ລໍ້າສະໄໝ! "ຜ້າປູຕຽງຝັງໄມໂຄຣຊິບ" ເຮັດໃຫ້ຮູ້ວ່າມີການຊັກຄັ້ງສຸດທ້າຍເມື່ອໃດ

ຈີນ​ເປີດໂຕລະບົບ​ລໍ້າສະໄໝ​ທີ່​ບອກ​ໃຫ້​ຮູ້ວ່າ​ຜ້າ​ປູ​ຕຽງ​ຖືກ​ຊັກ​ເທື່ອ​ສຸດ​ທ້າຍ​ເມື່ອ​ໃດ? ເພື່ອ​ຊ່ວຍ​ໃຫ້​ນັກ​ເດີນທາງ​ທີ່​ເມື່ອຍ​ລ້າ​ໄດ້​ເບົາ​ໃຈ.

ຮ້ານ​ບໍລິການ​ຊັກ​ຮີດ​ໃນ​ເມືອງ​ອູ໋​ຮັ່ນ​ໃນ​ພາກ​ກາງ​ຂອງ​ຈີນ ໃຊ້​ວິທີ​ການ​ຕິດ​ໄມ​ໂຄຣ​ຊິບ (microchip) ລົງ​ໃນ​ຜ້າ​ປູ​ບ່ອນນອນ, ຜ້າ​ເຊັດໂຕ ແລະ​ ຜ້າ​ຫົ່ມ ເຊິ່ງລູກ​ຄ້າ​ສາມາດ​ໃຊ້ໂທລະສັບມື​ຖື​ອ່ານ​ເບິ່ງ​ວັນທີ​ຜ້າ​ເຫຼົ່າ​ນັ້ນ​ຖືກ​ຊັກ​ເປັນ​ເທື່ອ​ສຸດ​ທ້າຍ​ໄດ້.

ສຳ​ນັກ​ຂ່າວ​ຊິນ​ຫວາ​ລາຍ​ງານ​ວ່າ ຊິບ​ດັ່ງ​ກ່າວ​ຈະ​ຖືກ​ຕິດ​ໄວ້​ທີ່​ມຸມ​ໜຶ່ງ​ຂອງ​ຜະລິດຕະພັນ​ຕ່າງ​ໆ ທີ່​ສົ່ງ​ໄປ​ຊັກ​ທີ່​ຮ້ານ​ຊັກ​ຮີດ Wuhan Kunteng Laundry ເຊິ່ງເປັນ​ຜູ້​ໃຫ້​ບໍລິການ​ຊັກ​ຮີດ​ແກ່​ໂຮງແຮມ ແລະ ​ຫໍ​ພັກ​ຫຼາຍ​ໆ ແຫ່ງ​ຂອງ​ເມືອງ.

ຊິບ​ແຕ່​ລະໂຕມີລະຫັດ QR ທີ່​ສາມາດ​ສະ​ແກນ​ໄດ້​ດ້ວຍໂທລະສັບມື​ຖື ສາມາດ​ກັນ​ນ້ຳ​ໄດ້ ​ແລະ ​ທົນ​ຕໍ່​ອຸນຫະພູມ​ສູງ. ດັ່ງ​ນັ້ນ​ຊິບ​ເຫຼົ່າ​ນີ້​ຈະ​ຍັງ​ໃຊ້​ການ​ໄດ້ ເຖິງວ່າ​ຈະ​ຜ່ານ​ການ​ຊັກ​ຮີດ​ຫຼາຍ​ເທື່ອ​ຫຼາຍ​ຫົນ​ກໍ​ຕາມ.

ເມືອງ​ອູ໋​ຮັ່ນ​ມີ​ປະຊາກອນ​ຫຼາຍກວ່າ 10 ລ້ານ​ຄົນ​ ແລະ ​ເປັນ​ທີ່​ນິຍົມ​ຂອງ​ນັກ​ທ່ອງ​ທ່ຽວ ເນື່ອງ​ຈາກ​ເປັນ​ເມືອງ​ທີ່​ມີບ​ົດ​ບາດ​ສຳຄັນ​ໃນ​ເລື່ອງ​ຂອງ​ປະຫວັດສາດ​ຈີນ. ນອກ​ຈາກ​ນີ້​ຍັງ​ເຮັດ​ໜ້າທີ່​ເປັນ​ສູນ​ກາງ​ທາງ​ການ​ຂົນ​ສົ່ງ​ທີ່​ສຳຄັນ​ພາຍ​ໃນ​ປະເທດ​ຈີນ​ອີກ​ດ້ວຍ.

ນ​ະວັດຕະ​ກຳ​ນີ້​ເປັນ​ກະແສ​ໃໝ່​ຂອງ​ຄວາມ​ກ້າວ​ໜ້າ​ທາງ​ເຕັກ​ໂນ​ໂລ​ຊີ​ທີ່​ກຳ​ລັງ​ແຜ່​ຂະຫຍາຍ​ໄປ​ທົ່ວ​ໂຮງແຮມຕ່າງ​ໆໃນ​ຈີນ.

ເມື່ອ​ປີກ່ອນ, ກຸ່ມ​ໂຮງ​ແຮມ InterContinental ຮ່ວມ​ມື​ກັບ Baidu ເຊິ່ງເປັນ​ບໍລິສັດເຕັກໂນໂລຊີຈີນ​ທີ່​ມີ​ຄວາມ​ຊ່ຽວ​ຊານ​ດ້ານ​ບໍລິການ​ຄົ້ນ​ຫາ​ທາງ​ອິນເຕີ​ເນັດ ​ແລະ ​ປັນຍາ​ປະດິດ ໃນ​ການ​ເປີດໂຕ “ຫ້ອງ​ອັດ​ສະລິຍະ” ຫຼື “Smart Rooms” ເຊິ່ງຮອງ​ຮັບ​ເຕັກ​ໂນ​ໂລ​ຊີ AI ໃນ​ປະເທດ​ຈີນ.

ຄວາມ​ກ້າວ​ໜ້າ​ດັ່ງ​ກ່າວ​ເລີ່ມ​ຕົ້ນ​ຂຶ້ນ​ໃນ​ໂຮງແຮມທຸລະກິດ​ຂະໜາດ​ໃຫຍ່​ສອງ​ແຫ່ງ​ຂອງ​ປະເທດ ຄື InterContinental Beijing Sanlitun ແລະ InterContinental Guangzhou ເຊິ່ງໄດ້​ເປີດໂຕຫ້ອງ​ສ​ະຫວີດ​ລະບົບ AI ຈຳນວນ 100 ຫ້ອງ.

ສ່ວນ​ໂຮງແຮມອື່ນ​ໆ ເຊັ່ນ ໂຮງ​ແຮມ Hangzhou Marriott Hotel Qianjiang ແລະ​ ໂຮງແຮມ Sanya Marriott Hotel Dadonghai Bay ໄດ້​ກາຍ​ເປັນ​ໂຮງແຮມລະ​ດັບ​ນານາ​ຊາດ​ແຫ່ງ​ທຳອິດ​ຂອງ​ແມ​ຣິ​ອອດ ທີ່​ໃຊ້ເຕັກໂນໂລຊີລະບົບ​ຈື່​ຈຳ​ໃບ​ໜ້າ​ໃນ​ການ​ເຊັກ​ອິນ​ເຂົ້າ​ພັກ​ໃນ​ໂຮງແຮມ.