Avengers: Infinity War ກວາດລາຍໄດ້​ທະ​ລຸ​1ພັນ​ລ້ານ​ໂດລາໄວ​ກວ່າ​ຮູບເງົາທຸກ​ເລື່ອງ​

Avengers: Infinity War ກາຍ​ເປັນຮູບເງົາ​ທີ່​ມີລາຍໄດ້​ເຖິງ​ຫຼັກ​ 1 ພັນ​ລ້ານ​ໂດລາ​ໄວ​ທີ່ສຸດ​ໃນ​ໂລກ​ ຫຼັງ​ເຂົ້າ​ສາຍ​ພຽງ​ 11 ມື້​.

ເມື່ອ​ວັນເສົາ​​ທີ​ 5 ພຶດສະພາ ຜ່ານມາ​ ເຊິ່ງ​ເປັນ​ວັນທີ​ 11 ທີ່​ Avengers: Infinity War ເຂົ້າ​ສາຍ​ ກໍ​ກວາດ​ລາຍໄດ້​ທົ່ວ​ໂລກ​ທະ​ລຸ​ຫຼັກ​ 1 ພັນ​ລ້ານ​ໂດລາ​ໄປ​ຮຽບຮ້ອຍ​ແລ້ວ​ ເຊິ່ງ​ຖື​ວ່າ​ເປັນ​ຮູບເງົາ​ທີ່​ມີ​ລາຍໄດ້​ເຖິງ​ຫຼັກ​ 1 ພັນ​ລ້ານ​ໂດລາ​ໃນ​ເວລາ​ທີ່​ວ່ອງໄວ​ທີ່ສຸດ​ໃນ​ໂລກ​ ທຳລາຍ​ສ​ະຖິ​ຕິ​ເກົ່າຂອງ​ຮູບເງົາ​ເລື່ອງ​ Star Wars: The Force Awakens ທີ່​ອອກ​ສາຍ​ເມື່ອ​ປີ​ 2015 ທີ່​ໃຊ້​ເວລາ​ເຂົ້າ​ສາຍ​ 12 ມື້​ ໃນ​ການກວາດ​ລາຍໄດ້​ເກີນ​ 1 ພັນ​ລ້ານ​ໂດລາ.​ 

ເສົາ​ອາທິດ​ທີ່​ຜ່ານມາ​ Avengers: Infinity War ກໍ​ເກັບ​ລາຍໄດ້​ໃນ​ສະ​ຫະລັດ​ເພີ່ມ​ 112.5 ລ້ານ​ໂດລາ​ ແລະ​ລາຍໄດ້​ໃນ​ຕ່າງ​ປະເທດ​ເພີ່ມ​ອີກ​ 162.6 ລ້ານ​ໂດລາ​. ສ່ວນ​ລາຍໄດ້​ທັງໝົດ​ຂະນະ​ນີ້​ກໍ​ຢູ່​ທີ່​ 1,160 ລ້ານ​ໂດລາ​ ນີ້​ຍັງ​ບໍ່​ນັບລວມລາຍໄດ້​ໃນ​ປະເທດ​ຈີນ​ ເພາະຮູບເງົາ​ເລື່ອງ​ນີ້​ຈະ​ເຂົ້າ​ສາຍໃນ​ຈີນ​ໃນ​ວັນທີ​ 11 ພ​ຶດສະພາ​ນີ້​ ເຊິ່ງ​ໜ້າ​ຈະ​ຊ່ວຍ​ເຮັດໃຫ້​ລາຍໄດ້​ຂອງຮູບເງົາ​ເພີ່ມ​ຂຶ້ນ​ຢ່າງ​ກ້າວ​ກະ​ໂດດ​ ເພາະ​ຈີນ​ເປັນ​ຕະຫຼາດ​ຮູບເງົາ​ທີ່​ໃຫຍ່​ເປັນ​ອັນ​ດັບ​ສອງ​ຂອງ​ໂລກ​ ຮອງ​ຈາກ​ສະ​ຫະລັດ.​