ແຮງງານລາວໄດ້ຮັບການພັດທະນາສີມື ຫຼາຍກວ່າ 75 ພັນຄົນ ໃນປີ 2019 ຜ່ານມາ

ທ່ານ ນາງ ໃບຄໍາ ຂັດທິຍະ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ລາຍງານຕໍ່ກອງປະຊຸມວິຊາການ ແຮງງານ ແລະ ສະວັດດີການສັງຄົມ ປະຈໍາປີ 2019 ທີ່ໄດ້ຈັດຂຶ້ນໃນທ້າຍເດືອນ ມັງກອນ ນີ້ວ່າ: 1 ປີຜ່ານມາ, ຂະແໜງການຂອງຕົນ ໄດ້ເອົາໃຈໃສ່​ ຕິດຕາມ​ການ​ດຸ່ນດ່ຽງ​ແຮງ​ງານ​ຕາມທິດ​ການ​ຫັນ​ເປັນ​ອຸດສາຫະກໍາ ​ແລະ ທັນ​ສະ​​ໄໝ ຊຶ່ງ​ອັດຕາ​ສ່ວນ​ໂຄງ​ປະກອບ​ກໍາລັງ​ແຮງ​ງານ​ຂົງ​ເຂດ​ກະ​ສິກໍາ​ຫຼຸດ​ລົງ​ຈາກ 64.8% ​ໃນ​ປີ 2018​ ມາເປັນ 64.1% ​ໃນປີ 2019, ຂົງ​ເຂດ​ອຸດ​ສະຫະ​ກໍາ ​ແລະ ບໍ່​ແຮ່ ​ເພີ່ມຂຶ້ນ​ຈາກ 11.6% ​ໃນ​ປີ 2018 ມາ​ເປັນ 12% ​ໃນ​ປີ 2019​ ແລະ ຂົງ​ເຂດການ​ບໍລິການ​ເພີ່ມ​ຂຶ້ນຈາກ 23.6%​​ ໃນ​ປີ 2018 ເປັນ 23.7%​.

ໃນ​ປີ 2019 ຜ່ານມາ, ໄດ້ເອົາໃຈໃສ່ ພັດທະນາສີມືແຮງງານໃຫ້​ແກ່​ແຮງ​ງານ​ລາວໄດ້ທັງໝົດ 75,769 ຄົນ, ຍິງ 33,700 ກວ່າຄົນ, ເທົ່າກັບ 48.83% ຂອງແຜນການປີ (155,183 ຄົນ) ໃນນີ້, ຂະແໜງກະສິກໍາມີ 19 ພັນກວ່າຄົນ, ຍິງ 8,300 ກວ່າຄົນ, ອຸດສາຫະກໍາ 19,330 ກວ່າຄົນ, ຍິງ 4,600 ກວ່າຄົນ ແລະ ຂະແໜງບໍລິການ 37,370 ຄົນ, ຍິງ 20,790 ກວ່າຄົນ.

ພ້ອມທັງໄດ້ຈັດຕັ້ງການທົດສອບສີມືແຮງງານຕາມມາດຕະຖານສີມືແຮງງານແຫ່ງຊາດ, ຊຶ່ງມີຜູ້ເຂົ້າຮ່ວມທັງ​ໝົດ 1,848 ຄົນ, ຍິງ 700 ກວ່າຄົນເທົ່າກັບ 73.92% ຂອງແຜນການປີ (2,500 ຄົນ), ໃນນີ້ມີ: ຂະແໜງການອຸດສາຫະກໍາ, ຂະແໜງບໍລິການ ແລະ​ ສ້າງມາດຕະຖານສີມືແຮງງານໃນຂະແໜງກະສິກໍາໄດ້ 5 ສາຂາອາຊີບ ບັນລຸໄດ້ 100% ຂອງແຜນການປີ ໃນນັ້ນມີ ອາຊີບປູກເຂົ້າ, ປູກຜັກ, ລ້ຽງງົວ, ລ້ຽງປາ ແລະ ລ້ຽງໄກ່; ພ້ອມໄດ້ເອົາໃຈໃສ່ຕິດ​ຕາມ, ຊຸກຍູ້ ແລະ ສ້າງເງື່ອນໄຂໃຫ້ແກ່ການພັດທະນາສີມືແຮງງານລາວ ໂດຍໄດ້ສົມ​ທົບ​ທຶນການກໍ່ສ້າງສູນພັດທະນາສີມືແຮງງານແຂວງບໍ່ແກ້ວ ​ລວມມູນຄ່າ​​ທັງ​ໝົດ 8 ຕື້ກີບ, ໃນ​ນີ້: ກະຊວງ ສົມ​ທົບ​ທຶນ 40% ຂອງມູນຄ່າກໍ່ສ້າງທັງໝົດ, ຊຶ່ງມາຮອດປັດຈຸບັນ ສໍາເລັດແລ້ວ 100% ແລະ ໄດ້ມີການມອບ-ຮັບໂຄງ​ການໃນທ້າຍປີ 2019 ຜ່ານມາ.

(ໄກ່ແຈ້)