ຮູ້ແລ້ວ ຫຼື ຍັງ? ຈະເຮັດແນວໃດເມື່ອໃບເສຍຄ່າທຳນຽມທາງຕົກເຮ່ຍເສຍຫາຍ?

ເມື່ອວັນທີ 30 ຕຸລາ ທີ່ຜ່ານມາ ທະນາຄານການຄ້າຕ່າງປະເທດລາວ ຫຼື BCEL ຮ່ວມກັບກະຊວງການເງິນ ໄດ້ເປີດໃຫ້ຈ່າຍຄ່າທຳນຽມທາງແບບທັນສະໄໝຜ່ານຫຼາຍຊ່ອງທາງ ບໍ່ວ່າຈະເປັນການຈ່າຍຜ່ານແອັບພຼິເຄຊັນ BCEL ONE ຫຼື ຜ່ານຕູ້ ATM ຂອງທະນາຄານ ເຊິ່ງກໍເປັນບາດກ້າວທີ່ສຳຄັນເພື່ອເຮັດໃຫ້ການຈ່າຍຄ່າທຳນຽມທາງສະດວກສະບາຍຂຶ້ນ ແລະ ຮັບປະກັນການຈັດເກັບລາຍຮັບເຂົ້າຄັງເງິນຂອງລັດໃຫ້ເປັນໄປຢ່າງມີປະສິດທິຜົນ.

ແຕ່ວ່າ ໃນບາງກໍລະນີ ຫຼັງຈາກທີ່ເຮົາໄປຮັບເອົາສະຕິກເກີໃບເສຍຄ່າທາງມາແລ້ວ ແຕ່ໂຊກຮ້າຍເຮັດຕົກເຮ່ຍເສຍຫາຍແລ້ວຈະເຮັດແນວໃດດີ? ຈະອອກເດີນທາງໄປໃສກໍຮູ້ສຶກບໍ່ສະບາຍໃຈ ເພາະຢ້ານເຈົ້າໜ້າທີ່ກວດເອກະສານລົດ ແລ້ວຖ້າເອກະສານບໍ່ຄົບກໍຈະຖືກປັບໄໝ. ສະນັ້ນ ທີມ ມ່ວນ ຈຶ່ງໄດ້ສອບຖາມໄປຍັງທະນາຄານການຄ້າຕ່າງປະເທດລາວ ຜູ້ເປັນຕົວແທນໃຫ້ບໍລິການອອກໃບເສຍຄ່າທາງປະຈຳປີວ່າ ຈະແກ້ໄຂປັນຫານີ້ໄດ້ແນວໃດ?

ວິທີການກໍງ່າຍແສນງ່າຍ ພຽງແຕ່ນຳເອົາປຶ້ມຕິດຕາມການຂຶ້ນທະບຽນລົດ (ປຶ້ມເຫຼືອງ) ເຂົ້າໄປຕິດຕໍ່ທີ່ປ່ອງບໍລິການອອກໃບເສຍຄ່າທາງ ພ້ອມແຈ້ງວ່າຂໍຮັບໃບເສຍຄ່າທາງໃໝ່ ທາງເຈົ້າໜ້າທີ່ກໍຈະກວດເບິ່ງຂໍ້ມູນລົດຂອງເຮົາ ແລະ ຂໍ້ມູນການຊຳລະເງິນວ່າຊຳລະມາກ່ອນແລ້ວ ຫຼື ຍັງ. ຖ້າຫາກວ່າຂໍ້ມູນລົດຖືກຕ້ອງ ແລະ ຈ່າຍຄ່າທຳນຽມທາງມາກ່ອນແລ້ວ ທາງປ່ອງບໍລິການກໍຈະອອກໃບເສຍຄ່າທຳນຽມທາງອັນໃໝ່ໃຫ້ ແລະ ເຮົາຕ້ອງເສຍຄ່າທຳນຽມຈຳນວນ 20,000 ກີບ.

ທັງນີ້ ເອກະສານດັ່ງກ່າວມີຄວາມສຳຄັນ ແລະ ຈຳເປັນທີ່ຈະຕ້ອງຖືຕິດໂຕໄວ້ຕະຫຼອດເວລາທີ່ຂັບຂີ່ຈະລາຈອນໃນທ້ອງຖະໜົນ ສະນັ້ນຄວນເກັບຮັກສາໄວ້ໃນບ່ອນທີ່ປອດໄພ ເພື່ອປ້ອງກັນການເສຍຫາຍ ແລະ ຫຼີກເວັ້ນການເສຍເງິນເພີ່ມ.