ມາເບິ່ງກັນວ່າ ມີແອັບໃດແດ່ໃນມືຖື ທີ່ "ຍິ່ງໃຊ້ດົນ ຊີວິດຍິ່ງເປັນທຸກ"

ມີ​ລາຍ​ງານ​ຜົນ​ວິໄຈ​ຈາກ​ Center for Humane Technology ຈາກ​ການ​ລວບລວມ​ຂໍ້​ມູນ​ຜ່ານ​ແອັບພຼິເຄຊັນ​ Moment (ແອັບ​​ຕິດຕາມ​ເວລາ​ໃຊ້​ງານແອັບ​ຕ່າງ​ໆໃນ​ສະມາດໂຟນ​).

ໂດຍ​ສຳຫຼວດ​ຈາກ​ຜູ້​ໃຊ້​ໄອ​ໂຟນ​ 2 ແສນ​ລາຍ​ໃນ​ສະ​ຫະລັດ​ອາ​ເມ​ລິ​ກາ ຈົ​ນ​ໄດ້​ຂໍ້​ສະຫຼຸບ​ພົບລາຍ​ຊື່ແອັບ​ ທີ່​ເຂົ້າ​ຂ່າຍ​ສ້າງ​ຄວາມ​ສຸກ​ ແລະ​ຄວາມ​ທຸກ​ໄດ້​ທຽບ​ກັບ​ປັດ​ໄຈຄື​ ໄລຍະ​ເວລາ​ທີ່​ໃຊ້​ງານ​ ເຊິ່ງ​ Kevin Holesh ຜູ້​ອອກ​ແບບ​ແອັບ​ Moment ໄດ້​ລະ​ບຸທິດສະ​ດີ​ happiness breaking point ຫຼື ​ໄລຍະ​ເວລາ​ທີ່ພໍ​ດີ​ສຳລັບ​ການ​ໃຊ້ແອັບ​ນັ້ນ​ໆ​ ທີ່​ຫາກ​ຫຼາຍ​ເກີນ​ໄປ​ມັນ​ຈະ​​ປ່ຽນ​ຄວາມ​ສຸກ​ເປັນ​ຄວາມ​ທຸກ​ໄດ້.​

ສຳລັບ​ແອັບ​ທີ່​ຖືກ​ລະ​ບຸ​ວ່າ​ສ້າງ​ຄວາມ​ສຸກ​ໄດ້ຫຼາຍ​ທີ່ສຸດ​ເມື່ອ​ໃຊ້​ໄປ​ດົນ​ໆປະກອບມີ​: Calm, Amazon Music, Audible ແລະ​ແອັບ​ພະຍາກອນ​ອາ​ກາດ.​ ຂະນະ​ດຽວ​ກັນແອັບ​ ທີ່​ຖືກລະ​ບຸ​ວ່າ​ຍິ່ງ​ໃຊ້​ເປັນ​ໄລຍະ​ເວລາ​ດົນ​ເທົ່າ​ໃດ ຍິ່ງ​ຮູ້ສຶກ​ບໍ່​ມີ​ຄວາມ​ສຸກ​ໄດ້​ແກ່​ແອັບ​ຢ່າງ​ Reddit, Candy Crush Saga, Grindr, ລວມທັງ​ Facebook ເຊິ່ງ​ຜົນ​ສຳຫຼວດ​ລະ​ບຸ​ວ່າ​ຄ່າສະເລ່ຍ​ທີ່​ຜູ້​ໃຊ້​ຈະ​ມີ​ຄວາມ​ສຸກ​ຢູ່​ທີ່​ 20 ນາ​ທີ​ຕໍ່​ມື້​ ແລະ​ຫາກ​ໃຊ້​ Facebook ເປັນ​ເວລາ​ດົນ​ກວ່າ​ 40 ນາ​ທີ​ຕໍ່​ມື້​ ຈະ​ເຮັດໃຫ້​ຜູ້​ໃຊ້​ມີ​ທ່າອ່ຽງ​ຈະ​ບໍ່​ມີ​ຄວາມ​ສຸກ​ ສອດ​ຄ່ອງ​ກັບ​ຜົນ​ວິ​ໄຈ​ຈາກ​ Cornell University ໃນ​ປີ​ 2013 ທີ່ພົບວ່າ​ ປະຊາຊົນ​ຊາວ​ຈີນ​ທີ່​ຫຼິ້ນ​ໂຊ​ຊຽວ​ສ່ວນ​ໃຫຍ່​ມີ​ແນວ​ໂນ້ມ​ຈະ​ສະແດງ​ຄວາມຮຸນແຮງ​ໄດ້​ງ່າຍ​ກວ່າ​ປົກກະຕິ​ຫາກ​ໃຊ້​ເວລາ​ກັບ​ Weibo ຫຼາຍ​ເກີນ​ໄປ.​