“ໂມໂນນິວຄລິໂອຊີສ” ພະຍາດຕິດຕໍ່ຜ່ານທາງການ “ຈູບ” ທີ່ໄວໜຸ່ມຄວນລະວັງ

ພະຍາດໂມໂນນິວຄລິໂອຊິສ ເປັນພະຍາດທີ່ສາມາດຕິດຕໍ່ກັນໄດ້ຜ່ານການ “ຈູບ” ເຊິ່ງກຸ່ມສ່ຽງກໍຄືໄວໜຸ່ມ ໂດຍອາການຂອງພະຍາດຈະເປັນໄດ້ຕັ້ງແຕ່ມີໄຂ້, ເຈັບຫົວ, ອ່ອນເພຍ ໄປຈົນເຖິງມີຜື່ນຂຶ້ນຕາມຕົນໂຕ, ເຈັບຄໍ, ເບື່ອອາຫານ ໂດຍສາມາດເຊົາເອງໄດ້ໃນ 2-3 ອາທິດ ແຕ່ຄວນລະມັດລະວັງບໍ່ຈູບກັບຜູ້ທີ່ຕິດເຊື້ອ, ບໍ່ໃຊ້ບ່ວງສ້ອມ, ຈອກນໍ້າ ແລະ ຂອງໃຊ້ສ່ວນຕົວຮ່ວມກັບຜູ້ອື່ນ.

ສາເຫດຂອງພະຍາດໂມໂນນິວຄລິໂອຊິສ

ພະຍາດໂມໂນນິວຄລິໂອຊິສ ເກີດຈາກການຕິດເຊື້ອໄວຣັດເອັບສະໄຕບາ (Epstein-Barr Virus: EBV) ທີ່ສາມາດແພ່ກະຈາຍຜ່ານທາງນໍ້າລາຍ, ການໄອ ຫຼື ການຈາມ.

ອາການຂອງພະຍາດໂມໂນນິວຄລິໂອຊິສ

1. ມີໄຂ້
2. ເຈັບຫົວ
3. ອ່ອນເພຍ
4. ໄອ ຫຼື ຈາມ
5. ເຈັບຄໍ
6. ອາດພົບຜື່ນຂຶ້ນຕາມຮ່າງກາຍ ເຊັ່ນ ໜ້າ, ຄໍ, ໜ້າເອິກ, ຫຼັງ
7. ເບື່ອອາຫານ
8. ເຫື່ອອອກຕອນກາງຄືນ

ວິທີປິ່ນປົວພະຍາດໂມໂນນິວຄລິໂອຊິສ

ໂມໂນນິວຄລິໂອຊິສ ສາມາດມີອາການທີ່ດີຂຶ້ນ ແລະ ເຊົາໄດ້ເອງພາຍໃນ 2-3 ອາທິດ ແຕ່ຫາກໃນຄົນທີ່ມີອາການໜັກ ເຊັ່ນ ມີຜື່ນຂຶ້ນເຕັມໂຕ, ອ່ອນເພຍຫຼາຍ ຄວນພົບແພດເພື່ອກວດຮ່າງກາຍ ແລະ ເລືອກໃຫ້ຢາມາກິນຢ່າງເໝາະສົມ (ຢາທີ່ຊື້ກິນເອງອາດຈະບໍ່ຊ່ວຍປິ່ນປົວໄດ້ຖືກຈຸດ ຈຶ່ງອາດຈະບໍ່ໄດ້ຜົນ ຫຼື ບໍ່ເຮັດໃຫ້ອາການດີຂຶ້ນ).

ວິທີປ້ອງກັນພະຍາດໂມໂນນິວຄລິໂອຊິສ

1. ບໍ່ຈູບກັບຄົນທີ່ຕິດເຊື້ອພະຍາດໂມໂນນິວຄລິໂອຊິສ
2. ບໍ່ໃຊ້ເຄື່ອງໃຊ້ສ່ວນຕົວຮ່ວມກັບຜູ້ອື່ນ ເຊັ່ນ ບ່ວງ, ສ້ອມ, ໄມ້ຖູ່, ຈອກນໍ້າ, ຟອຍຖູແຂ້ວ, ຜ້າເຊັດໂຕ ແລະ ອື່ນໆ
3. ຫຼີກລ່ຽງການສຳຜັດກັບລະອອງນໍ້າລາຍ ຫຼື ຂີ້ກະເທິຂອງຜູ້ອື່ນ
4. ຮັກສາຮ່າງກາຍໃຫ້ແຂງແຮງຢູ່ສະເໝີ ເຊັ່ນ ກິນອາຫານທີ່ມີປະໂຫຍດ ຄົບ 5 ໝູ່, ອອກກຳລັງກາຍເປັນປະຈຳ ແລະ ພັກຜ່ອນໃຫ້ພຽງພໍ
5. ຫາກມີອາການຜິດປົກກະຕິ, ມີໄຂ້, ບໍ່ສະບາຍ ແລະ ອາການບໍ່ດີຂຶ້ນພາຍໃນ 2-3 ວັນ ຄວນພົບແພດ