ຟ້າໃສ Miss Grand Laos ເຕືອນສາວໆ "ຢ່າເອົາໂຕເອງໄປປຽບທຽບກັບຄົນອື່ນໃນໂຊຊຽວ" ພຽງເພາະເຫັນຮູບໃບດຽວ

ຟ້າໃສ - ຈິນນາລີ ນໍລະສິງ Miss Grand Laos 2017 ໂພສເຕືອນສະຕິສາວໆ ຢ່າເອົາໂຕເອງໄປປຽບທຽບຄົນອື່ນທີ່ເຫັນວ່າຊີວິດໃນໂຊຊຽວດີໆ ເພາະໃນໂຕຈິງອາດບໍ່ຄືທີ່ເຫັນ ຫຼື ອາດເປັນແບບນັ້ນແທ້ກໍມີ.

ເຊິ່ງຟ້າໃສໄດ້ແບ່ງປັນຄວາມຄິດດັ່ງກ່າວລົງໃນໄອຈີ chinnalyfasai ລະບຸວ່າ "ຊີວິດດີ໊ດີ.. ທີ່ຈິງແລ້ວ.. ນາງຕັ້ງກ້ອງຖ່າຍເປັນ 10-20 ນາທີ. ຫຼັງຈາກນັ້ນ ມ້ຽນອຸປະກອນ ລະກະເປັນມ້ຽນຂີ້ໝາຕໍ່ (ມ້ຽນຂີ້ໝາອີ່ຫຼີ). ນາງຕັ້ງ "ສະຕູດິໂອ" ດ້ວຍ ໂຕະ, ກ່ອງທິດຊູ, ຢາສີດຍຸງ, ຂອບໃຈຊ່າງພາບສ່ວນຕົວ *ຕັ້ງກ້ອງຖ່າຍ ແລະ ຮີບໂພສໄວໄວ!!".

ນາງກ່າວອີກວ່າ "ສາວໆ.. ຂໍຢ່າງໜຶ່ງເດີ້, ຢ່າເອົາຕົນເອງໄປປຽບທຽບກັບຄົນທີ່ເຮົາເຫັນຊີວິດດີ໊ດີ ໃນໂຊຊຽວເນາະ. ຊີວິດຈິງເຂົາອາດບໍ່ໄດ້ເປັນແບບທີ່ໂພສລົງ ຫຼື ອາດຈະເປັນແບບນັ້ນແທ້ໆກໍມີ.. ຟ້າກໍບໍ່ຮູ້. ແຕ່ເລືອກຕິດຕາມໃຜ ກໍເລືອກແລ້ວເຮັດໃຫ້ເຮົາບັນເທີງຈິດ ບັນເທີງໃຈ ແລະບໍ່ເອົາຕົນເອງໄປປຽບທຽບກັບ "ແຄັບເຈີ້! ຮູບໃບດຽວ" ຂອງເຂົາຊື່ໆ".

ພ້ອມນັ້ນ ໃນໂພສດັ່ງກ່າວ ຍັງມີຮູບຂອງນາງປະກອບການບັນຍາຍ ເຊິ່ງເມື່ອເລື່ອນເບິ່ງແຕ່ລະຮູບ ກໍຈະເຂົ້າໃຈທີ່ນາງບັນຍາຍມາທັງໝົດຢ່າງແຈ່ມແຈ້ງ.

ຖືວ່າເປັນຂໍ້ຄິດທີ່ດີໃນການໃຊ້ສື່ສັງຄົມອອນລາຍຂອງສາວ ຟ້າໃສ ຄົນນີ້ທີ່ໜ້າເອົາໄປຄິດ ແລະ ປັບໃຊ້ກັບຕົນເອງໃນຊີວິດປະຈຳວັນ.