ຖິ້ມຫ່າງບໍ່ເຫັນຝຸ່ນ iPhone X ໄດ້ຮັບຄະແນນທົດສອບນຳໜ້າສະມາດໂຟນຝັ່ງແອນດຣອຍທຸກຮຸ່ນ

ເປີດ​ຕັວ​ກັນ​ໄປ​ແລ້ວ​ເມື່ອ​ຄືນວັນອັງຄານທີ່ຜ່ານມາ​ ເຊິ່ງ​ກໍ​ເຮັດໃຫ້​ເຮົາ​ໄດ້​ເຫັນ​ຄວາມ​ປ່ຽນ​ແປງຫຼາຍຢ່າງ​ສຳລັບ​ iPhone X (ອ່ານ​ວ່າ​ ໄອ​ໂຟນ​ເທັນ​) ຈົນ​ເຮັດໃຫ້​ກະ​ເປົ໋າເງິນ​ໃນ​ມື​ຂອງ​ໃຜ​ຫຼາຍ​ຄົນ​ສັ່ນ​ໄຫວ​. ຫຼ້າ​ສຸດ​ມີ​ຂໍ້​ມູນ​ຜົນ​ທົດສອບ​ຊີ​ພີ​ຢູ​ຈາກ​ເວັບ​ໄຊ​​ Geekbench ຫຼຸດ​ອອກ​ມາ ລະ​ບຸ​ຊັດເຈນ​ວ່າ​ iPhone X ພາຍ​ໃຕ້​ຊີ​ພີ​ຢູ​ໃໝ່​ Apple A11 Bionic ທີ່​ມາພ້ອມ​ໜ່ວຍ​ປະ​ມວນ​ຜົນ​ 6 ແກນ​ (Hexa-Core) ນັ້ນ​ ເຮັດ​ຄະ​ແນນ​ຖິ້ມ​ຫ່າງ​ສ​ະມາ​ດ​ໂຟນ​ທຸກ​ລຸ້ນ​ໃນ​ຕະ​ຫຼາດ​ແບບ​ຄົນ​ລະ​ຊັ້ນ​ເລີຍ​.​

ທັງ​ນີ້​ ຄະ​ແນນ​ທີ່​ປະກົດ​ເທິງ​ເວັບ​ໄຊ​ Geekbench ນັ້ນ​ ລະ​ບຸ​ວ່າ​ຊິບ​ເຊັດ​ Apple A11 Bionic ສາມາດ​ເຮັດ​ຄະ​ແນນ​ແບບ​ Single-Core ໄປ​ໄດ້​ເຖິງ​ 4,601 ຄະ​ແນນ​ ແລະ ​ໄດ້​ຄະ​ແນນ​ສ່ວນ​ຂອງ​ Multi-Core ເຖິງ​ 9,959 ຄະ​ແນນ​. ກາຍ​ເປັນ​ຊິບ​ເຊັດ​ທີ່​ໄວ​ທີ່ສຸດ​ໃນ​ຕະຫຼາດ​ສະ​ມາ​ດ​ໂຟນ​ໃນເວລາ​ນີ້.​ ທຽບ​ເທົ່າ​ກັບ​ຄະ​ແນນ​ທົດສອບ​ທີ່​ MacBook ເຮັດ​ໄດ້​ເລີຍ​ ໂດຍ​ຄາດ​ວ່າ​ ​ຄະ​ແນນ​ດັ່ງ​ກ່າວ​ເປັນ​ຄະ​ແນນ​ທົດສອບ​ຂອງ​ iPhone X ແລະ​ iPhone 8 Plus.

ໃນ​ຂະນະ​ດຽວ​ກັນ​ ເມື່ອ​ປຽບທຽບ​ກັບ​ສ​ະມາ​ດ​ໂຟນ​ຮຸ່ນທັອບ​ຂອງ​ທາງ​ຝັ່ງ​ແອນ​ດ​ຣອຍ​​ນັ້ນ​ ຈະ​ເຫັນ​ໄດ້​ວ່າ​ Samsung Galaxy S8 ແລະ​ Note8 ເຊິ່ງ​ໃຊ້​ຊິບ​ເຊັດ​ Exynos 8895 ນັ້ນ​ ສາມາດ​ເຮັດ​ຄະ​ແນນ​ທົດສອບ​ໄດ້​ຢູ່​ທີ່​ 2,000 ສຳລັບ​ Single Core ແລະ​ 6,800 ໃນ​ສ່ວນ​ຂອງ​ Multi-Core ເຊິ່ງ​ຖື​ວ່າ​ເປັນ​ຜູ້ນຳ​ລາຍໃຫຍ່​ຂອງ​ຜູ້​ຜະລິດ​ຝັ່ງ​ແອນ​ດ​ຣອຍ​​ໃນ​ການ​ປັບ​ປຸງ​ປະ​ສິດ​ທິ​ພາບ​ຂອງ​ຊິບ​ເຊັດ​ປະ​ມວນ​ຜົນ​ໃຫ້​ດີກວ່າ​ເກົ່າ.​