ຍີ່ປຸ່ນໃຫ້ການຊ່ວຍເຫຼືອປັບປຸງທັກສະການອ່ານຂອງເດັກນ້ອຍ

ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອລ້າ 516,347 ໂດລາສະຫະລັດ ຫຼື ປະມານ 4.5 ຕື້ກີບ ເພື່ອປັບປຸງທັກສະ ການອ່ານຂອງເດັກນ້ອຍ ແລະ ສະພາບແວດລ້ອມດ້ານການສຶກສາ ລວມໄປເຖິງຄວາມກ້າວໜ້າຂອງໂຮງຮຽນປະຖົມໃນລາວ ພິທີເຊັນສັນຍາໂຄງການຈັດຂື້ນທີ່ສະຖານທູດຍີ່ປຸ່ນ ໃນວັນທີ 28 ພະຈິກ 2019 ລະຫວ່າງທ່ານ ທາເກວາກະ ເຄໂຊ ເອກອັກຄະລາຊະທູດຍີ່ປຸ່ນປະຈໍາລາວ​ ແລະ ທ່ານ​ ນາງ ມິຢາອຸຈິ ມາຢຸໂກະ ຜູ້ຈັດການໂຄງການຂອງອົງການສຸພະນິມິດສາກົນແຫ່ງປະເທດຍີ່ປຸ່ນ ເຊິ່ງເປັນອົງການບໍ່ຫວັງຜົນກຳໄລຈາກປະເທດຍີ່ປຸ່ນ ​ສຳລັບການ​ເຊັນສັນ​ຍາ​​​ຊ່ວຍ​ເຫຼືອ​ຄັ້ງ​ນີ້​​ແມ່ນ​ການ​ສ​ະ​ໜັບ​ສະ​ໜູນ​ທຶນ​​ປີທຳອິດຂອງ​ໂຄງ​ການທີ່​ມີ​ອາ​ຍຸ 3 ປີ.

ສໍາລັບໂຄງການທີ່ມີຊື່ວ່າ “ການປັບປຸງທັກສະການອ່ານຂອງເດັກນ້ອຍ ແລະ ສະພາບແວດລ້ອມດ້ານການສຶກສາລວມໄປເຖິງຄວາມກ້າວໜ້າຂອງໂຮງຮຽນປະຖົມໃນເມືອງທ່າປາງທອງ ແຂວງສະຫວັນນະເຂດ ໃນປີທຳອິດມີເປົ້າໝາຍທີ່ຈະຮັບປະກັນໃຫ້ນັກຮຽນທຸກຄົນໃນເມືອງທ່າປາງທອງ ບໍ່ວ່າຈະເປັນເພດ ຊົນເຜົ່າ ສະພາບທາງເສດຖະກິດ ຫຼື ມີການສູນເສຍອົງຄະ ກໍສາມາດເຂົ້າເຖິງການສຶກສາຂັ້ນປະຖົມ ແລະ ປັງປຸງການຮຽນຮູ້ໃນເບື້ອງຕົ້ນໄດ້ ທ່າປາງທອງແມ່ນໜຶ່ງໃນບັນຫາເມືອງທີ່ມີຄວາມສຳຄັນທີ່ສຸດໃນປະເທດລາວ ຄວາມທຸກຍາກ ຄວາມຫ່າງໄກທາງພູມສາດ ລວມໄປເຖິງການຢູ່ໃນຊົນເຜົ່າໃດໜຶ່ງນັ້ນສາມາດສົ່ງຜົນກະທົບໃນແງ່ລົບສູ່ທັກສະການຮຽນຮູ້ ແລະ ການກຽມພາສາຂອງນັກຮຽນຫຼາຍຄົນ ອົງການສຸພະນິມິດສາກົນແຫ່ງປະເທດຍີ່ປຸ່ນຈະຊ່ວຍສະໜອງຫຼັກສູດການເຝິກອົບຮົມອາຈານ ເພື່ອຍົກລະດັບການສອນດ້ານການຂຽນການອ່ານ ສະໜັບສະໜູນຊື້ອຸປະກອນທີ່ຈຳເປັນຕໍ່ສຸຂາພິບານ ແລະ ໃຫ້ຄຳແນະນຳຕໍ່ຜູ້ປົກຄອງ ຊຸມຊົນໃຫ້ການຊ່ວຍເຫຼືອເດັກ ນ້ອຍພັດທະນາທັກສະການອ່ານຂອງພວກເຂົາ ເພື່ອປະກອບສ່ວນເຂົ້າໃນການສຶກສາທີ່ມີຄຸນນະພາບໃນໂຮງຮຽນບັນດາບ້ານທີ່ເມືອງທ່າປາງທອງ.