ເມືອງແກ່ນທ້າວ ພົບກໍລະນີໄຂ້ຍຸງລາຍ 24 ຄົນ ເສຍຊີວິດ 1 ຄົນ ໃນປີ 2018

ສຳນັກຂ່າວສານປະເທດລາວລາຍງານວ່າ ໃນປີ 2018 ນີ້,​ ​ເມືອງ​ແກ່ນ​ທ້າວ ​ແຂວງ​ໄຊ​ຍະ​ບູລີ  ກວດພົບກໍລະນີໄຂ້ຍຸງລາຍ 24 ຄົນ, ​ເສຍ​ຊີວິດ​ແລ້ວ 1 ຄົນ  ​ແລະ ເພື່ອຕ້ານກໍລະນີດັ່ງກ່າວ ເມືອງ​ແກ່ນ​ທ້າວ ໄດ້ລົງເຮັດສຸຂະສຶກສາ ແລະ ສົ່ງແພດໝໍ  ລົງບ້ານແຕ່ມື້ທໍາອິດທີ່ພົບກໍລະນີ.  ​ເຊິ່ງຂໍ້​ມູນ​ດັ່ງກ່າວ​ໄດ້​ຮັບ​ການ​ລາຍ​ງານ ​ໃນກອງປະຊຸມຄະນະກໍາມະການສະກັດກັ້ນ -ຄວບຄຸມໄຂ້ຍຸງລາຍ ປະຈໍາປີ 2017  ແລະ ແຜນການປີ 2018 ເມືອງແກ່ນທ້າວ ແຂວງໄຊຍະບູລີ ທີ່​ຈັດ​ຂຶ້ນ  ​ໃນ​ວັນ15 ມິຖຸນາ ຜ່ານ​ມາ.

​ທ່ານ ບຸນຍັງ ພັນທະວົງ ຫົວໜ້າ ຫ້ອງການສາທາລະນະສຸກເມືອງ ​ຍັງໄດ້​ໃຫ້​ຮູ້​ວ່າ:  ​ໃນ 1 ປີຜ່ານມາ ​ໄດ້ມອບຄວາມຮັບຜິດຊອບ ໃຫ້ພະນັກງານຊີ້ນໍາຕ້ານພະຍາດລະບາດ  ສົມທົບກັບ ອໍານາດການປົກຄອງບ້ານ,  ເຮັດສຸຂະສຶກສາ 47 ບ້ານໃນທົ່ວເມືອງໄດ້ 200 ກວ່າຄັ້ງ  ມີຜູ້ເຂົ້າຮ່ວມຮັບຟັງເກືອບ 20,000 ຄົນ,  ພ້ອມ​ທັງສ້າງຂະບວນການ 9 ບ້ານເທສະບານ,  ຊີ້ນໍາສຸກສາລາ 10 ແຫ່ງ ສ້າງຂະບວນການອະນາໄມລວມບ້ານ,  ສ່ວນຜົນການກວດໜອນນໍ້າ 5 ຮອບໃນ  9 ບ້ານເທບ້ານ ແລະ ສຸກສາລາ 10 ແຫ່ງທົ່ວເມືອງ ຈໍານວນ 5.000 ກວ່າຄອບຄົວ,  ພົບໜອນນໍ້າ 890 ກວ່າຄອບຄົວ​ແລະ ອື່ນໆ.