ກວດເບິ່ງດ່ວນ! ພົບແອັບ WhatsApp ປອມໃນ Play Store ມີຄົນໂຫຼດໄປແລ້ວ 1 ລ້ານເທື່ອ

ມີ​ງານ​ເຂົ້າ​ກັນ​ໄປ​ບໍ່ໜ້ອຍ​ເລີຍ​ຫຼັງ​ຈາກ​ທີ່​ໂລກ​ໂຊ​ຊຽວ​ພົບ​ວ່າ​ມີ​ແອັບ​ WhatsApp ປອມ​ ປະກົດ​ຢູ່​ເທິງ​ Play Store ເຊິ່ງ​ກໍ​ມີ​ຜູ້​ໃຊ້​ຫຼົງ​ກົນ​ໄປ​ດາວ​​ໂຫຼດ​ມາ​ກັນ​ເຖິງ​ຫຼັກ​ລ້ານລາຍ​ ໂດຍຫຼ້າ​ສຸດ​ທາງ​ Google ກໍ​ໄດ້​ຈັດການ​ລຶບ​ແອັບ​ປອມ​ດັ່ງ​ກ່າວ​ອອກ​ໄປ​ແລ້ວ​ ພ້ອມ​ກັບ​ລົງໂທດ​ແບນ​ນັກ​ພັດທະນາ​ແອັບ​ດັ່ງ​ກ່າວ​ຂໍ້​ຫາ​ຝ່າ​ຝືນ​ກົດ​ຂອງ​ Google ອີກດ້ວຍ​.

ສຳລັບ​ແອັບ​ດັ່ງ​ກ່າວ​ນັ້ນ​ໃຊ້​ຊື່​ວ່າ​ ‘Update WhatsApp” ພ້ອມ​ກັບ​ໂລ​ໂກ້​ທີ່​ຄືກັນກັບ​ຂອງ​ WhatsApp ທຸກ​ປະ​ການ​ ໂດຍ​ຕົວ​ນັກ​ພັດທະນາ​ໃຊ້​ຊ່ອງ​ຫວ່າງໃນ​ການ​ຂຽນ​ໂຄ້ດ​ແບບ​ White Space ເພື່ອ​ຫຼອກ​ລະບົບ​ຮັກສາ​ຄວາມ​ປອດ​ໄພຂອງ​ Google ໃຫ້​ສາມາດ​ໃຊ້​ໂລ​ໂກ້​ ລວມ​ທັງ​ຊື່​ຜູ້​ພັດທະນາ​ຄືກັນ​ກັບ​ແອັບ​ແທ້ໄດ້​ ເຊິ່ງ​ເປັນ​ການ​ຫາ​ຊ່ອງ​ທາງ​ສ້າງ​ລາຍ​ໄດ້​ຈາກ​ການ​ໂຄສະ​ນາໃນ​ແອັບ​ປອມ​ນີ້​ອີກ​ຕໍ່​ໜຶ່ງ​ ພ້ອມ​ທັງ​ຍັງ​ສາມາດ​ດຶງ​ຂໍ້​ມູນ​ຜູ້​ໃຊ້​ກວ່າ​ລ້ານລາຍ​ທີ່​​ຕິດ​ຕັ້ງ​ແອັບ​ນີ້​ອີກດ້ວຍ.​

ທາງ​ດ້ານ​ຂອງ​ Nikolaos Chrysaidos ນັກ​ວິ​ໄຈ​ດ້ານ​ຄວາມ​ປອດ​ໄພຈາກ​ Avast ກໍ​ໄດ້​ເປີດ​ເຜີຍ​ວ່າ​ ວິທີ​ນີ້​ໄດ້ຮັບ​ຄວາມ​ນິຍົມ​ຈາກ​ນັກ​ພັດທະນາ​ສາຍ​ມືດ​ກັນ​ຫຼາຍ​ ແລະ ​ກ່ອນ​ໜ້າ​ນີ້​ກໍ​ມີ​ການເຮັດ​ແອັບໂຊ​ຊຽວ​ປອມ​ອອກ​ມາ​ຫຼາຍ​ເທື່ອ​ແລ້ວ​ເຊັ່ນ: ​ແອັບ​​ Facebook ປອມ​ ທີ່​ປະກົດ​ວ່າ​ມີ​ຜູ້​ໃຊ້​ພາດ​ໄປ​ດາວ​ໂຫຼດ​ກວ່າ​ 10 ລ້າ​ນ​ເທື່ອ​ກັນເລີຍ​.​