ​ທ້ອງ​ຖິ່ນ​ຂອງ​ແຄວ້ນ​ລອມ​ບາ​​ດີ ​ແລະ ​ເວ​ເນ​ໂຕໄດ້​ສັ່ງ​ປິດ 12 ເມືອງ ໂດຍ​ມີ​ປະຊາກອນ​ກວ່າ 50,000 ຄົົນທີ່​ຖືກ​ກັກ​ຕົວ​ພາຍ​ໃນ​ແຄວ້ນ​ດັ່ງ​ກ່າວ ພ້ອມ​ທັງ​ຮ້ອງ​ຂໍ​ໃຫ້​ປະຊາຊົນ​ອາໄສ​ຢູ່ໃນ​ເຮືອນ​ເທົ່າ​ນັ້ນ.

ຂະນະ​ທີ່ 'ອີຣານ' ມີ​ລາຍ​ງານ​ຍອດ​ຜູ້​ຕິດ​ເຊື້ອ​ໄວ​ຣັດ​ແລ້ວ 95 ຄົນ ແລະ​ ມີ​ຜູ້​ເສຍຊີວິດ​ແລ້ວ 16 ຄົນ. ທັງ​ນີ້​ປະເທດ​ເພື່ອນ​ບ້ານ​ຂອງ​ອີຣານ​ຢ່າງ​ອີຣັກ ​ແລະ ​ຕວກກີ ຕ່າງ​ມີ​ຄຳ​ສັ່ງ​ປິດ​ຊາຍ​ແດນ​ທີ່​ເຊື່ອມ​ຕໍ່​ອີຣານ​ທັງ​ໝົດ ລວມທັງ​ສາຍ​ການ​ບິນ​ຫຼາຍ​ປະເທດ​ຍົກ​ເລີກ​ຖ້ຽວ​ບິນ​ໄປຍັງ​ອີຣານ​ແລ້ວ.

ທາງ​ດ້ານ 'ເກົາ​ຫຼີ​ໃຕ້' ມີ​ລາຍ​ງານ​ຍອດ​ຜູ້​ຕິດ​ເຊື້ອ​ເພີ່ມ​ຂຶ້ນ​ເປັນ 1,261 ລາຍ ​ແລະ ​ມີ​ຜູ້​ເສຍຊີວິດ 7 ລາຍ ທັງ​ນີ້​ລັດຖະບານ​ເກົາ​ຫຼີ​ໃຕ້​ໄດ້​ປະ​ກາດ​ຍົກ​ລະດັບ​ມາ​ດຕະການ​ປ້ອງ​ກັນ​ໄພ​ເປັນ​ລະ​ດັບ​ສູງ​ສຸດ ຫຼັງ​ຈາກ​ມີ​ຜູ້​ຕິດ​ເຊື້ອ​ເພີ່ມ​ຂຶ້ນ​ຢ່າງ​ວ່ອງໄວ.

ຂະນະ​ທີ່ 'ຍີ່​ປຸ່ນ' ມີ​ລາຍ​ງານ​ຍອດ​ຜູ້​ຕິດ​ເຊື້ອ​ແລ້ວ 171 ລາຍ ແລະ ​ມີ​ຜູ້​ເສຍຊີວິດ 1 ລາຍ ທັງ​ນີ້​ທາງລັດຖະມົນຕີກະຊວງ​ສາທາລະນະສຸກ​ຂອງ​ຍີ່​ປຸ່ນ​ໄດ້​ອອກ​ມາ​ຂໍ​ໂທດ ຫຼັງ​ຈາກ​ພົ​ບວ່າ ຜູ້​ໂດຍ​ສານ​ຍິງ​ທີ່​ໄດ້ຮັບ​ການ​ປ່ອຍ​ຕົວ​ຈາກ​ເຮືອ Diamond Princess ເມື່ອ​ອາທິດ​ທີ່​ຜ່ານມາ​ຕິດ​ເຊື້ອ​ໂຄ​ວິດ-19.