ສະຕາດອັບໃນນິວຢອກປະດິດແອັບທີ່ສາມາດກວດຈັບສິນຄ້າແບຣນເນມປອມ

ສິນ​ຄ້າປອມ​ແປງ​ ຄິດ​ເປັນ​​ຈຳນວນ 2.5% ຂອງ​ການ​ຄ້າ​ທົ່ວ​ໂລກ​ ສ​ະຕາ​ດ​ອັບ​ໃນ​ນະຄອນ​ນິວ​ຢອກ​ຈຶ່ງ​ຄິດ​ຄົ້ນ​ແອັບ​ພູິ​ເຄ​ຊັນ​ກວດ​ຈັບ​ສິນ​ຄ້າ​ແບຣ​ນ​ເນມ​ປອມ​ ເພື່ອ​ຊ່ວຍ​ຜູ້​ປະກອບ​ການ​ ຈຳ​ແນກ​ສິນ​ຄ້າ​ແບຣນ​​ເນມແທ້ ​ແລະ ທຽມ​ໄດ້.​

ສິນ​ຄ້າ​ແບຣນ​ເນມ​ປອມ​ ເປັນ​ບັນຫາ​ທີ່​ທົ່ວ​ໂລກປະເຊີນ​ ແລະ ​ສ້າງ​ຄວາມ​ເສຍ​ຫາຍ​ໃຫ້​ແກ່​ຜູ້​ຜະລິດ​ສິນ​ຄ້າ​ແບຣນ​ເນມ​ຂອງແທ້​ບໍ່​ໜ້ອຍ.​ ທຸລະກິດ​ສະຕາດອັບ​ຈຶ່ງ​ເກີດ​ໄອ​ເດຍ​ ກຳ​ຈັດ​ສິນ​ຄ້າປອມ​ໃຫ້ໝົດໄປ.​ ຂະນະ​ດຽວ​ກັນກໍສາມາດ​ສ້າງ​ເມັດ​ເງິນ​ຈາກ​ຂະ​ບວນ​ການ​ກຳຈັດ​ຂອງ​ປອມ​ໄດ້.​

ສະຕາດອັບ​ເຈົ້າ​ນີ້ແມ່ນ ​ເອັນ​ທຣູ​ພີ​ ( Entrupy ) ເຊິ່ງ​ເປັນ​ຜູ້​ປະດິດ​ກ້ອງ​ຈຸນລະທັດ​ຂະໜາດ​ເທົ່າ​ຝາ​ມື​ ທີ່​ເຮັດໃຫ້​ຜູ້​ໃຊ້​ສາມາດ​ກວດ​ຈັບ​ສິນ​ຄ້າປອມ​ໄດ້​ງ່າຍໆ​ຜ່ານ​ສ​ະມາດ​ໂຟນ​. ໂດຍ​ປັດຈຸບັນ​ ກ້ອງ​ຂະໜາດ​ນ້ອຍ​ນີ້​ ສາມາດ​ກວດ​ຈັບ​ສິນ​ຄ້າປອມ​ໄດ້​ເຖິງ​ 11 ຍີ່​ຫໍ້.​

ແອັບ​ພຼິ​ເຄ​ຊັນ​ນີ້​ໃຊ້​ເຕັກ​ໂນ​ໂລ​ຊີ​ປັນຍາ​ປະດິດ​ ກວດ​ຈັບ​ຂໍ້​ມູນ​ສິນ​ຄ້າ​ລອກ​ແບບ​ ໂດຍ​ທຽບ​ກັບ​ຂໍ້​ມູນ​ສິນ​ຄ້າ​ຮຸ່ນ​ດຽວ​ກັນ​ທີ່​ຖືກ​ບັນ​ທຶກ​ໄວ້​ແລ້ວ​. ​ທີມ​ງານ​ບັນ​ທຶກ​ຂໍ້​ມູນ​ວັດ​ສະດຸ​ສິນ​ຄ້າ​ຢ່າງ​ລະອຽດ​ ທີ່​ໃຊ້​ເວລາ​ຮວບຮວມ​ເຮັດ​ເຖິງ​ 2 ປີ​ ຈົນ​ລະບົບ​ສາມາດ​ກວດ​ຈັບ​ໄດ້​ ແລະ ​ຈຳແນກ​ໄດ້​ລະຫວ່າງ​ສິນ​ຄ້າປອມ​ ແລະ ​ສິນ​ຄ້າແທ້.​ 

ວິທະ​ຢຸດ​ ສິ​ນີວ​ສັນ​ ຜູ້​ຮ່ວມ​ກໍ່​ຕັ້ງ​ Entrupy ລະ​ບຸ​ວ່າ​ ການ​ກວດ​ສອບ​ຊັດເຈນເຖິງ​​ 98.5% ແລະ​ອັດຕາ​ການ​ກວດ​ສອບ​ຜິດ​ພາດ​ຢູ່​ທີ່​​ 0.1% ເທົ່າ​ນັ້ັ​ນ.​

ທຸລະກິດ​ຂອງ​ເອັນ​ທຣູ​ພີ​ ດຳ​ເນີນ​ມາ​ໄດ້​ 1 ປີ​ ແລະ ​ມີ​ລູກ​ຄ້າປະ​ມານ​ 200 ຄົນ​ ໂດຍ​ຄ່າ​ໃຊ້​ບໍລິການ​ເລີ່ມຕົ້ນຢູ່​ທີ່​ 299 ໂດລາ​ ຫຼື ​ປະ​ມານ​ 2 ລ້ານ 5 ແສນກີບ ແລະ​ສາມາດ​ເລືອກ​ແພັກ​ເກັດ​ລາຍ​ເດືອນ​ໄດ້​ ເລີ່ມ​ຕົ້ນ​ຈາກ​ລາ​ຄາ​ 99 ໂດລາ​ ຫຼື ​ປະ​ມານ​ 8 ແສນກີບ​ ເປັນ​ຕົ້ນ​ໄປ.​ 

ເອັນ​ທຣູ​ພີ​ຫວັງ​ວ່າ​ ຈະ​ສາມາດ​ຂະຫຍາຍ​ທຸລະກິດ​ ຂະນະ​ດຽວ​ກັນ​ກໍຊ່ວຍ​ເຫຼືອ​ຜູ້​ປະກອບ​ການ​ຂາຍ​ສິນ​ຄ້າ​ແບຣນ​ເນມລາຍ​ຍ່ອຍ​ ເຊິ່ງ​ເປັນ​ລູກ​ຄ້າ​ສ່ວນ​ໃຫຍ່​ຂອງ​ບໍລິສັດ​ໄດ້​. ໂດຍ​ຕາມ​ຂໍ້​ມູນ​ຂອງ​ ອົງ​​ການ​ເພື່ອ​ຄວາມ​ຮ່ວມ​ມື ​ແລະ ​ການ​ພັດທະນາ​ທາງ​ເສດຖະກິດ​ (OECD) ໃນ​ປີ​ທີ່​ຜ່ານມາ​ ສິນ​ຄ້າລອກ​ແບບ​ຄິດ​ເປັນ​ 2.5% ຂອງ​ການ​ຄ້າ​ທົ່ວ​ໂລກ​ ແລະ ​ມີ​ມູນ​ຄ່າ​ຫຼາຍ​ເຖິງ​ 461 ຕື້ໂດລາ.