ຄາດ "Avengers: Endgame" ຍາວ 3 ຊົ່ວໂມງ ແນະນຳແຟນໆເຂົ້າຫ້ອງນໍ້າໃຫ້ສຸດ ແລ້ວຢຸດຢູ່ບ່ອນນັ່ງ!

ຍ້ອນກັບ​ໄປ​ເມື່ອ​ປະມານ​ 2 ເດືອນ​ກ່ອນ​ ຄລິບຕົວ​ຢ່າງ​ຂອງ​ “Avengers: Endgame” ໄດ້​ສ້າງ​ຄວາມ​ຮື​ຮາ​ໃຫ້​ຄໍ​ຮູບເງົາທົ່ວ​ໂລກ​ຢ່າງ​ງ່າຍ​ດາຍ​ ແຕ່​ມັນ​ຈະ​ບໍ່​ຢຸດ​ຢູ່​ພຽງ​ເທົ່າ​ນັ້ນ​ຢ່າງແນ່ນອນ​ ເພາະ​ຫຼ້າ​ສຸດ​ ຮູບເງົາຊູເປີ​ຮີ​ໂຣ​ແຫ່ງ​ຄ້າຍ​ມາ​ເວລ​ເລື່ອງ​ນີ້​ອາດຈະ​ສ້າງ​ປາກົດ​ການ​ສູ່ວ​ົງ​ການ​ຮູບເງົາ​ໂລກ​ອີກ​ຄັ້ງ ເມື່ອ​ຄວາມ​ຍາວຂອງ​ຮູບເງົາອາດ​ມີ​ຫຼາຍ​ເຖິງ​ 3 ຊົ່ວ​ໂມງ​ເລີຍ.​

ສອງອ້າຍນ້ອງ​ ໂຈ​ ແລະ​ ແອນ​ໂທ​ນີ​ ຣຸດ​ໂຊ​ ຜູ້​ກຳ​ກັບ​ຮູບເງົາ​ເລື່ອງ​ Avengers: Endgame ໄດ້​ໃຫ້​ສຳພາດ​ຫຼ້າ​ສຸດ​ກັບ​ເວັບ​ໄຊ​​ Collider ແລະ​ ຢືນຢັນ​ວ່າ​ ເລື່ອງ​ລາວ​ຂອງ​ເຫຼົ່າ​ອະເວນເຈີ​ໃນ​ພາກ​ນີ້​ຈະ​ມີ​ຄວາມ​ຍາວລວມປະ​ມານ​ 3 ຊົ່ວ​ໂມງ​ ເຊິ່ງ​ກໍ​ສອດ​ຄ່ອງ​ກັບ​ຖ້ອຍ​ຄຳ​ທີ່​ ໂຈ​ ຣຸດ​ໂຊ​ ເຄີຍກ່າວ​ເອົາ​ໄວ້​ເມື່ອ​ປາຍ​ປີ​ກ່ອນ​ວ່າ​ ການ​ຕັດ​ຕໍ່​ຮູບເງົາເລື່ອງ​ນີ້​ຖື​ເປັນ​ຄວາມ​ຍາກ​ທີ່​ພວກເຂົາ​ຕ້ອງ​ພິສູດຕົວ​ເອງ​. ຫຼາຍ​ຄົນ​ອາດ​ມີ​ເຄື່ອງ​ໝາຍ​ຄຳ​ຖາມ​ເກີດ​ຂຶ້ນ​ໃນ​ຫົວ​ທັນ​ທີ​ວ່າ​ ຄ້າຍ​ຮູບເງົາຈະ​ຍອມ​ ຫຼື ບໍ​.​.. ແຕ່​ເບິ່ງ​ຄື​ວ່າ​ດິສ​ນີ​​ກໍ​ບໍ່​ໄດ້​ອອກ​ມາ​ຊີ້​ແຈງ​ວ່າ​ຕ້ອງ​ການ​ເວີ​ຊັນ​ທີ່​ສັ້ນ​ກວ່າ​ນີ້​ແຕ່​ຢ່າງ​ໃດ​.

ໂຈ ແລະ ແອນໂທນີ ຣຸດໂຊ / ພາບ: GettyImages

ໂຈ​ ຣຸດ​ໂຊ​ ເຜີຍ​ວ່າ​ ຕົນເອງ​ຄິດວ່າ​ສະ​ຕູ​ດິ​ໂອ​ຈະ​ເຫັນ​ພ້ອງ​ວ່າ​ເນື້ອ​ເລື່ອງ​ທີ່​ດີ​ທີ່ສຸດ​ຄື​ຫຍັງ​ ເປັນ​ແບບໃດ​ ເຊິ່ງ​ຫຼັງ​ຈາກ​ທົດສອບ​ໃຫ້​ຜູ້ຊົມ​ບາງ​ກຸ່ມ​ໄດ້​ຊົມ​ ກໍ​ໄດ້ຮັບ​ການຕອບຮັບ​ທີ່ດີເລີດ.​ ຮູບເງົາກຳ​ລັງ​ເຮັດໜ້າທີ່​ຂອງ​ມັນ​ໄດ້​ເປັນ​ຢ່າງ​ດີ​ ທີມ​ງານ​ທຸກ​ຄົນ​ຮູ້ສຶກ​ດີ​ຫຼາຍ​ໆ​ ແລະ​ ຍັງ​ຄົງ​ເຮັດວຽກ​ໜັກ​ຕໍ່ໄປ​ ເພາະ​ງານ​ຂອງ​ພວກ​ເຂົາຍັງ​ຄົງ​ບໍ່​ສຳເລັດ​ລົງ.

ຫຼາຍ​ໄປ​ກວ່າ​ນັ້ນ​ລາວຍັງກ່າວ​ວ່າ​ Endgame ຄື​ຈຸດ​ສູງ​ສຸດ​ຂອງ​ຮູບເງົາຈຳນວນ​ 22 ເລື່ອງ​ຂອງ​ຈັກກະວານ​ມາ​​ເວລ​ ເຊິ່ງ​ມີ​ເລື່ອງ​ລາວ​ຫຼວງ​ຫຼາຍ​ມະຫາ​ສານ​. ໂຈ​ ຣຸດ​ໂຊ​ ອະທິບາຍ​ຕໍ່ວ່າ​ ມັນ​ບໍ່​ແມ່ນ​ເລື່ອງ​ງ່າຍ​ທີ່​ຈະ​ຕ້ອງ​ເລົ່າເລື່ອງ​ລາວ​ທີ່​ຊັບ​ຊ້ອນ​ ແລະ​ໃນ​ຂະນະ​ດຽວ​ກັນ​​ກໍ​ຕ້ອງ​ການ​ເຫດການ​ທີ່​ເຕັມ​ໄປ​ດ້ວຍ​ອາລົມ​ຄວາມ​ຮູ້ສຶກ​ຂອງ​ເຫຼົ່າຕົວ​ລະ​ຄອນ​ ເຊິ່ງ​ລາວ​ຮູ້ສຶກ​ວ່າ​ ນີ້​ຈະ​ເປັນ​ 3 ຊົ່ວ​ໂມງ​ອັນ​ຄຸ້ມ​ຄ່າ​ແນ່ນອນ.​ ທາງ​ດ້ານ​ ແອນ​ໂທ​ນີ​ ຣຸດ​ໂຊ​ ກໍ​ມາ​ບອກ​ເລົ່າເລື່ອງ​ອ້ອມ​ສາຍ​ທົດສອບ​ປະຕິ​ກິ​ລິຍາ​ຜູ້ຊົມ​ເຊິ່ງ​ເຮັດ​ໄປ​ແລ້ວ​ 4 ເທື່ອ​ ເຊິ່ງ​ໃນ​ 3 ເທື່ອ​ທຳອິດ​ບໍ່​ມີ​ໃຜ​ລຸກ​ໄປ​ເຂົ້າ​ຫ້ອງ​ນ້ຳ​ລະຫວ່າງ​ທີ່​ຮູບເງົາສາຍ​ແມ່ນແຕ່​ຄົນ​ດຽວ​!

ແລະ ​ຫາກ​ວ່າ​ Avengers: Endgame ມີ​ຄວາມ​ຍາວ 3 ຊົ່ວ​ໂມງ​ແທ້ໆ​ ນີ້​ຈະ​ເປັນ​ຮູບເງົາໃນ​ຈັກກະວານ​ມາ​​ເວລ​ທີ່​ມີ​ຄວາມ​ຍາວຫຼາຍ​ທີ່ສຸດ​ ທຳລາຍ​ສະ​ຖິ​ຕິ​ເກົ່າ​ຂອງ​ Avengers: Infinity War ກັບຕົວ​ເລກ​ 149 ນາ​ທີ.​ ໃນ​ຂະນະ​ທີ່​ຮູບເງົາ​ຈາກ​ບັນດາ​ຄ້າຍ​ຮູບເງົາອື່ນ​ໆ​ ທີ່​ຢູ່ໃນ​ລຳ​ດັບ​ຕົ້ນ​ໆ​ ກໍ​ມີ​ທັງ​ Blade Runner 2049 ເຊິ່ງ​ມີ​ຄວາມ​ຍາວ 163 ນາ​ທີ​ ໃນ​ຂະນະ​ທີ່​ Interstellar ນັ້ນ​ຍາວເຖິງ​ 169 ນາ​ທີ​.

ມາ​ລຸ້ນ​ກັນ​ດີກວ່າ​ວ່າ​ທ້າຍ​ທີ່ສຸດ​ແລ້ວ​ Avengers: Endgame ຈະ​ມີ​ຄວາມ​ຍາວເທົ່າ​ໃດ ເຂົ້າ​ສາຍ​ທົ່ວໂລກໃນປາຍເດືອນເມ​ສາ​ນີ້.​