"ຮອນດ້າ" ກຽມປິດໂຮງງານຜະລິດລົດຢູ່ຟິລິບປິນ ເລີ່ມແຕ່ເດືອນມີນານີ້ເປັນຕົ້ນໄປ

ຮອນ​ດ້າ​ສັ່ງ​ປິດໂຮງງານໃນ​ຟິ​ລິບ​ປິນ ຊີ້​ເພື່ອ​ຄວາມ​ສົມ​ເຫດ​ສົມ​ຜົນ​ຂອງ​ຕົ້ນ​ທຶນ ​ແລະ ລາຄາ​ຂາຍ ເນັ້ນ​ນຳ​ເຂົ້າ​ຈາກ​ປະເທດ​ໃນອາຊີແທນ ກະທົບ​ແຮງ​ງານ 650 ຄົນ.

ບໍລິສັດ​ຮອນ​ດ້າ ມໍເຕີ ຖະແຫຼງ​ປິດໂຮງງານການ​ຜະລິດລົດຍົນໃນ​ຟິ​ລິບ​ປິນ​ທີ່​ເປີດ​ດຳ​ເນີນ​ການ​ມາ​ຕັ້ງ​ແຕ່​ປີ 1991 ລົງ ໂດຍ​ຈະ​ມີ​ຜົນ​ໃນ​ເດືອນມີນານີ້ ໂດຍ​ການ​ປະ​ກາດ​ປິດ​ໂຮງງານເທື່ອ​ນີ້​ຈະ​ສົ່ງ​ຜົນ​ກະທົບ​ຕໍ່ພະ​ນັກ​ງານ​ປະ​ມານ 650 ຄົນ. 

ໃນ​ຖະແຫຼງ​ການ​ຂອງ​ຮອນ​ດ້າກ່າວ​ວ່າ:

• "ເພື່ອ​ໃຫ້​ສາມາດ​ຕອບ​ໂຈດຄ​ວາມ​ຕ້ອງ​ການ​ຂອງ​ຊາວ​ຟິ​ລິບ​ປິນ​ດ້ານລາຄາ​ທີ່​​ສົມ​ເຫດ​ສົມ​ຜົນ​ ແລະ ​ຄຸນນະພາບ​ທີ່​ດີ, ຮອນ​ດ້າ​ໄດ້​ພິຈາລະນາ​ການ​​ຈັດ​ສັນ​ ແລະ ​ການ​ກະ​ຈາຍ​ຊັບພະຍາກອນ​ໃຫ້​ເກີດ​ປະໂຫຍດ​ສູງ​ສຸດ. ດ້ວຍ​ເຫດ​ນັ້ນ ຫຼັງ​ຈາກ​ພິຈາລະນາ​ຄວາມ​ພະຍາຍາມ​ໃນ​ພາກພື້ນອາຊີ ແລະ ​ໂອ​ເຊອານີແລ້ວ, ​ຈຶ່ງ​ຕັດ​ສິນ​ໃຈ​ປິດໂຮງງານການ​ຜະລິດ​ຮອນ​ດ້າ​ໃນ​ຟິ​ລິບ​ປິນລົ​ງ. ແຕ່​ຮອນ​ດ້າ​ຟິ​ລິບ​ປິນ​ຈະ​ຍັງ​ຄົງ​ຂາຍ​ ແລະ ​ບໍລິການ​ຫຼັງ​ການ​ຂາຍ​ຢູ່ ຜ່ານ​ການ​ຮ່ວມ​ມື​ຈາກ​ຮອນ​ດ້າອາຊີ ແລະ ​ໂອ​ເຊອານີ."

ທີ່​ຜ່ານມາ, ໂຮງງານໃນ​ຟິ​ລິບ​ປິນ​ຜະລິດລົດຍົນຮອນ​ດ້າ 2 ຮຸ່ນ​ເປັນ​ຫຼັກ ໄດ້​ແກ່: BR-V ແລະ City ໂດຍ​ມີ​ຮອນ​ດ້າ ມໍເຕີ​ເປັນ​ຜູ້​ຖື​ຮຸ້ນ​ຫຼັກ​ 74.2%. ຂະນະ​ທີ່​ບໍລິສັດ ເອ​ຊີ ອິນ​ດັສ​ທຣີ ເທັກ​ໂນ​ໂລຢີ ໂຮນ​ດິງ ແລະ ທ​ະນາ​ຄານ​ໄຣ​ຊານ ໃນ​ອັດຕາ​ສ່ວນ​ 12.9% ເທົ່າ​ໆ ກັນ ໂດຍ​ມີ​ທ່ານ ​ໂນ​ຣິ​ຢູ​ກິ ທາ​ກາ​ຄູ​ຣະ ນັ່ງ​ເປັນ​ປະ​ທານ. 

ໂດຍ​ປີ​ທີ່​ຜ່ານມາ ຍອດ​ຂາຍ​ຮອນ​ດ້າ​ໃນ​ຟິ​ລິບ​ປິນຫຼຸ​ດ​ລົງ​ເຖິງ 12.7% ຄິດ​ເປັນ​ຍອດ​ຂາຍ​ພຽງ 20,338 ຄັນ ຫຼັງ​ລັດຖະບານ​ເພີ່ມ​ພາ​ສີ​ກັບ​ການ​ຊື້​ລົດຍົນຂ​ອງ​ປະຊາຊົນ.