ໂຮງຮຽນແກ້ວປັນຍາ ແຂວງຫົວພັນ ຈະປະກາດເປັນໂຮງຮຽນປາສະຈາກທໍ່ດູດ-ຈອກພລາສຕິກ ເດືອນພະຈິກນີ້

ເປັນໂຮງຮຽນແຫ່ງທໍາອິດ ໃນ ສປປ ລາວ ທີ່ສະແດງເຈດຈໍານົງ ຢ່າງໜັກແໜ້ນ ວ່າຈະເຮັດໃຫ້ໂຮງຮຽນ ປາດສະຈາກຈອກ ແລະ ທໍ່ດູດ ພລາສຕິກ ເພື່ອຫຼຸດຜ່ອນການຊື້ນໍ້າ ແລະ ເຄື່ອງດື່ມ ທີ່ບັນຈຸຂວດ ແລະ ຖົງ ພລາສຕິກ, ທັງເປັນຕົ້ນແບບໃຫ້ແກ່ໂຮງຮຽນອື່ນໆ ເພຶ່ອເອົາໃຈໃສ່ຕໍ່ບັນຫາສະພາບແວດລ້ອມ.

ທ່ານ ຄໍາແກ້ວ ອຸນນານົງນຸດ ອໍານວຍການໂຮງຮຽນ ແກ້ວປັນຍາ ເມືອງຊໍາເໜືອ ແຂວງຫົວພັນ ກ່າວວ່າ: ທາງໂຮງຮຽນກໍາລັງດໍາເນີນການປູກຈິດສໍານຶກ ແລະ ຝຶກວິໄນ ໃຫ້ແກ່ນ້ອງໆ ນັກຮຽນ ແລະ ຄູອາຈານ ໃນໂຮງຮຽນ ໃນການປະກອບສ່ວນຮັກສາສິ່ງແວດລ້ອມ ໂດຍເລີ່ມທົດລອງໃຫ້ນັກຮຽນ ເອົາໄມ້ໄຜ່ ເຊິ່ງເປັນວັດສະດຸຈາກທຳມະຊາດ ມາຜະລິດເປັນຈອກ ແລະ ທໍ່ດູດ ໃຫ້ຕົນເອງ ເພື່ອຈຸດປະສົງ ໃນການຫຼຸດຜ່ອນ ການຊື້ນໍ້າ ແລະ ເຄື່ອງດື່ມ ທີ່ບັນຈຸຂວດພລາສຕິກ.

ໃນເບື້ອງຕົ້ນ ເຖິງແມ່ນວ່າມັນຈະຫຍຸ້ງຍາກແດ່ ທີ່ຈະໃຊ້ໄມ້ໄຜ່ ມາທົດແທນພາຊະນະປະເພດພລາສຕິກ ແຕ່ເຊື່ອແນ່ວ່າ ນ້ອງໆແຕ່ລະຄົນຈະເຫັນຄວາມສໍາຄັນ ແລະ ຄ່ອຍໆປັບປ່ຽນແນວຄິດມັກງ່າຍ, ກິນງ່າຍ ຂອງຕົນເອງລົງ ເພື່ອເຮັດໃຫ້ໂລກຂອງພວກເຮົາໜ້າຢູ່ຍິ່ງຂຶ້ນ.

ພ້ອມກັນນັ້ນ, ທາງໂຮງຮຽນ ຄາດວ່າຈະປະກາດເປັນໂຮງຮຽນປາສະຈາກ ທໍ່ດູດ ແລະ ຈອກ ພລາສຕິກ ໃນກາງເດືອນ ພະຈິກ 2019 ນີ້.