ລັດ​ຢຶນຢັນການ​ຊົດ​ເຊີຍ​ຜົນກະທົບໃນໂຄງການສ້າງ​ທາງ​ດ່ວນແຕ່ນະຄອນຫລວງ​ວຽງຈັນ-ບໍ່​ເຕັນ ຈະໃຫ້​ເຫມາະ​ສົມ

ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງໂຍທາ​ທິການ ​ແລະ ຂົນ​ສົ່ງ ​ໄດ້​ລາຍ​ງານ​ກ່ຽວກັບ​ວຽກງານ​ຊົດ​ເຊີຍ​ສິ່ງ​ກິດ​ຂວາງຕ່າງໆຕາມ​ແລວໂຄງການກໍ່ສ້າງເສັ້ນ​ທາງດ່ວນ​ແຕ່ນະຄອນຫລວງ​ວຽງຈັນຫາບໍ່​ເຕັນ (ຊ່ວງ​ທີ 1 ​ແຕ່ນະ ຄອນຫລວງ​ວຽງຈັນ-ວັງ​ວຽງ) ຕໍ່ກອງປະຊຸມສະພາແຫ່ງຊາດທີ່ດໍາເນີນໃນປັດຈຸບັນ​ນີ້​ວ່າ: ກຸ່ມ​ບໍລິສັດ​ກໍ່ສ້າງ​-ລົງທຶນ ​ແລະ ຖື​ຮຸ້ນ​ຈຳກັດ ​ແຂວງຢູນນານ ສປ ຈີນ ​ໄດ້​​ຈ້າງບໍລິສັດທີ່​ປຶກສາ​ສິ່ງ​ແວດ​ລ້ອມ​ລາວ ​ຈຳກັດ ເພື່ອຮ່ວມ​ກັບ​ອົງການ​ປົກຄອງ​ແຂວງວຽງຈັນ ​ແລະ ນະຄອນຫລວງ​ວຽງຈັນ ໃນການຄິດໄລ່ຄ່າຊົດ​ເຊີຍ​ສິ່ງ​ກີດ​ຂວາງຕ່າງໆ.

ມາຮອດປັດຈຸບັນ ​ໄດ້​ລົງກວດກາ​ແຕ່​ລະ​ບ້ານລວມມີ​ທັງໝົດ 65 ບ້ານໃນ 4 ​ເມືອງ. ​ໃນ​ນັ້ນຢູ່​ແຂວງວຽງຈັນ​ກວມ 3 ​ເມືອງມີ 40 ບ້ານ ​ແລະ ນະຄອນຫລວງ​ວຽງຈັນກວມ 1 ​ເມືອງ, ມີ 25 ບ້ານ ​ແລະ ​ໄດ້​ຄົ້ນຄວ້າ​ກ່ຽວກັບ​ລາຄາ​ຫົວໜ່ວຍ​ໄກ່​ເກ່ຍຂອງ​ແຂວງວຽງຈັນ ​ແລະ ນະຄອນ​ຫລວງ​ວຽງຈັນ, ຜູ້​ທີ່​ຖືກ​ຜົນ​ກະທົບ​ຮ່ວມ​ກັບຄະນະ​ກຳມະການ​ໄກ່​ເກ່ຍຂອງ​ທັງ​ສອງ​ແຂວງ ​ແລະ ໄດ້​ພິຈາລະນາອອກ​ຂໍ້​ຕົກລົງ​ວ່າ​ດ້ວຍການ​ຮັບຮອງ​ເອົາ​ລາຄາ​ຫົວໜ່ວຍຊົດ​ເຊີຍຜົນ​ກະທົບ​ໂຄງການ​ກໍ່ສ້າງ​ທາງ​ດ່ວນໃນຊ່ວງດັ່ງກ່າວ ​ແລະ ຄາດ​ວ່າຈະ​ທົດ​ແທນ​ຄືນ​ໃນ​ໄວໆນີ້ ແລະ ​ໃນ​ວັນ​ທີ 11 ມິຖຸນານີ້, ທ່ານ ອານຸພາບ ຕຸ​ນາ​ລົມ ປະທານ​ສະພາ​ປະຊາຊົນນະຄອນຫລວງ​ວຽງຈັນ​ໄດ້​ໃຫ້​ສຳພາດ​ ກ່ຽວກັບ​ການ​ຊົດ​ເຊີຍ​ຜູ້​ໄດ້​ຮັບ​ຜົນ​ກະທົບ​ການກໍ່ສ້າງ​ທາງ​ດ່ວນ​ດັ່ງກ່າວວ່າ: ນະ​ໂຍບາຍຊົດ​ເຊີຍ​ຜູ້​ໄດ້​ຮັບ​ຜົນ​ກະທົບໃນ​​ໂຄງການ​ທາງ​ດ່ວນນະຄອນຫລວງ​ວຽງຈັນ-ບໍ່​ເຕັນ ​ແມ່ນ​ເປັນ​ບັນຫາ​ສຳຄັນ, ​ເນື່ອງ​ຈາກ​ເປັນ​ໂຄງການ​ໃຫຍ່ ​ແລະ ຜູ້​ໄດ້​ຮັບ​ຜົນ​ກະທົບ​ກໍ​ມີຫລາຍ, ສະ​ນັ້ນທາງສະພານະຄອນຫລວງ​ວຽງຈັນກໍ​ໄດ້​ເອົາ​ໃຈ​ໃສ່​ໃນ​ການ​ລົງ​ຊີ້ນຳ​ໃຫ້​ສັງຄົມ​ເຂົ້າ​ໃຈ ​ແລະ ການ​ຊົດ​ເຊີຍກໍ​ອາດ​ແບ່ງ​ເປັນ 2 ແບບຄື: ຊົດ​ເຊີຍ​ດ້ວຍ​ເງິນ ​ແລະ ການ​ເວນ​ຄືນທີ່​ດິນ, ພ້ອມ​ທັງ​ຈັດ​ສັນພຶ້ນທີ່​ໃຫ້, ​ຊຶ່ງ​ບັນຫາ​ດັ່ງ​ກ່າວ, ລັດຖະບານ​ຈະ​ໃຫ້ການ​ຊົດ​ເຊີຍ​ຜູ້​ໄດ້​ຮັບ​ຜົນ​ກະທົບ​ຢ່າງ​​ເຫມາະສົມ ແລະ ເມື່ອ​ສະພາ​ແຫ່ງ​ຊາດ​ເຫັນ​ດີຕໍ່​ຮ່າງ​ນະ​ໂຍບາຍ​ຊົດ​​ເຊີຍ​ໃຫ້​ແກ່​ປະຊາຊົນທີ່​ຖືກ​ຜົນ​ກະທົບ​ຈາກ​ໂຄງການ​ກໍ່ສ້າງ​ທາງ​ດ່ວນແຕ່ນະຄອນຫລວງ​ວຽງຈັນຫາບໍ່​ເຕັນແລ້ວ ກໍ​ພ້ອມ​ຈະ​ດຳ​ເນີນ​ການທັນທີ.