"ຄຣິສຕິນາ" ຊີ້ ເດີນທາງກັບລາວບໍ່ທັນ ອົດຮ່ວມຊີງມຸງກຸດ Miss Universe Laos 2019

ກາຍເປັນປະເດັນທີ່ບັນດາແຟນນາງງາມລາວຕ່າງກໍກ່າວເຖິງກັນບໍ່ຢຸດສຳລັບ ກໍລະນີທີ່ການເປີດຮັບສະໝັກຜູ້ເຂົ້າປະກວດ Miss Universe Laos 2019 ໄຮ້ເງົາຂອງ "ຄຣິສຕິນາ ລາສະສິມມາ" ສາວລາວອີກຄົນທີ່ແຟນນາງງາມຕ່າງກໍເຊຍໃຫ້ລົງປະກວດ.

ຫຼ້າສຸດເມື່ອວານນີ້ (29 ກໍລະກົດ 2019) ຄຣິສຕິນາ ລາສະສິມມາ ໄດ້ໃຫ້ສຳພາດຕໍ່ທີມຂ່າວບັນເທີງ muan.la ກ່ຽວກັບປະເດັນດັ່ງກ່າວ ໂດຍລະບຸວ່າ ຕົນເອງຕິດພາລະກິດຢູ່ໄທ ບໍ່ສາມາດເດີນທາງກັບລາວໄດ້ທັນເພື່ອສະໝັກປະກວດເວທີດັ່ງກ່າວ.

ສາວ ຕິນາ ກ່າວວ່າ ທາງກອງປະກວດປ່ຽນວັນເວລາກະທັນຫັນ ເລີຍໄປບໍ່ທັນ ເພາະກຳນົດໃໝ່ນີ້ແມ່ນຕຳກັບຄິວສະແດງລະຄອນເວທີຢູ່ໄທຂອງຕົນເອງ ເຊິ່ງມີກຳນົດເວລາກຽມການສະແດງ ແລະ ຂຶ້ນສະແດງຈົນຮອດຕົ້ນເດືອນສິງຫານີ້. "ຖ້າເປັນວັນເວລາເດີມ ຕາມທີ່ກອງປະກວດມິສຢູນິເວີສລາວ 2019 ແຈ້ງໄວ້ກ່ອນໜ໊ານີ້ແມ່ນທັນ ເພາະຕິນາເອງໄດ້ລັອກຄິວມື້ນັ້ນໄວ້ຕາມແຈ້ງແລ້ວ ເພື່ອໃຫ້ຮ່ວມປະກວດໄດ້ຕາມມື້ນັ້ນໆໃຫ້ຄົບ ແຖມຍັງຂໍເລື່ອນເວລາການສະແດງໃຫ້ຕີນາສາມາດຮ່ວມຕາມວັນທີ່ກອງປະກວດແຈ້ງໃຫ້ຄົບໄດ້ທຸກມື້ອີກ", ຕິນາ ກ່າວ.

ຄຣິສຕິນາ ຂະນະຊ້ອມການສະແດງລະຄອນເວທີຢູ່ໄທ / ພາບ: Christina Lasasimma

ຜູ້ກ່ຽວກ່າວຕື່ມວ່າ ຫາກໍຮູ້ທຸກຢ່າງເມື່ອຕອນກາງຄືນກ່ອນມື້ທີ່ປ່ຽນໃໝ່ ຈະບິນກັບລາວກໍບໍ່ທັນ. "ຕິນາ ເຮັດສຸດຄວາມສາມາດແລ້ວ ຕິດຕາມຂ່າວທຸກໆມື້ ພ້ອມທັງຖາມຂໍ້ມູນທາງກອງປະກວດເພື່ອຢືນຢັນວັນເວລາທີ່ຊັດເຈນ ເພາະຕີນາມີຕາຕະລາງງານທີ່ແໜ້ນ ຕີນາກະແບ່ງເວລາໃຫ້ທຸກຝ່າຍໃຫ້ເໝາະສົມ ແລະ ເຄົາລົບໜ້າທີ່ວຽກງານທີ່ຮັບມາ ເຮົາຕ້ອງຮັບຜິດຊອບ ຫວັງວ່າຈະເຂົ້າໃຈກັນ ແລະ ເປັນກຳລັງໃຈໃຫ້ຕິນາເດີ".

ສາວຄົນນີ້ກ່າວຖິ້ມທ້າຍຢ່າງເສຍດາຍໂອກາດທີ່ພາດໄປນີ້ວ່າ ຕົນເອງເຮັດເຕັມທີ່ເທົ່າທີ່ສາມາດເຮັດໄດ້ແລ້ວ ຖ້າແຍກຮ່າງໄດ້ຄົງຈະດີ.

ທັງນີ້, ນີ້ບໍ່ແມ່ນຄັ້ງທຳອິດທີ່ ສາວຄົນນີ້ພາດການປະກວດເວທີດັ່ງກ່າວ, ເມື່ອປີກ່ອນ ຄຣິສຕິນາກໍໄດ້ຍື່ນສະໝັກຮ່ວມປະກວດ ແຕ່ຕໍ່ມາທາງກອງປະກວດໄດ້ຍົກເລີກການປະກວດກະທັນຫັນ ແລະ ໄດ້ແຕ່ງຕັ້ງ ອອນອານົງ ຫອມສົມບັດ ຮອງມິສຢູນິເວີສລາວ 2017 ໄປປະກວດແທນ.

ແນວໃດກໍຕາມເຮົາກໍຍັງຄົງເປັນກຳລັງໃຈ ແລະ ຕິດຕາມຜົນງານຂອງສາວ ຄຣິສຕິນາ ຄົນນີ້ຕໍ່ໄປເດີ.