ໄປເມືອງຮົ່ມ ຢ່າລືມໄປສຳຜັດທຳມະຊາດ "ນ້ຳຕົກຕາດພະແຈແຫຼ້"

ນ້ຳຕົກຕາດພະແຈແຫຼ້ແມ່ນຕັ້ງຢູ່ບ້ານນ້ຳຄຽນ ເມືອງຮົ່ມ ແຂວງໄຊສົມບູນ ເປັນຕາດໜຶ່ງທີ່ມີຄວາມສວຍສົດງົດງາມ, ມີນ້ຳໄຫຼຕະຫຼອດປີ, ມີນ້ຳຕົກສູງປະມານ 100 ແມັດ ແລະ ມີເນື້ອທີ່ທັງໝົດປະມານ 3 ເຮັກຕາ. ນ້ຳຕົກຕາດພະແຈແຫຼ້ແມ່ນຫ່າງຈາກຕົວເມືອງຮົ່ມປະມານ 6 ກິໂລແມັດ ເຊິ່ງທິດເໜືອຕິດກັບບ້ານອ່າວ, ທິດໃຕ້ຕິດກັບບ້ານນ້ຳຄຽນ, ທິດຕາເວັນ ອອກຕິດກັບພູສາມເສົ່າ ແລະ ທິດຕາເວັນຕົກຕິດກັບບ້ານຊຽງມີ ເມືອງລ້ອງຊານ.

ສ່ວນສາເຫດທີ່ມາຂອງຊື່ ນ້ຳຕົກຕາດພະແຈແຫຼ້ ນັ້ນ ຕາມການບອກເລົ່າຂອງຊາວບ້ານໄດ້ໃຫ້ຮູ້ວ່າ ມີປະຊາຊົນໄດ້ພົບເຫັນພະອົງໜຶ່ງ ທີ່ຢູ່ໃກ້ຕາດແຫ່ງນີ້ເປັນສີດຳ ແລະ ມີຫຼາຍແຈ ຕໍ່ມາປະຊາຊົນເຂດນັ້ນ ຈຶ່ງເອີ້ນຜາແຫ່ງນີ້ວ່າ ນ້ຳຕົກຕາດພະແຈແຫຼ້ ຈົນເຖິງທຸກວັນນີ້. ຫຼາຍຄົນເອີ້ນນ້ຳຕົກຕາດນີ້ວ່າ ຜາແຈແລ, ແຕ່ຈາກຂໍ້ມູນຈາກຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງຮົ່ມ ເພິ່ນເອີ້ນນ້ຳຕົກນີ້ວ່າ: ນ້ຳຕົກຕາດພະແຈແຫຼ້.