ຮູບເງົາລາວ "ບໍ່ມີວັນຈາກ" ເລີ່ມອອກສາຍໃນເທດສະການຮູບເງົາຢູ່ຕ່າງປະເທດ ເລີ່ມຕົ້ນທີ່ອິຕາລີ

ຮູບເງົາ "ບໍ່ມີວັນຈາກ" ຫຼື The Long Walk ຜົນງານການກຳກັບຂອງເຈົ້າແມ່ຮູບເງົາສະຫຍອງຂວັນຂອງລາວ ຢ່າງ ແມັດຕີ້ ໂດ ເລີ່ມເດີນສາຍເພື່ອປາກົດສູ່ສາຍຕາຂອງຊາວໂລກແລ້ວ ເລີ່ມຕົ້ນເປີດຈໍກັນທີ່ເທດສະການຮູບເງົາ Giornate degli AUTORI​ ທີ່​ເມືອງເວນິສ ປະເທດອິຕາລີ.

ຮູບເງົາດັ່ງກ່າວນີ້ໄດ້ນັກສະແດງຄູ່ບຸນຂອງຜູ້ກຳກັບສາວ ແມັດຕີ້ ໂດ ນັ້ນກໍຄື "ຕັອດ ລີນ້າ" ຫຼື ວິລຸນາ ເພັດມະນີ ມາຮັບບົດນຳ ຮ່ວມກັບນັກສະແດງສີມືດີຂອງລາວອີກຫຼາຍທ່ານ.

ຕັອດ ລີນ້າ ໂພສຂໍ້ຄວາມໃນເຟສບຸກສ່ວນຕົວເມື່ອວັນທີ 8 ກັນຍາ ທີ່ຜ່ານມາກ່ຽວກັບການເປີດສາຍຮູບເງົາ ບໍ່ມີວັນຈາກ ທີ່ອິຕາລີ ວ່າ ບໍ່ຄິດວ່າຕົນເອງຈະມາຢືນຢູ່ທີ່ງານລະດັບແຖວໜ້າຂອງໂລກ ເພື່ອນຳສະເໜີຮູບເງົາທີ່ຕົນເອງຮ່ວມສະແດງ.

ແມັດຕີ້ ໂດ (ຊ້າຍ) ແລະ ຕັອດ ລີນ້າ (ຂວາ) ໃນງານເທດສະການຮູບເງົາ Giornate degli AUTORI ທີ່ປະເທດອິຕາລີ / ພາບ: Tot Lina

"ຈາກຮູບເງົາເກືອບ​ສອງພັນເລື່ອງ​ຈາກທົ່ວໂລກ​ ສົ່ງເຂົ້າເພື່ອຄັດເລືອກ, ໜຶ່ງໃນນັ້ນ ຮູບເງົາລາວ "ບໍ່ມີວັນ​ຈາກ​ - THE LONG WALK" ໂດຍຜູ້ກຳກັບຍິງ​ຂອງລາວ​ Mattie Do​ ກໍ່ໄດ້ຖືກຄັດເລືອກ ເພື່ອຈະສາຍໃນເທດສະການນີ້​ ເຊິ່ງເປັນຄັ້ງທຳອິດໃນປະຫວັດສາດຂອງຮູບເງົາລາວ ກໍ່ວ່າໄດ້", ຕັອດ ກ່າວ.

ນອກຈາກເທດສະການຮູບເງົາຢູ່ອິຕາລີແລ້ວ, ຮູບເງົາ ບໍ່ມີວັນຈາກ ຍັງມີແຜນທີ່ຈະເດີນທາງໄປສາຍໃນແຕ່ລະເທດສະການ ເຊັ່ນ: ໂຕຣອນໂຕ ປະເທດແຄນາດາ, ປູຊານ ປະເທດເກົາຫຼີໃຕ້, ໂຕກຽວ ປະເທດຍີ່ປຸ່ນ ແລະ ເທດສະການຮູບເງົາໃນປະເທດອື່ນໆອີກ.

ຮູບພາບຈາກຮູບເງົາ ບໍ່ມີວັນຈາກ / ພາບ: Tot Lina

ສຳລັບ "ບໍ່ມີວັນຈາກ" ເປັນຮູບເງົາແບບ Sci-Fi ເປັນເຫດການໃນອະນາຄົດໃນປີ 2065 ທີ່ແຝງໄປດ້ວຍເງື່ອນງຳ ອຳພາງຫຼາຍອັນ ແລະ ​ຕິດພັນກັບຄວາມເຊື່ອຂອງຄົນລາວໃນມຸມມອງຊາວຕ່າງຊາດ ເຮັດໃຫຕ່າງປະເທດຫຼາຍຄົນສົນໃຈໃນຫຼາຍໆຈຸດຂອງຮູບເງົາເລື່ອງນີ້ ເຊິ່ງ​ ຜູ້ກຳກັບ​ ແມັດຕີ້ ແລະ​ ຕັອດ ຕ່າງຫນ້າຄົນລາວກ່າວວ່າ ຮູ້ສຶກດີໃຈທີ່ສຸດ​ ແລະ ມັນເຕັມໄປດ້ວຍຄວາມຕື້ນຕັນ ທີ່ໄດ້ນຳສະເໜີຫຼາກຫຼາຍມຸມມອງ,​ ຄວາມເຊື່ອ,​ ການດຳລົງຊີວິດ ທີ່ຕິດພັນກັບວັດທະນະທຳ, ປະເພນີ​ ຂອງຄົນລາວ​ ໃນເວທີຮູບເງົາດັ່ງກ່າວນີ້.​

ທັງນີ້ ຮູບເງົາເລື່ອງນີ້ຈະເຂົ້າສາຍໃນລາວພາຍໃນປີ 2020 ເຊິ່ງກຳນົດເວລາລະອຽດຕ້ອງລໍຖ້າປະກາດຢ່າງເປັນທາງການອີກຄັ້ງໜຶ່ງ.