Apple ເຕືອນຜູ້ໃຊ້ງານ iPhone ແລະ iPad ຮຸ່ນເກົ່າ ຢ່າລືມອັບເດດ iOS ກ່ອນມີບັນຫາໃນການນຳໃຊ້

Apple ປະ​ກາດ​ເຕືອນ​ຜູ້​ໃຊ້​ງານ iPhone ແລະ iPad ຮຸ່ນ​ເກົ່າ ​ຢ່າ​ລືມ​ອັບ​ເດດ iOS ເພື່ອ​ໃຫ້​ລະບົບ​ຮວມທັງ​ແອັບ​ພລິ​ເຄ​ຊັ່ນ​ຕ່າງໆ ຈາກ App Store ຍັງ​ນຳໃຊ້​ໄດ້​ປົກກະຕິ​ກ່ອນ​ວັນທີ 3 ພ​ະຈິກ​ນີ້.

ບັນຫາ​ດັ່ງ​ກ່າວ​ເກີດ​ຈາກ Global Positioning System network ຫຼື GPS ໄດ້​ຣີ​ເຊັດ​ຄ່າ​ເວລາ​ໃໝ່​ເມື່ອ​ວັນທີ 6 ເມ​ສາ​ທີ່​ຜ່ານມາ. ແຕ່​ຈະ​ບໍ່​ມີ​ຜົນ​ກັບ​ອຸປະກອນ​ຮຸ່ນ​ເກົ່າ​ຈົນ​ກວ່າ​ຈະ​ເຖິງ​ວັນທີ 3 ພະຈິກ​ນີ້.

ເປັນ​ເລື່ອງ​ສຳຄັນ​ທີ່​ຕ້ອງ​ອັບ​ເດດ​ອຸປະກອນ iPhone iPad ຮຸ່ນ​ເກົ່າ​ກ່ອນ​ວັນທີ 3 ພະຈິກ​ນີ້ ເພື່ອ​ໃຫ້​ລະບົບ GPS, ເວລາ ແລະ​ ວັນທີ​ສາມາດ​ເຮັດວຽກ​ໄດ້​ປົກກະຕິ – Apple.

ອຸປະກອນ​ທີ່​ໄດ້ຮັບ​ຜົນ​ກະທົບ​ຄື iPhone 5, iPad 4, iPhone 4s, iPad mini 1, iPad 2, ແລະ iPad 3 ຢ່າ​ລືມ​ອັບ​ເດດ​ເປັນ iOS 9.3.6 ຫຼື iOS 10.3.4 (iPhone 5, iPad 4).

ຫາກ​ບໍ່​ໄດ້​ອັບ​ເດດ​, ຕົວ​ເຄື່ອງ​ຈະ​ສູນ​ເສຍ​ການ​ໃຊ້​ງານ​ຫຼາຍ​ຢ່າງ ເຊັ່ນ: ລະບົບ GPS ບັນຫາ​ດ້ານ​ເວລາ ສົ່ງ​ຜົນ​ໃຫ້​ລະບົບ​ເຄືອ​ຂ່າຍ​ໃນ​ເຄື່ອງ​ມີ​ບັນຫາ, ບໍ່​ສາມາດ​ໂຫຼດ​ອີ​ເມວ ຫຼື ​ມີ​ບັນຫາ​ການ Sync ຂໍ້​ມູນ​ກັບ iCloud ໄດ້. ເພາະ​ສະ​ນັ້ນ ​ກໍ​ຢ່າ​ລືມ​ອັບ​ເດດ​ເຄື່ອງ​ກັນ​ເດີ.